MNDAA Nih SAC Ralkap Sakhan Pakhat An Laak Chap I A Dihlak Sakhan 186 An Laak Cang
Shan ramkulh chaklei kahdohnak ah Lasho le Theinni khua i pehtlaihnak hleipi cu an chah i sakhan pakhat an laak khawh chapnak kong cu MNDAA nih an thanh.
Nihin November 30, zinglei suimilam 8:30 hrawng ah MNDAA nih Kokang Tonechain hmunhma ramri mengtung 126-127 lei ah a ummi Toneshan hmunram SAC ralkap sakhan cu an kah i an laak khawh, hriamnam zeimawzat zong an laak, tiah theih a si.
Nizan November 29 ni ah SAC ralkap bawmtu pawl khamnak ding ca ah tiin Theinni pengkomh tualchung hriamtlai phu nih Lasho le Theinni pehtlaihnak hleipi cu an chah. Nihin November 30, zinglei ah MNDAA le tualchung hriamtlai phu hna nih Theinni pengkomh, Thanlwin khuakomh ah umhmun a khuarmi ralkap pawl cu Drone in an kahdoh hna, tiah theih a si.
Chakhlei hriamtlai phu unau 3 hna nih SAC ralkap sakhan 186 an laak khawh cang i Chinshwehaw, Monekoe, Kwanlone, Pansai le Konekyan tiin khuapi 5 an laak khawh ve cang. Chinshwehaw, Monekoe, Pansai le Kyinsankyaw hmunhma ramri Gate 4 zong an laak khawh i Myanmar ram hmunkip khuapi 18 cu tualchung hriamtlai phu hna nih an laak khawh cang, tiah MNDAA nih an thanh.Credit:The chin post