Naypyitaw Council, Pyinmana Peng, Bomatandaung Sakhaan Laknak Muicawl An Thlah! (+Video)
==========
Naypyitaw Council, Pyinmana peng, SAC ralkap i Bomatandaung sakhaan cu Kya-tanl-ung Column nih an kah hna i sakhaan an laknak muicawl zong an langhter chih. SAC ralkap Bomatandaung sakhaan cu August 10 ah an kah i an lak hnu ah ralbawi nih an i tlaih mi Pistol zuun 1 telh in hriam le kuanzen phun 13 an lak khawh leng ah SAC ralbawi 1 telh in ralkap 16 an rak thi. Ralkap 2 zong an rak zaam i an luat tiah an thanh.
Sakhaan lak kahdohnak chung ah PKS-PDF 1004 Battalion in hriamtlai 3 an nunnak a liam i 4 fak ngai in an i hliam. Bomatandaung sakhaan la kho ṭhan ding in SAC nih August 11 in August 14 tiang ralkap a thlah lengmang i Kyatanlung phu nih voi 6 tiag an kah hna, bomrap an puah hnawh hna i SAC ralkap tampi an thi tiah theih a si.
Shwegu Peng Ah Kahdohnak Voi 3 A Chuak, Ralkap 9 An Thi. Kachin ram, Shwegu peng ah SAC ralkap le Myohla PDF hna karlak ah kahdohnak voi 3 a chuak i ralkap 9 an thi tiah Myohla PDF nih an thawng an thanh. September 20 ah Shwegu tilawng dinhnak in SAC ralkap riahcaw a phor mi tilawng 6 cu Banmaw lei an kai lio ah himnak lak piak ding in SAC ralkap Brigade 88 kuttang LIB 121, LIB 10, LIB 77 hna nih Tinbawin khua ah hmunhma an khuar.
Cu ni zaanlei ah ralkap riahcaw phor tilawng pawl himnak caah tilawng 2 in LIB 10 le LIB 77 in thazang 46 hrawng SAC ralkap cu Sindat khua lei ah an ṭum, LIB 121 in thazang 67 hrawng tilawng 1 cu Tinbawin khua in Naungmo lei an kai lio ah Myohla K-PDF nih an kah hna i kahdohnak aa thawk hi a si. Kahdohnak chung ah SAC ralkap tilawng pawl ṭha tein an khen hna caah tilawng pakhat a pil i a thi mi ralkap, hriam le hliam a tuar mi pawl kha ti chung in an chanh hna.
September 21 zinglei sml 7:20am ah Irrawaddy tiva kam ah a rak phan mi SAC ralkap LIB 121 Battalion le Myohla PDF hna karlak ah kahdohnak a chuak ṭhan i ralkap 9 an thi, Platoon Leader telh in ralkap 11 an i hliam. Cu ni zinglei sml 8:40am ah LIB 121 le Myohla PDF hna karlak ah a voi 3 nak kahdohnak a chuak i hliam a tuar mi ralkap pawl kha phungki sianginn ah an kalpi hna tiah theih a si.
SAC Ralkap Nih Sualnak Ngei Lo Mipi 4,120 Leng An Thah Cang Hna. Myanmar ram ah hramhram in uknak lak a si hnu kum 2 le cheu leng caan chung ah SAC ralkap nih sualnak ngei lo minung 4,120 leng an thah cang hna i a tlaih/hren mi minung 24,844 tiang an um cang tiah Assistance Association for Political Prisoners (AAPP) nih a thanh.
Atu cazin hi 2021 February 1 in 2023 September 26 tiang AAPP nih a khawmhsuat mi a si i khawmhsuat khawh mi leng ah a thi mi an tampi rih lai tiah a langhter. Pau Dothlennak chung, tuni tiang ah minung 19,272 an tlaih/hren cang hna i cu chung ah minung 7,374 cu thongthlak ding in biakhiah an si.
Dothlennak he pehtlai in an tlaih/hren hna i thah ding tiah biakhiah a tong mi 107 an um i hriawh in thah ding tiah biakkhiah a si mi 43 telh in minung 119 cu hriawh in thah ding tiah biakhiah an si caah thah ding tiah biakhiah a si mi an zapi te 150 an um cang. Atutiang ah biakamnak he an thlah ṭhan cang mi hna 5,572 an um tiah a langhter.
SAC Ralkap Sakhaan 60 Leng KNU Phufonh Nih An Lak. Hramhram in uknak lak a si hnu thawk in 2023 July thla tiang Myanmar ram nichuah thlanglei hmunhma ah SAC ralkap nih an sakhaan 62 tiang an sungh cang leng ah KNU le a hawikom phu pawl nih hmunhma tampi an tlaih khawh tiah Karen Peace Support Networks (KPSN) nih September 26 ah report a chuah.
Kahdohnak le uknak lei a sung thluahmah mi SAC ralkap pawl cu KNLA telh in a hawikom phu pawl nih kahdohnak ruang ah sakhaan 24 tiang an lak khawh i an zaamtak mi sakhaan 38 a um cang. SAC nih hramhram in uknak a lak hnu 2021 February thawk in Myanmar ram nichuah thlanglei ah SAC pennak a zor tuk kha hmuh khawh a si tiah KPSN nih an langhter.
SAC ralkap nih a ṭhawnter chin mi hriamngan le vanlei kahdohnak ruang ah Kawthoolei hmunhma ah ralzaam 630,000 leng an um bantuk in atu cazin hi 2023 January in rel kan thawk ahcun ralzaam hi 18% an karh tiah KPSN nih a ṭial. Hramhram in uknak lak a si hnu ah SAC ralkap nih vanlei kahdohnak le hriamngan kahdohnak ruang ah mipi 130 deng an nunnak a liam bantuk in aa hliam mi 480 leng an um.
Cun ralzaam cazin hi 637, 414 an phan i atu thla February in rel kan thawk a si ahcun 18% a kai caah minung pakhat nih thla 6 ca a herh mi tuak in an eidin harnak thla 12 caah a herh mi hi a tlawmbik USD $ 42 Million a si i nifatin eidin leng ah innlo, sii, sianginn lei bawmhnak leng ah hngakchia le nu pawl caah adang tein bawmhnak a herh rih tiah KPSN nih report an thanh. Credit: The Chinland Post
https://fb.watch/nk9qHbqWcR/