Naypyidaw Thonginn In Thongtla Pa 7 An Zaam
=========
Naypyidaw, Tatkone peng Kinthar khua ah a ummi Kinthar 2 sakhan in thongtla pa 7 cu October 17 zanlei ah an zaam, tiah Naypyidaw ummi nih BBC ah an chim. A zaammi thongtla 7 hna hi pa lawngte an si i mi thahnak case in kum saupi thong thlak mi an si pinah rithaisii case le nu tlaihhremnak case in thong a tlami an i tel, tiah Ministry of Interior he naihniam in a ummi hna nih an chim.
Thongtla a zaammi hna hi kum 2-6 tiang thong a tla rih ding an si. Kinthar 2 sakhan hi kum saupi thong thlak le rianhrang ṭuanter in thong a tlami a za leng an umnak a si, tiah theih a si.
SAC nih nawlngeihnak an laak hnu ah thonginn chung in thongtla pawl atu le atu an zaam i Yamithin thonginn le Taungngu thonginn in thongtla a zaammi an rak um cang.
Yesagyo Peng Tualchung Mipi Thilri Fir Piaktu SAC Ralhrang Bomb In An Puahhnawh Hna 5 An Thi. Magway ramṭhen, Yesagyo peng Nyaungzauk khua le Mekone khua karlak ah tualchung mipi thilri fir in cawleng he a rak chuak mi SAC ralhrang cu mipi hriamtlaiphu nih bomb an puahhnawh hna caah 5 an thi tiah Yesagyo Pah Kah Phah chungin ṭuanvo ngeitu pakhat nih Yangon Khit Thit ah a chim.
October 17, zaanlei suimilam 3:30 tluk khan Yesagyo Peng Nyaungzauk khua tualchung mipi thilri fir in cawleng pakhat he a rak chuakmi SAC ralhrang thazaang 7 tluk cu Mekone khua pawngah mipi hjriamtlaiphu nih bomb an puahhnawh hna caah 5 an thi 2 cu Cawleng he an zaam tiah theih asi.
Cawleng pakhat he tulchung mipi thilri fir in a rak phurtu SAC ralhrang minung 7 lak ah 5 cu a hmunhma ah an thi 2 cu Cawleng he anzaam. Tlawmpal a rauh hnu ah Mekone khua in SAC ralhrang nih hriamngan an rak kah tiah mipi hriamtlaiphu chungin ṭuanvo ngeitu pakhat nih a chim. Kahdohnak ah aa telmi mipi hriamtlai ṭangṭi phufonh hna cu, Yesagyo peng PAKAF-PDF Pah Kah Phah le Spring Soldier YSO – Water Lake Region Column hna ansi tiah an langhter.
SAC Ralkap Nih Yelaekyun Ah A Ummi Spring Kantkaw Charity Sakhan Chung Sii-ai An Khangh Dih. Magway ramṭhen, Yesagyo peng Yelaekyun ah rallam a sialmi SAC ralkap nih Spring Kantkaw Charity siikhan sii-ai cu an khangh dih hna, tiah tualchung media hna nih an thanh. October 15 ah Yesagyo peng, Yelaekyun hmunram ah rallam a sialmi SAC ralkap nih siikhan chung sii-ai an khangh dih, tiah siikhan ṭuanvo ngei pakhat nih a chim.
“An khanghmi sii-ai dihlak man hi fiang in hngalh a si lo, sii-ai duhning hmanh in kan i pek khawh lo lioah atu bantukin an khangh cu lung a fak ngai, sinain hi sii-ai khanghpiak kan ton ruang ah hin kan lung a dong hrimhrim lo, lungṭhul lo in mipi ca ah pehzulh in kan dir ko lai,” tiah Spring Kantkaw siikhan in ṭuanvo ngei pakhat nih cun a chim. SAC ralkap pawl cu October 12 thawk in Yesagyo hmunram ah rallam sial in tualchung mi nu pakhat an thah i khuate cheukhat inn zong an khanghpiak hna, tiah theih a si.
KIA Brigade 9 Ananhpa Khua Le Kanhsee Khua SAC Ralhrang Nih Vanlawng In Bomb A Thlak; KIA Officer 2 An Thi! Kachin ramkulh, Hpakant peng, KIA brigade 9 hmunram Anahpa khua le chawdawr, Kanhsee khua hna cu 2023, October 16 zanlei 4:30 in 5:30 tluk tiang SAC ralhrang nih raltuknak vanlawng hna hmang in bomb a thlak caah KIA officer 2 an nunnak a liam, tiah KIA thawngzamhnak nih nihin October 18 ah a chim.
“SAC ralhrang raltuknak vanlawng 2 cu voi 2 tiang a ra i bomb lung 8 a thlak. Cu lio ah Kanhsee khua um SAC ralhrang sakhan pi in hriamngan an kah chih caah Kachin Independence Army(KIA) officer 2 an nunnak a liam i KIA ralkap in a dang officer 1 zong hliamhma faak ngai a tuar” tiah KIA thawngzamhnak nihcun a chim. SAC ralhrang nih atu bantuk in bomb a thlak mi ruang ah mipi cheukhat zong hliamhma an tuar i nunnak liammi KIA officer 2 hna cu October 17 ah an ruak an vui hna, tiah a chim chap.