Naypyitaw Zung Rianṭuan Vialte Nih Humhimnak Bu Ser Dingin SAC Nih Nawl An Pek
=========
Naypyitaw ah SAC kuttang zung rianṭuan vialte cu ni hnih chung ah rianrang in ralkap bu(တပ်ခွဲ) ser dih dingin SAC nih a thli in nawl an pek hna, tiah Khit Thit Media nih a ṭial. November 15 ah SAC nih zung rianṭuantu vialte sin i nawl an pekmi hna ah Sianghleirun a kai cangmi ram/zung rianṭuantu hna, ralkap a rak tla balmi hna cung ah hrambunh in bu pahnih ser ding, humhimnak le pawngkam i runvennak ca ah a herh ahcun bu pakhat cu khua leng ah chuak in raldoh ding le a dang bu pakhat cu zung chung ah um in zung rian tlolh lo tein ṭuan ding ah nawl an pek hna.
Mahle zung cio in bu pahnih ṭhen in ser ding, cucu mahle zung lutlai hruainak in ser a si lai i November 17 ah a dihlak in cung lei ah kuat le ap dih a si lai, tiah SAC nih a thli thupin nawl an pekmi ah cun aa ṭial.
Nikhat Chung Loikaw Khuapi Ah Tualchung Mi 19 Nunnak A Liam, Ni 4 Chung Ah Minung 39 An Nunnak A Liam! Karenni ramkulh, Loikaw khuapi ah November 14, nikhat chung lawng ah SAC ralhrang nih cunglei kahdohnak, hriamngan le hriamhme in an kahmi ruang ah tualchung mi 19 nunnak a liam, tiah KnHRG nih nihin November 15 ah thawng an thanh. 2023, November 14 ah SAC ralhrang nih cunglei in bomb an thlak caah tualchung mi 14 nunnak a liam i hriamngan an kahmi ruang ah minung 2 le hriamhme an kahmi ruang ah minung 3, an dihlak fonh minung 19 nunnak a liam, tiah an langhter.
Nunnak liammi hna cu ngakchia 3 telh in pa 12 le nu 7 hna an si. November 11 lio zong ah Karenni ramkulh, Loikaw, Karrenni ramkulh le Shan ramkulh ramri um Hpekon le Moebye khuapi hna ah tualchung mi 20 an nunnak a liam, tiah KnHRG nih November 14 ah an rak langhter. Karenni ramkulh chung ah “11.11 Operation” kahdohnak an thok ni November 11 in 14 tiang ah tualchung mi 39 an nunnak a liam cang, tiah an langhter chih.
Pale Khuapi Um SAC Ralhrang Sakhan Le Penguk Zung Luhhnawh In An Kah 7 An Thi. Sagaing ramṭhen, Pale khuapi um SAC ralhrang sakhan le penguk zung cu mipi ralkap nih luhhnawh in an kah i SAC 7 an thi, tiah Pakokku peng battalion 14 in ṭuanvo ngeitu pakhat nih Yangon Khit Thit ah a chim.
November 15, zing suimilam 7:15 tluk in Pale khuapi um SAC ralhrang nih umhmun an khuarnak pengukzung le sakhan cu mipi ralkap nih zanlei suimilam 1:45 tluk tiang an kah, tiah theih a si.
Mipi ralkap cu khuapi luhnak pawngah hmunhma la in sakhan le penguk zung cu laak ding in an kah nain Salingyi peng, Kyar Tet khua ah ummi SAC ralhrang thazaang 60 tluk nih an bawmhchanh hna caah mipi ralkap hna hnulei an pil ṭhan, tiah an langhter.
Sakhan kahdohnak ah ralhrang 7 an thi i penguk zung umhmun khuarmi SAC kahdohnak ah a thimi a num le um lo hlathlainak kan tuah lio. Mipi ralkap lei in nunnak liammi le hliamhma tuarmi kan um hraw lo, tiah an langhter chih. Kahdohnak ah aa telmi ṭangṭi phufonh hna cu Pakokku peng battalion 14,15, Yinmarbin peng battalion 11, Pakokku peng battalion 17 ṭetkhuai 2 le Yinmarbin peng PCL (LDF) hna an si, tiah an langhter chih.
Kokang Ah MNDAA Nih Ralkap Sakhaan Pawl An Lak Chap Thluahmah, Sakhaan 147 Leng An Lak Cang. MNDAA telh in dothlennak phu pawl nih Shan ram chaklei, Kokang hmunhma ah ralkap sakhaan pawl an lak thluahmah i November 15 kahdohnak chung ah ralkap 20 reng lo an thi tiah MNDAA lei nih thawng an thanh.
November 1 ah Kokang Shin-phin-kai, Shan-phon-shwe, Maw-hteik sai-kyauk-shan le Maw-hteik-talin tlang ah a um mi ralkap sakhaan ah kahdohnak an tuah i sakhaan ngan/hme tiah a zapi 147 leng an lak khawh cang. November 16 zinglei zong ah Shin-phin-kai, Shan-phon-shwe ah a um mi ralkap sakhaan an kah i tlamtling tein an lak khawh tiah theih a si.
Cun November 15 zinglei zong ah Maw-hteik-sai-kyauk-shan sakhaan cu an lak khawh ṭhan i Maw-hteik-talin-ke Byuha sakhaan zong an lak khawh. November 14 le 13 zong ah MNDAA nih Kokang hmunhma ah a um mi ralkap sakhaan 2 an lak chap leng ah kahdohnak lei ah bawmhnak pek ding in a ra mi ralkap pawl lampi in an rak bawh hna i an kah hna caah a thi mi le hliamhma a tuar mi 50 leng an um tiah an thanh.
Hia-shi-pan ah hmunhma an khuarnak ralkap sakhaan cu an lak hmasa hnu chun ah Hung-ai hmunhma, Shan-kanlin hmaitonh ah a um mi Maw-hteik-lauk-pan-chan ralkap sakhaan zong an va kah i an lak tiah theih a si. Kahdohnak pawl chung in Bom lung 260, Grenade lung 154, meithal bom 101, RPG kuan 35, meithal zuun 6, kuanbawm 25, kuan 10,500, Machine Gun a ngan mi 2, Launcher 4, Machine Gun a hme mi 1 le walkie talkie 5 hna an lak khawh.
Kyaikmaraw, Chaunghnitkhwa Hmunram Ralhrang Palik Sakhan Le Bridge Check Gate Sakhan Ni 6 Chung An Kah Ralbawi Major 2, Ralbawi Bo Hnih 2 Le Ralkap 22 An Thi, 28 Hriamnam Chia In An I Pe. November 10, in 15 tiang ni 6 chung Mon ramkulh, Kyaikmaraw peng, Chaunghnitkhwa khua hmunram SAC ralhrang palik sakhan le Bridge check-gate sakhan kahnak ah rakbawi major 2, ralbawi bo hnih 2 le ralhrang 22 an thi, 28 hriamnam chia in an i pe tiah, mipi ralkap chungin ṭuanvo ngeitu pakhat nih Yangon Khit Thit Media ah a chim.
November 10, khan Mon ramkulh, Kyaikmaraw peng, Chaunghnitkhwa hmunram SAC ralhrang palik sakhan le Bridge check-gate sakhan cu KNLA, Special Operations Forces S.OF le phufonh dang dang drone hriamtlaiphu hna timhlamhnak naak in November 11, zaan suimilam 12:00 tluk khan ralhrang sakhan 2 an kah 3 an thi, 7 hliam an tuar ralthuam zeimawzat an lak, tiah theih a si.
Cu bantuk ṭhiam in November 12, zing suimilam 8:30 tluk khan Hpayarkone hmunram ah a ummi SAC ralhrang thazaang 54 tluk cu KNLA, PDF phufonh nih an kah hna ralbawi 2 an thi, tiah an langhter.
Cu pinah November 13, zaanlei suimilam 1:45 tluk khan Fetheygone khua, Hpayarkone hmunram ah kahdohnak fak a chuak ṭhan ralbawi 2 telhchih in 14 an thi, 28 hriamnam chia in an i pe, 12 anzaam, tiah theih a si.
November 15, khan a zaammi SAC ralhrang an cu kham in an kah ṭhan hna 5 an thi, ralthuam zeimawzat an lak, ni 6 chung kahdohnak ah ralhrang 22 an thi, 28 hriamnam chia in an i pe, mipi ralkap 3 nih ram le miphun caah an nunnak an pek tiah theih chih a si.