Naypitaw Phanhnak Lam A Nai Cang Maw?
=========
2023 September 7 cu National Unity Government (NUG) lei nih pumpak runven in ralhrang doh ding cathanh a chuahnak kum 2 a tlin ni a si. Nihin ah NUG Ministry of Defense lei in hmunkip in dohthlennak bu thazang a ṭhawng thluahmah ko tiah a chim.
2021 kum September 7 lio ah NUG nih cathanh a rak chuah mi cu- September (7) thawk in mipi ralhrang dohnak cu thawk a si cang. Mipi le ralhrang i dohnak a si bantuk in rampumpi ah a um mi ralhrang hna cu nanmah le nan umnak hmun cio in tlu le thal lak in rak doh cio uh. PDF ralkap vialte hna nanmah le nan umnak hmun cio in ralhrang dirkamhtu le hunhaktu vialte hna cu rak tlai dih cang uh.
Ralhrang nih rian khinh mi khuabawi le uknak dang dang ah rian khinh mi vialte nan rian chuahtak dih cang uh. PDF ralkap hna, mipi nunnak le thilri hna hunhak kilveng piak hna uh law a cunglei in order pek mi hna kha ttha tein zulh khawh I zuam cio uh. PDF nih zulhding in a chuah mi zulhphung hna cu dik le fel tein zulhkhawh I zuam cio uh. Mipi humhimnak lei in ṭtuanvo ngeihtu hna zong nih nanmah umnak khua le ram hmun le hma cio in timlamhnak runvennak tuanvo rak lak cio hram uh.
Mipi zong nih nihin thawk in a herh lo in khualtlawn siseh, mah le pumpak hunhimnak caah ralring tein um cio uhlaw nan caah a herh mi ti le rawl, si le ai I chaih cia uh law, PDF ralkap hna le PDF he bawm in ral a doh ṭi mi ralkap hna kha nanmah le ti khawh tawk in rak bawm cio hram uh. Ralhrang ralkap an cawlcangnak kong thawnpang kha PDF sin ah rak pek cio hram uh.
Tlangcung hriamtlai dang vialte hna zong nih a lamkip in ralhrang cu rak doh cio hram uh law nanmah le nan pentlang cio kha lak dih khawh le uk khawh rak I zuam cio uh. Ralhrang uknak ai ah, mipi uknak canter I zuam cio uh law mipi duhnak in sermi uknak ah serkhawh i zuam cio uh. Ralhrang he aa kom mi (BGF- ramri hngak ralkap)hna mipi he ik komh in ralhrang tu kha rak doh cio cang uh.
Nihin kan raldohnak hi a dik mi le phungning in raldohmi a si i, chansau a ngu mi ramsersiamnak le Federal uknak sernak caah doh lo awk a tha lo mi raldohnak a si. Kan ram dohtlennak nih a herh ning in rian kan ṭuan mi a si caah kan pawngkam ra mi hna le ASEAN ram hna le UN ram vialte hna le vawlei ram lian hna zong nih nan kan theihthiam lai ti mi zumhnak kan ngei fawn.
Mipi raldohnak cu thawk a si cang bantuk in Min Aung Hlaing hlennak le namhnehnak tang ah rian a ṭuan mi ralkap vialte hna, palek vialte hna, cozah rian a ṭuan mi vialte hna PDF he a rannak in fonh khawh i zuam cang uh law PDF sin ah siseh, NUG sin ah siseh a rannak in pehtlainak kan tuah uh law thawng kan thanh cio uh. Nihin thawk in SAC ralhrang kutang zungrian ṭuantu vialte hna zung kai ti lo ding in ralrin kan in pek hna.
Nihin kan raldohnak ah nunnak a pe mi, inn le lo a sung mi, nunnak a sung mi hna cu a zungzal in ram pumpi caah nunnak a pe mi nu ralṭha le pa ralṭha ah cohlan nan si lai. Hi mipi dohnak hi khuate in siseh, khuapi in siseh ram pumpi huap in siseh voikhat ah kan ral cu kan doh ṭi lai.
Mipi lungrualnak, fimthiamnak, mipi hngalhthiamnak le lungṭhawnnak in raldo ding kan si caah kan raldohnak caan hi tawite lawng si lai. Hramhram in uknak a latu ralhrang Min Aung Hlaing uknak a si mi, tlaihrem uknak cu a hram in phawih a si lai i, tlangcungmi vialte kan rak tumtah zungzal mi tlukruannak tling le zalonnak tling a si mi Federal Democracy ram kan ser lai i, Myanmar ram cu vawlei cung ram vialte hna hmai ah hmai atlang ṭhan mi ram dawh ser than a si cang lai. Teinak kan hmuh hrimhrim lai tiah cathanh a rak chuah.
“LAMKIP IN NAYPITAW AH “Lamkip in Naypitaw ah” timi Operation pi cu NUG Defence Minister U Ye Mon nih thawngthanhnak a tuah hnu cun, Naypitaw pawngkam ah kahdohnak a um colh. Ralhrang Deadquarters Naypitaw cu atu bantuk in mipi ralkap lei nih timh ciamman tein kahdohnak caah Region Command bu zong dirh a hun si. Battalion 801 in 806 tiang Battalion 6, Pah-kah-phah bu, Tandaung chaklei special bu le ṭangrual phu nih an kah hna.
Naypitaw chung um Battalion hna hriamngan hmannak caah fund hmunkip an kawl cang. Mipi ralkap lei nih hriamngan cu chim lo hriamhme meithal in an kah mi hmanh an celh ti lo, harnak an tong ngai cang. Mipi ralkap nih an herh mi kuan/zen hriamnam dongcat lo tein thazang an ngeih khawh peng ahcun ralhrang sakhaan pawl pakhat hnu pakhat in an lak khhawh thluahmah ko lai.
Burma ram (U Nu-Ne Win) chan lio ramchung buainak a thawh lio ah ramri a um mi Burma Communist Party Headquarters Pangsai (Pangkham), Karen National Union Headquarters hlun Manerplaw, Kachin Independent Organization hlun Pajau tiang kawl cozah nih kah in hnahnawhnak an rak pek khawh. Khuapau dohthlennak ahcun Myanmar ram ah ral an tho bal lo mi Myanmar hmunlai bik khua hna nih atu cu Naypitaw peng chung ah mipi ralkap le ṭangrual phu hna nih hnahnawhnak pek in um thiam lo in an kah cang hna.
Mipi ralkap hriamngan hmang kho dirhmun a hun phanh tik cun SAC Northwestern Command umnak Monywa ah kahdohnak a um peng bantuk in Naypitaw zong ah kahdohnak a hun um peng cang lai. Mah hi, “Lamkip in Naypitaw Ah “ ti mi Operation pi a muisam a vun lang thluahmah ko cang lai.
Demoso Peng Sakhaan Lak Kahdohnak Ah KNDF Hriamtlai 5 An Nunnak A Liam. Demoso peng, Thaesulay le Pupha sakhaan lak kahdohnak chung ah KNDF hriamtlai 5 an nunnak a liam tiah KNDF Battalion pawl nih thawng an thanh.
A nunnak a liam mi hriamtlai pawl hi KNDF B06 in Leone, Khun Baw Sa Ko, Shay le B05 in Soe Ye @ Soe Pay le Myat Min Thu hna an si. Cu Thaesulay le Pupha sakhaan kahdohnak ah SAC lei ralbawi telh in 30 leng an thi tiah KNDF nih a thanh. SAC ralkap nih Loikaw in kahdoh a cannak Demoso peng lei ah nifatin in thazang a chap lengmang tiah KNDF nih theihternak an tuah.
Mingin Khua Luhnak Ah Hmunhma A Khuar Mi Pyusawthi Pawl An Kah Hna, 2 An Thi I Hriam Zuun 1 le Kuanzen Pawl An Lak Khawh. Sagaing ramṭhen, Mingin peng, Mingin khua luhnak, EPC zung ah hmunhma a khuar mi pyusawthi sakhaan an kah hna i SAC kuttang pyusawthi 2 an thi, Carbine zuun 1 le kuanzen pawl an lak khawh tiah Student’s Revolution Force – SRF nih thawng an thanh.
September 5 chun sml 12:00pm hrawng ah Mingin khua luhnak, EPC zung ah hmunhma a khuar mi pyusawthi sakhaan cu dothlennak phu pawl nih an va kah hna i pyusawthi 1 an thi. Kahdohnak chung in Carbine M2 zuun 1, 5.56 kuan 326, Point 30 kuan 339, MA kuanbawm 5, bom 1, tangka 654,900 le cycle 4 hna an lak khawh tiah theih a si. Kahdohnak chung ah SRF, Tinghlwamindaung, Mingin PDF, WOLF Fighter, LDF hna an i bawm tiah theih a si. Credit: The Chinland Post