Naypitaw Ayelar Air Force Camp Cu Mawng Tu Ngei Lo Vanlawng In Mipi Ralkap Nih Bomb An Thlak!
=========
Naypitaw hmun, Ayelar peng SAC vanlawng camp cu September 15 chun sml 1:00pm ah mawng tu um lo vanlawng hme nih bomb voi 2 an thlak tiah theih a si. “Bomb thlak lio ah Ayelar camp chung Hasaki pahnih le minung kan hmuh hna” tiah Mipi ralkap nih an chim tiah Mizzima nih a ṭial.
“Raldohnak vanlawng le ralkap hman mi vanlawng a umnak hmun ah bomb a puah ko caah a puahhnawh mi kong belte theih fiang a si rih lo” tiah Mipi ralkap lei nih an chim. Zaanlei suimilam 1:00pm ah voikhat, zanlei sml 4:10pm ah voikhat tiah voihnih mei an hmih tiah Alar vanlawng camp pawng a um mi sin in theih a si.
SAC van ralkap lei nih Jammer (seh thilri lei pehtlai kho lo ding in hman mi) ṭha tein an chiah caah timhnak hmun khen hi a fawi lo. Sihmahsehlaw hman mi thilri phun le a rianṭanning nih a ngeih ve. Jammer nih a tlaih khawh lo nak a sannak in bomb thlak a si ahcun chim khawh a si lo tiah mah Alar camp ah ralkap a ṭuan bal mi nih Mizzima sin ah a chim.
Ayelar air force camp hi SAC lei a biapi ngai mi van ralkap a umnak camp a pakhat a si i, a pawngkam ah Naypitaw International Airport, vanral vennak battalion, LIB 302 ralkap pawl an um tiah theih a si.
SAC Nih Hngakchia A Tlawmbik 456 A Thah Cang Hna I 664 A Tlaih Cang Hna. SAC nih hramhram in uknak a lak hnu 2021 February 1 thawk in 2023 September 15 tiang ah kum 18 tang hngakchia 456 an thah cang hna i, hngakchia 664 an tlaih cang hna tiah Assistance Association for Political Prisoners (AAPP) cazin nih a langhter.
NUG le a hawikom tlangcung hriamtlai phu pawl nih an tlaihnak hmunhma pawl ah raltuk lio ah buarmi sualnak (war cime) pawl kha sual phawtnak, Warrant chuahnak, tlaihhrennak, tlaih hnu ah phungning tein sual internak hna kan tuah lai tiah a thanh. Hramhram in mi an thahnak kong he pehtlai in rian ngeitu pawl, mi thahnak he pehtlaihnak a ngei mi pawl vialte nih sualphawtnak an in ṭhan khawh nakhnga a rannak in kan tawlrel khawh nak hnga kan i zuam tiah theihternak a tuah.
SAC ralhrang nih 2023 September 11 tiang ramchung ah sualnak ngei lo mipi 4,078 leng an thah cang hna. Myanmar ram ah hramhram in uknak lak a si hnu kum 2 leng chung ah SAC ralkap nih sualnak ngei lo mipi 4,078 a thah cang hna i a tlaih a tong mi minung 247,777 tiang an um cang tiah Assistance Association for Political Prisoners (AAPP) nih a thanh.
Atu cazin hi 2021 February 1 in 2023 September 15 tiang AAPP nih a khawmhsuat mi a si i khawmhsuat khawh mi leng ah a thi mi an tampi rih lai tiah a langhter. KhuaPau dothlennak chung, tuni tiang ah minung 19,465 an tlaih/hrem in biahal an tong cang hna i cu chung ah minung 7,323 cu thongthlak ding in biakhiah an si.
Kawkareik Peng SAC Yetasoih Sakhan Cu KNLA Tang`i Phu Nih An Lak Hriamnan Tampi An Lak Chih. Karen ramkulh, KNU humhaknak hmun ram chung Kawkareik peng, Myanmar-Thailand ramri SAC ralhrang Yetasoih sakhaan pakhat cu Karen National Liberation Army (KNLA) le ṭangṭi phu hna nih an lak tiah KNU Dooplaya District nih a chim tiah Delta News Agency nih a ṭial.
September 14 zinglei suimilam 8:00am in kahhram thawk a si i suimilam 8:2am ah ralhrang an sakhaan ning pi in an lak. Ralhrang sakhaan laknak ah meithal zuun 12, kuan 36,000, meithal lakmi ah, Ma-1 zuun 1, MA-2 zuun 2, RPG-7 zuun 1, 60mm zuun 2, Pistol zuun 2, Machine Gun zuun 1 , Bomb le kuan a thong reng lo an lak chih tiah kan theih.
Mah kahdohnak ah SAC ralhrang 9 an thi i a tang mi ralhrang pawl cu an tli/ zaam dih. KNLA ralkap le ṭangṭi phu lei in minung 3 hliam an tuar i pakhat a nunnak a liam tiah Dooplaya District nih a langhter.
TNLA le SAC Ralkap Karlak Ah Kahdohnak A Fak. Ta’ang National Liberation Army (TNLA) le SAC ralkap karlak, September 18 zaanlei ah Shan ram chaklei Muse le Mandalay ramṭhen Mogok peng hna ah kahdohnak a fak tiah TNLA nih a thanh.
TNLA le SAC ralkap hna cu Mogok peng, Oknyaungkone khua pawng ah sml 2 chung kahdohnak a chuak i Muse peng, Hupaw khua pawng zong ah SAC kuttang pyithusit le SAC ralkap phufonh le TNLA karlak ah sml 1 leng kahdohnak a chuak.