SAC Nih Nawlngeihnak An Laak Hnu In Tualchung Mi Inn 80,000 Deng An Khangh Cang
===========
SAC nih nawlngeihnak an laak hnu in SAC ralkap le an kuttang mi hna nih 2023 November 30 tiang ah inn 77,274 an khangh cang, tiah Data For Myanmar nih December 13 ah an thanh.
Data For Myanmar nih an laakmi cazin ning ah 2023 January thla in inn khangh a tlawm deuh. 2021 February 1 in 2023 July 31 tiang ah Sagaing ramṭhen chung ah inn 57,503 an khangh i ramṭhen le ramkulh ah khangh tam bik a si, tiah an langhter.
2023 kum thawk in SAC ralkap nih inn an khanghmi a tlawm deuh cangnak a ruang hi ralkap thazaang a zor tuk cang caah a si tiin a zumhnak kong Welet peng PDF ṭuanvo ngeitu nih RFA ah a chim.
SAC nih nawlngeihnak an laak hnu in 2023 July 31 tiang ah SAC ralkap le an kuttang nih tualchung mi inn 74,074 an khangh tiin August 9 ah Data For Myanmar nih cun an rak langhter cang. Cu an langhter mi ningin tuak tikah 2023 November 30 tiang thla li chung lawng ah inn 2,400 an khangh chap.
SAC ralkap nih inn 80,000 deng an khangh cang nain chimphuannak nawlngeitu Zaw Min Tun nih cun SAC ralkap nih inn pakhat hmanh an khang lo i tualchung mi inn lo tu an runven tiah a chim.
Sami Khuapi Ah SAC Ralkap le Rakhine Ralkap AA Kar Kahdohnak Fak Ngai A Chuak.Chin ramkulh, Paletwa peng, Sami khuapi chung ah SAC ralkap le Rakhine ralkap AA cu nizan December 14, zinglei ah an i kap i kaphnih kar kahdohnak a fak, tiah tualchung mi nih a chim.
Nizan December 14, zinglei ah Sami khuapi Leikkone sang ah ralkap thazaang 20 hrawng nih umhmun an khuarnak SAC ralkap sakhan cu Rakhine ralkap AA nih an kah i suimilam pakhat chung hrawng kaphnih kar kahdohnak a fak, tiah an chim.Cu kahdohnak ruang ah Sami khuapi tualchung mi cu a himnak hmun ah an zaam hna, tiah theih a si.
Paletwa peng, Shinletwa ralkap sakhan zong Rakhine ralkap AA nih a luancia December 11 ni ah an rak kah i kaphnih kar fak ngaiin kahdohnak a chuak.A luancia zarh chung ah Paletwa peng chung SAC ralkap nih biapi ngai ah an chiahmi sakhan ṭha ngaimi pahnih Taronai Byuha sakhan le Hnonbu Byuha sakhan cu Rakhine ralkap AA nih an laak. A taang rihmi ralkap sakhan vialte zong laak kan i tim, tiah AA nih an thanh.Credit: The Chin Post