MNDAA nih SAC Tactical Operation Command bo tel in Kunlong khuapi an laak khawh cang!
============
Missile kahnak motor pahnih, armoured vehicle pali, ralkap motor hna le hriamnam tampi an laak. Shan ramkulh Chaklei, Kunlong khua ah a um mi SAC ralkap Tactical Operation Command umnak tlangbo, LIB-312 battalion, Palek Sakhan tel in, Kunlong khua pumpi ning in kan laak khawh cang tiah MNDAA nih tu zanlei ah a thanh. Kunlong khuapi laak kahdohnak ah 122mm missile kahnak motor pahnih, armoured vehicle pali, ralkap motor hna le hriamnam tampi zong an laak khawh tiah theih a si.
November ni 1 ah Kunlong khua luat nakding kahdohnak an thawk i MNDAA le ttangti phu hna nih Kunlong hlei an laak hmasa hnu ah khua chung ah a um mi ralhraang umnak hmun, palek sakhan, traffic palek le Peng Uknak Zung an laak. November 2 ah Kunlong khua Nitlaklei ah a um mi SAC camp bo pakhat an laak than i Kunlong khua hrap cheu (Thanlwin tiva Nichuahlei) an rak laak khawh tiah theih a si.
November 6 ah MNDAA le a hawikom phu hna nih Thanlwin tiva Nitlaklei, Kunlong khua he hmaitonh in a um mi SAC camp hna le Tactical Operation Command hmunpi kah hram an thawk. Ni ruk chung pehtlai in an kah hnu tu zing suimilaam 10:15 ah a dihlak in an laak khawh tiah theih a si.
Kunlong cu SAC nih raal lei cawlcanghnak ah biapi tuk in a ruah mi khua a si caah ralkap camp zong fek taktak in a ser hna tiah theih a si. Atu ah cun Kokang hriamtlai MNDAA le ttangti phu nih Kunlong khuapi chung SAC ralkap an thianh dih cang hna i Kunlung khuapi ning in an laak khawh cang tiah kan theih.
Hpa Yar Hpyu SAC Camp laak nak hmanthlak an langhter. Demawso peng, Hpa yar Hpyu SAC camp an laak lio ah Karenni ralkap pawl nih SAC hriamnam an laak mi le raal an tlaih mi hmanthlak cu NUG Runvennak Minister Zung nih tu zanlei ah a langhter. Karenni ralkap phu komh nih 2023 November 11 thawk in “Operation 11.11” an thawk i SAC camp pasarih an laak khawh pin ah SAC jet fighter pakhat zong an thlak khawh cang.
Operation 11.11 cu KA, KNDF, KNPLF, KMO-Local PDF, Urban Guerilla phu hna le PDF Central Military Command, Shan Thlanglei-Karenni Command tang ah a um mi Loikaw PDF, Pekon PDF, Hpuruso PDF le Chaklei Shanram PDF battalion hna nih an tuah mi a si tiah NUG Runvennak Minister Zung nih a langhter.
MNDAA Nih SAC Ralkap Sakhan 136 An Laak Cang. Shan ramkulh chaklei, Lasho khua SAC ralkap headquarters cu MNDAA nih hriamngan in an kah i Shiyun khua pawng ralkap sakhan 4 zong an laak khawh, a dihlak ah SAC ralkap sakhan 136 an laak khawh cang, tiah MNDAA thawnglatu The Kokang nih an thanh.
Nihin November 11, zinglei suimilam 8:10 hrawng ah Shiyun khua pawng SAC ralkap sakhan 4 cu Kokang MNDAA nih an laak i, SAC ralkap 2 an tlaih hna pinah hriamnam zeimawzat zong an laak. Nihin zing suimilam 2:23 le 2:58 tiang Lasho No.2 palik sakhan le nichuah chaklei headquarters, 41 Biuha sakhan hna cu MNDAA nih hriamngan in an kah, tiah theih a si.
November 10 ah Kokang pengkomh Honshin hmunram Chonkan khuakomh, Shishan hmunram Manlaw khuakomh le Tashwethan khuakomh, Tonshan hmunram Htitephin khuakomh, Thanlwin tiva thlanglei hna ah kaphnih kar kahdohnak a chuak i zanlei suimilam 5:00 hrawng ah Chinkan khuakomh, Maihon thlanglei SAC ralkap sakhan cu MNDAA le tualchung hriamtlai phu hna nih an kah i an laak, tiah theih a si.
Htitephin khuakomh, Tarton sakhan le Hayhok Biuha sakhan cu MNDAA nih an laak khawh i Tonshan hmunram Laukchonbu hmunhma zong an laak khawh. Cu pin ah Kokang pengkomh Tasihkanpa hmunhma ah SAC ralkap pakhat an tlaih i M-16 meithal 1, kuanbawm 1 le kuangfang 25 an laakpiak khawh, tiah theih a si. Credit: