Namhsan Khua Kahdohnak Ah Ralkap Lei Hriam Zunn 7 An Lak Khawh Tiah TNLA Nih An Thanh
==========
Shan ram chaklei, Namhsan khua, December 13 ah kahdohnak a chuak i ralkap lei hriam zuun 7 kan lak khawh tiah TNLA nih an thanh.Namhsan khua, Mankhaih sang le Phayargyi tlang ah kahdohnak a chuah hi a si. Ralkap lei a thi mi zat an langhter lo nain an meithal zuun 7 le kuanzen kan lak khawh tiah an langhter.
TNLA nih December 13 zaanlei ah Namhsan khua ah a um mi ralkap Shwe-pyi-oo lakphak tuahnak sehzung sakhaan cu an lak khawh.Cu hlan ah, Nanmhsan palek sakhaan telh in Namhsan peng chung ah a um mi ralkap sakhaan 3 nak tlawm lo zong TNLA nih an lak cang.Cun Kyaukme peng, Lwaikhaw khuapawng ah a rak lut mi ralkap pawl he zong kahdohnak a chuak tiah an langhter.
Sagaing le Magway Ah Ralkap Kuttang Cozah Rianṭuan 1,000 Deng CDM An Tuah.Sagaing le Magway ramṭhen ah NUG sin ah CDM a tuah mi ralkap kuttang cozah rianṭuantu 890 an phan cang tiah NUG zung lei chimphuannak nawl a ngeitu U Nay Bung Lat nih December 14 ah RFA ah a chim.
Sagaing ramṭhen Kawlin, Wantu, Htichaik, Katha, Indaw, Kyunhla, Monywa, Budalin, Minmu, Myaung, Taze khua hna in minung 558 nih CDM an tuah hi a si i Magway ramṭhen Tilin khua in minung 332 nih CDM an tuah tiah U Nay Bung Lat nih a chim.NUG sin ah CDM a tuah mi minung 1,000 deng hi ralkap kuttang zung kip in an si hna i hriam a tlai mi palek le ralkap an i tel lo tiah a chim.
CDM a rak tuah mi chung in ralkap nih nuhrin covo a buarnak ah aa tel mi cozah rianṭuantu le bawi ngan pawl cu phungning tein dantat an si lai tiah a chim.
Hramhram In Uknak Lak A Si Hnu Ah Mipi Inn 80,000 Deng An Khangh Cang. Ralkap Council le a kuttang phu pawl nih 2023 November 30 tiang mipi inn 77,274 an khangh cang tiah Data for Myanmar nih December 13 ah a thanh.2023 January thla thawk in mipi inn an khangh mi hi a zor ngaingai tiah an langhter.
Data for Myanmar cazin ning ah 2021 February 1 thawk in 2023 July 31 tiang kahdoh a fahnak Sagaing ramṭhen lawng ah mipi inn 57,503 an khangh cang tiah an langhter.
2023 thawk in mipi inn an khangh mi a zor ngaingai nak hi ralkap lei kahdohnak chung ah an sungh thluahmah caah a si tiah Sagaing ramṭhen Wetlet peng PDF ṭuanvo ngeitu nih a chim tiah RFA nih a langhter.
Ralkap phu nih hramhram in uknak an lak hnu 2021 February 1 in 2023 July 31 tiang ralkap le a kuttang phu hna nih mipi inn 77,874 an khangh cang tiah Data for Myanmar nih August 9 ah a thanh.Cucaah Data for Myanmar cazin ning ah 2023 July 31 in November 30 tiang, thla 4 chung ah mipi inn 2,400 an khangh chap kha hmuh khawh a si.Credit: The Chinland Post