Kyaw Moe Htun Thah A Timtu Hna Cu New York Biaceihzung Nih ‘Sualnak An Tuah’ Tiah Bia An Khiahpiak Hna!
==========
New York khuapi ah a ummi Phyo Hein Thut cu, UN ah Myanmar ram aiawh in rian a ṭuanmi Kyaw Moe Htun thah ding in teltumnak a ngeih ve ruangah ‘sualnak a tuah’ tiin New York thlanglei pengkomh biaceihzung nih bia an khiah, tiah theih a si.
Phyo Hein Thut cu New York khuapi um, Kyaw Moe Htun zung humhimnak latu ding ah a lut i, Kyaw Moe Htun le zung rianṭuantu hna konglam(information) vialte cu Thailand ram um SAC ralkap sinah a pek leng ah, Kyaw Moe Htun rawiphiar nakding ah Thailand ram um SAC ralkap hna siin tangka zong aa lak, tiah July 24 zanlei ah biaceih zung nih an langhter.
Ni 8 chung a sualnak case an kawl hnu ah biaceih zung nih ‘sualnak a tuah ko’ tiin bia an khiah i a ra laimi 2024 March 14 ah biaceihbawi hna nih a dihlak in bia a khiah te lai, tiah theih a si.
U.S Hluttaw nih a sermi upadi ning in ramleng Ambassador pakhat cu rawiphiarnak le dohnak an tuah ahcun a sang bik kum 5 tiang thong thlak khawh a si. Kyaw Moe Htun thah le rawiphiar a timtu New York um kum 28 tluk Phyo Hein Thut le kum 20 tluk Hein Zaw hna cu 2021 August 6 ah FBI nih an rak tlaih hna.
Hi hna pahnih hi Thailand ram um hriamnam lei Agent a simi SAC ralkap hna he pehtlaihnak an ngei i Kyaw Moe Htun that ding in misual zong an hlan hna. Kyaw Moe Htun kan doh lai i a rian in a chuah hlei lo ahcun kan thah lai ti tiang in khua an khang, tiah New York palik nih an thanh.
Kyaw Moe Htun rawiphiar nak ah dollar 4,000 an laak i thah ding a si ahcun misual phu hlan man ah dollar 1,000 chap ṭhan dingin hnatlaknak an ngei, tiah biaceih zung nih an langhter. Kyaw Moe Htun rawiphiarnak case ah aa tel vemi Ye Hein Zaw cu a sualnak amah tein aa phuan caah biaceihzung nih chekhlatnak an tuah dih in U.S ram in chuah ding ah 2022 May thla ah biaceihbawi nih bia an khiahpiak.
Kyaw Moe Htun rawiphiarnak kong ah SAC ralkap zong an i tel tiin mi cheukhat nih an chimceih i, cu kong he pehtlai in RFA nih SAC chimphuannak nawlngeitu Zaw Min Htun cu pehtlaihnak an tuah tawn nain a cohlang lo, tiah RFA nih an langhter.
KNLA Le SAC Ralkap Nili Chung Kahdohnak Ah SAC Ralkap 10 An Thi! KNU kuttang KNLA Brigade 6, Battalion 27 le SAC ralkap nili chung kahdohnak ah SAC ralkap 10 an thi, Captain telh in 11 hliamhma an pu, tiah KNU nih nihin July 24 ah an thanh. Khah Mah Yah 407, 104 SAC ralkap le KNLA ralkap hna cu July 17 in 21 tiang an i kap i SAC ralkap lei in 10 an thi, tiah theih a si.
“Major Aung Myint Thein le Major Naing Win nih an hruaimi SAC ralkap 100 leng cu KNLA Brigade 6, Battalion 27 nih an kah hna. Kahdohnak ah SAC ralkap 10 an thi i, 11 hliamhma an pu. Hliam pu mi chung in 5 hi an hliamhma a faak ngai. KNLA lei in ralkap 4 hliamhma an pu ve i, 1 a nunnak a liam,” tiah KNU nih cun an langhter.
July 18 ah KNLA Brigade 6, Cobra Column 1 le Khah Lah Yah 8, Khah Mah Yah 118 in SAC ralkap hna cu Myawaddy khuapi Letkhat tlang pawng ah kan i kap i, SAC ralkap Captain 1 a thih pinah 5 hliamhma an pu, tiah Cobra Column nih an thanh.
SAC ralkap nih umhmun an khuarnak Letkhat tlang sakhan cu KNLA ṭangṭi phu hna nih July 21 zinglei ah an laak khawh. Cu pinah Letkhat tlang thluan dihlak cu kan laak khawh i SAC ralkap lei in a thimi le aa hliammi an tam. An hriamnam le zen-kuan hna zong kan chuh hna, tiah Cobra Column nih an langhter.
Khampat Kahdohnak Ruangah Khampat Khuami Minung 2000 Hrawng India Ram Lei Ah An Zaam. Sagaing ramṭhen, Tamu pengkomh, Khampat ah nizan July 23 in SAC ralkap le Tamu PDF kar fak ngai in kahdohnak a chuah ruangah tualchung mi 2000 tluk cu India ram lei ah an zaam, tiah tualchung mi nih an chim.
Khampat no.1 sang ah a ummi palik sakhan cu Tamu PDF nih an kah hnu ah kaphnih kar kahdohnak a fak. SAC ralkap nih minung thazaang an chap caah nihin July 24 zong ah kahdohnak a chuak ṭhan, tiah tualchung mi nih an chim. Kahdohnak a chuah ruangah no.1 sang um mi hna le Kanaan khuami minung 2000 hrawng cu India ram lei ah an zaam, tiah tualchung mi pakhat nih RFA ah a chim.
SAC ralkap nih uknak an laak thawk in nihin tiangah tutan Khampat i kahdohnak hi a voi khatnak a si. Nizaan July 23, zaan zongah Khampat khuachung i hriamngan a tlak ruangah kum 23 tluk Chin pa pakhat cu a nunnak a liam, tiah tualchung mi nih an chim.
Online In Thil A Zuar Mi Nih Registration (Licence) Tuah Dih Dingin SAC Nih Nawl An Chuah. Myanmar ramchung ah online in thil a zuartu le chawlehnak a tuahtu hna cu license registration tuah ding in SAC nih nawl an chuah i, an tuah lo ahcun thla 6 in kum 3 tiang thong thlak leng ah phaisa Kyats sing 5 liamter nan si lai, tiah cathanh an chuah.
Online in thil a zuartu hna le chawlehnak a tuahtu hna cu thla 6 chungah registration tuah hrimhrim ding in nawl an chuah i, nawl an zulh lo a si ahcun phung ning bantuk in a tlawmbik thla 6 in kum 3 tiang thong thlak khawh a si pinah Kyats sing 5 liamter an si lai, tiah an langhter.
Online thilzuartu hna nih SAC nawlchuah mi cu an duh lo ngai i, ngunkhuai kholh in phaisa hmuh an duh ruangah a si, tiah an chim. Myanmar ram buai hnu in rian a har chin ruangah online in thil a zuarmi le chawlehnak a tuahmi an karh i, mi tampi nih pawcawmnak ah an hman, tiah theih a si.
Online Thilzuarnak License A Tuah Lomi Kum 3 Tiang Thongthlak Ding in A Thanh. Myanmar ramchung Online in thil zuarnak License a tuah lo mi paoh thong thla 6 in Kum 3 thlak le phaisa Sing 5 (500,000) dantak an si lai tiah SAC nih July 21 ah nawl (order) a chuah.
Cu SAC nih nawl chuahmi chung ah, “Ramchung online thilzuartu le rian dangdang online in a tuanmi vialte License a tuah lo mi paoh cu Ministry of Commerce (Myanmar) upadi pohmah/4 tengnge C bantukin a tlawm bik thong thla 6 in a tam bik thong kum 3 thlak le tangka sing 5 nak tam lo dantak an si lai tiah SAC nih thawngthanhnak a tuah.
‘Register tuahter ding a timi hi license tuah kha a si ko. Online shopping titik ah mah pumpak in thilzuarnak, Facebook in thilzuar mi, mah bantuk tal in pawcawnnak kan kawl caah innchungkhar rawl kan ei khawh. Atu register tuah nak ah tangka pek a hau rih lai, zulhphung/rikhiahmi tampi a ti rih lai, mah bantuk phung le lam an ser mi hi ralhrang pawl an ziachiatnak an langhter mi a si ko’ tiah Yangon khua Online thilzuar Second-Hand phone zuar tu nih a chim.
Hramhram Hneknak le Thinphannak Tangah Raltu Ding Mi ‘Non-CDM’, Phaung Gyi le Zee Pin Gyi Cawnnak. Atu lio khuachung lamtonnak kip ralvennak hmun ah Police le uniform lo in meithal a put mi cu hmuh awk an tam pi cang. Mah hna cu Pyusawhti le Pyituhsit si loin meithal tlaimi SAC saltang Non-CDM Ralkap rual hna an si.
Nai hrawng thawngpang a lengmi cu SAC ralkap nih Non-CDM pawl cu ဗဟိုဝန်ထမ်းတက္ကသိုလ် (Civil Service Academy) training ah, Raldohnak le meithal hmanthiamnak te pawl biatak deuh in an cawnpiak cang hna timi a si. Nihin Non-CDM rual cu hriamtlai in raltu ding tiah thawngthanhnak a tuah nak cu cozah riantuan chung in theih a si. Non-CDM le SAC ralkap pawl nih khuachung lutnak gate, motor -terminal gate, airport check gate, le khuachung mipi umnak hmun paoh ah mingaitu le check gate ah security an tuanter hna tiah theih a si.
Atu Phaung Gyi le Zee Pin Gyi [ဗဟိုဝန်ထမ်းတက္ကသိုလ် (ဖောင်ကြီး)] ah Non-CDM training a kai mi tam deuh cu a hlan bantuk qualified (a za bakmi) cozah riantuan an tlawn cang tiah theih a si.
Myanmar ram hmun tam deuh ah CDM a tuahmi an tam caah mah hna aiawh ah SAC nih an kuttang zung riantuan ding in a kawhauh deuh mi an si caah hruai zia thiam (Management, Administration le Leadership) lei an thiam ti lo caah training petu saya hna he buainak a um lengmang tiah naihniam Non-CDM a tuahmi chungin theih a si.
Nihin Myanmar ram Civil Service Academy ဗဟိုဝန်ထမ်းတက္ကသိုလ် ah Politics lei cawnnak ah NLD, Aung San Su Kyi nih 2020 kum Democracy thimnak phun ning lo in me an tuah, 2028 Contribution bantuk tein SAC nih thimnak thar a tuah than lai i mipi sin uknak a pek than lai tiah Politic an cawn piak hna. Myanmar ram chung ah Civil Service Academy hi hmun 2 ah a um. Phaung Kyi ဗဟိုဝန်ထမ်းတက္ကသိုလ်( Lower Myanmar) le Mandalay peng, Zee Pin Gyi (Upper Myanmar) hna an si.
Lower Myanmar caah Hleiku peng in chaklei meng 18 aa hlatnak, Yangon in meng 50 le Bagu Yoma tlang a hnu lei tlangcung umnak Phaung Kyi khua ah ser mi sianginn a si. Inn an sak mi riantuan vialte umnak inn, Sii-inn, Primary Sianginn, Library, Hall inn pi hmun ah 222.64 acre a kau. Thlaicinnak, training ground le meithal kap cawnnak hmun le a dang lentecelh vialte fonh ah 3000 acre a kau tiah theih a si.
Upper Myanmar caah နိုင်ငံ့ဝန်ထမ်းတက္ကသိုလ် (အထက်မြန်မာပြည်) Mandalay ramthen, Pyin Oo Lwin peng, Zee Pin Gyi khua pawngkam a um. Mandalay in Meng 24 leng aa hlatnak ah a um. Sianginn hmun a kau hi 905.10 acre a si. Zee Pin Gyi i Civil Service Academy sianginn a hmai ah Yatana Cyber city, Chaklei ah Myanmar Police, Police Officer training school, tiin training kai khawhmi hmun tampi an um.
SAC ralhrang nih 2021 kum uknak a lak hnu in Non-CDM pawl cu ဗဟိုဝန်ထမ်းတက္ကသိုလ် Civil Service Academy (Lower Myanmar), Civil Service Academy (Upper Myanmar) hmun ah meithal kah le hriam tlaih thiamnak cu fakpi in cawnpiak nak a tuah. “A hlannak in nihin training ah raltuk thiamnak fak deuh in cawn a si cang. A hlan bantuk management, leadership tbk. hruai thiamnak kong cawn can a tlawm tuk, a herh ahcun hriamtlai in raltu dingin timhlanghnak ngei cio ding tiah” cawnpiaktu hna sin in an chim ton tiah training a kai mi Non-CDM min langhter duh lo sin in theih a si.