Nai hrawng Chin hriamtlai ciocio ikahnak tete a hung um pah lengmang!
==========
Nai hrawng Chin hriamtlai ciocio ikahnak tete a hung um pah lengmang. Hihi zoh in Chinmi kan lung a rual lo ti khawh a si. Nain Pre- Panglong hlan nakin kan irual deuh thiam. Mirang kai hlan le Pre-Panglong hlan kum zeimawzat tiang cu a khua hmanh in rak idoh le rak ithah a si cumu.
Khat lei ah CNF ralchanh in hriamtlai phu tete aa kommi zong an um. A bikin CNO, CNDF le CDF-Mindat an si. Nain khi hna pawl khi hriam an tlaih hlan hrim in CNF a rak do cia an si kha philh lo ding. CNF dohdalh tu thar an silo. Hriam an tlaih hlan hrim in CNF a rak dotu a si zungzal mi an si. Hriam an tlaih zong hi SAC doh nakin CNF doh hi a hmuitinh a si deuh. Khat lei ah CNF dirpitu zong an karh thluahmah ko. Zei ruangah CNF dirpitu an karh cuahmah kan ti khawh?
Hualngo, Siyin, Zanniat, Tonzang – Zo+Thodo (Zomi a silomi pawl tinak), Mindat cheukhat, Asho le Rakhine Chin hna hi kha hlan ah CNF an do lemlo nain tha petu an rak si lem lo. Nain 2021 dohthlennak a chuah hnu in CNF dirpitu a thar aa chap mi an si. Min langter lo paoh hi cu kha hlan tein CNF dirpitu an rak si cang. Mara belte hi CDF-Mara le MDF tiah an kuai hnu in CNF tha petu zeimawzat cu MDF lei ah an imer ve.
Kha hlan i CNF thapetu le a thar a chapmi CNF dirpitu hna i an pengtlang hriamtlai hna le CNF/MP hna nih Chinland Council cu ser a si. Hi hna hi Geo politics zongin siseh mipi tlawmtam zongin siseh Chinram i 80% hrawng ai humhakmi an si. A zaatuk riamruam ko cang ka hei ti.
Hipin cu Chinland Council siseh CNF zong nih siseh iruahchan ding si lem tilo. Hi vialtu hi fek tein kalti khawh a biapi ko. Politics a si ko caah a tangmi pawl an mipi le hmunram khi cu a pikpak tete in lemsoi ding an si ko. Cucu khat lei phu nih kan hmunram ah rak lut in lemsoinak tuah hlah u tiah hriam he an lehrulh hna ahcun politics a si ko caah a herh ningin ileh si ve ko lai. Ramkhel vawlei ahcun khuaruah har tukah ruah awk si lem lo.
Tulio bakah CNF nih SAC he kahdaihnak pehzulh than sehlaw kan Chinram dohthlennak hi zei a lawh hnga? A fiang mi cu a tlawmbik ah CDF-Hualngoram, CDF-Thantlang area, CDF-Zophei-Area, CDF-Lautu area, CDF-Zotung area, CDF-Dai area, CDF-Mara area le CDF-Paletwa area cu an ihum khawh lai cu mu. SAC nih CDF-Hakha area a thlah duh lo cun CDF-Matupi area ah pakhat chingchang cu CNF/ Chinland Council ah a pek hau hoi hnga. Hi hmun pawl ahcun CDF pawl he ibawm in fawituk in uknak an ser khawh fawn hnga.
A cunglei ka langhter mi area hi a luat khomi asiloah SAC he daihnak ser sual ahcun SAC nih a duh zong duhlo zongah a thlah dingmi area an si. Hi hmunram pawl hi hmunhma in ramri aa peh dihmi an si caah SAC nih a thlah/a sungh ahcun a tangmi area pawl khi cu hmunhma/ ramri aa pehmi an si ti lai lo. A karlak ah CNF nih ai luatpi kho mi hmunhma pawl nih an dan cang hna lai. Cucaah SAC nih a duh paoh in lente ai celhpi khawh cang hna lai. Phundang cun zeitik hmanh ah SAC kut in an luat kho ti lai lo.
Hriam an tlaih cio caah khin phundang in na ruah i si men lai dah. A biapi cu mipi kan si. Atu i hriamtlai CNF a dotu khi hriam an tlaih hlan zongin CNF dotu peng an si ko. CNF dotu thar a karhmi an silo.
CNF dirpitu an karh ka tinak cu; khahlan ah CNF thazaang pe lem lotu chungin Hualngaram, Siyinram, Zanniatram, Tonzang-Zo le Thado (Zomi asilomi pawl tinak), Mindat cheukhat le Asho Chin pin ah Rakhine um Chinmi pawl hi CNF supporter thar a chap mi an si. Zotung zong hi nai lawngin CNF thazaang biatak deuh in an hun pek a si. Kha hlan ahcun an rak pe tuk lem lo. Cubelte MDF lakah khin CNF thazaang petu an rak tampi nain CNF le CDF – Mara pehtlaihnak a that cangkaa in MDF ah an imer hna. Cucaah CDF-Mara hi CNF nih an tlaih cang vekvek ahcun fek tein a humhim khawh lawlaw a hau cang. Credit: Aceu-Salai Sang Ceu Lian