Naga-PDF Cu No.1 Military Region Ah Aa Tel I NUG, MoD Nawlpeknak Tang Ah A Um Cang
=========
Naga – People’s Defence Force (Naga-PDF) cu SAC ralhrang an hrambongh ding le Federal Union ser khawhnak ding ah kahdohnak ah aa tel ve cang i NUG cozah in runvennak vuanci zung No.1 Military Region nawlpeknak ning in (Chain Of Command) tang ah a um ve cang, tiah theih a si.
NUG MoD i No.1 Military Region ah Sagaing ramṭhen, Magway ramṭhen, Mandalay ramṭhen le Shan ramkulh cheklei hmunram hna zong aa tel.
“Naga-PDF cu Naga hmunram chung lawng siloin Sagaing ramṭhen le Kachin ramkulh zong ah cawlcanghnak an ngei. Ṭangṭi phu hna he kahdohnak an tuah mi cu humhimnak ding ca i, an ruah ruang ah thawngthanhnak an tuah lo” tiah a chim.
SAC ralhrang nih Naga hriamtlai phu a simi Naga Socialist Council Army cu ramri hngak ralkap (BGF) ah thleng kho dingin tonnak a ngeih hna i kan ral nih leirawi ruang ah Naga miphun mah le mah thisen chuah le nunnak laak hral a herh nakkong Naga-PDF nih 2024, February 18 ah thawng an thanh. Lungmili Post
Thawngpang dang: SAC nih ram mi ralkap tlakternak upadi an nunter hnu ah Yangon khuapi um Thailand Emabassy ah visa a soktu minung 7,000 leng an phan cang, tiah Bangkok Post nih a ṭial.
Thailand Emabassy nih visa a soktu ca ah token lethnih in an pek cang hna i ni khat ah minung 800 an pek hna kong Thailand cozah ṭuanvo ngei Kanchan Patarachoke nih a chim.
“Token kan pek mi hna hi 2024 March 1 tiang an khat cang i hi nakin visa a soktu an karh lai ti kan zumh,” tiah nizan February 22 ah a chim. ASEAN biahren ning ah Myanmar ram mi hna cu Thailand ram ah visa loin kal khawhnak nawl onh an si ko nain visa lo cun ni 14 chung ca lawng a nguh.
SAC nih ram mi ralkap tlakternak upadi an nunter hnu ah mino tampi ramdang ah a kal mi an um bantuk in ramdang kalnak an tuah cuahmah.
SAC nih uapdi an ser mi ah pa kum 18-35 le nu kum 18-27 tiang an auh hna lai i a tlawm bik kum 2 chung ralkap tlak ding, tiah nawl an chuah. Zaw Min Tun nih cu ralkap a tla kho ding minung nuai 13 hrawng an um i kum khat ah minung 50,000 kan auh hna lai, tiah a chim. Crd: The Chin Post