MNDAA Nih Ralhrang Ralkap Sakhan 136 An Laak Cang!
=========
Shan ramkulh chaklei, Lasho khua SAC ralkap headquarters cu MNDAA nih hriamngan in an kah i Shiyun khua pawng ralkap sakhan 4 zong an laak khawh, a dihlak ah SAC ralkap sakhan 136 an laak khawh cang, tiah MNDAA thawnglatu The Kokang nih an thanh.
Nihin November 11, zinglei suimilam 8:10 hrawng ah Shiyun khua pawng SAC ralkap sakhan 4 cu Kokang MNDAA nih an laak i, SAC ralkap 2 an tlaih hna pinah hriamnam zeimawzat zong an laak. Nihin zing suimilam 2:23 le 2:58 tiang Lasho No.2 palik sakhan le nichuah chaklei headquarters, 41 Biuha sakhan hna cu MNDAA nih hriamngan in an kah, tiah theih a si.
November 10 ah Kokang pengkomh Honshin hmunram Chonkan khuakomh, Shishan hmunram Manlaw khuakomh le Tashwethan khuakomh, Tonshan hmunram Htitephin khuakomh, Thanlwin tiva thlanglei hna ah kaphnih kar kahdohnak a chuak i zanlei suimilam 5:00 hrawng ah Chinkan khuakomh, Maihon thlanglei SAC ralkap sakhan cu MNDAA le tualchung hriamtlai phu hna nih an kah i an laak, tiah theih a si.
Htitephin khuakomh, Tarton sakhan le Hayhok Biuha sakhan cu MNDAA nih an laak khawh i Tonshan hmunram Laukchonbu hmunhma zong an laak khawh. Cu pin ah Kokang pengkomh Tasihkanpa hmunhma ah SAC ralkap pakhat an tlaih i M-16 meithal 1, kuanbawm 1 le kuangfang 25 an laakpiak khawh, tiah theih a si.
Kokang Pengkomh, Tonshan (တုန်းရှမ်း)Hmunram SAC Ralkap Sakhan 2 Le Laukkai Peng Sakhan 4 Cu MNDAA Nih An Laak. Shan ramkulh, Kokang pengkomh, Tonshan (တုန်းရှမ်း) hmunram SAC ralkap sakhan 2 cu MNDAA nih nizan ah an laak khawh i Laukkai peng ralkap sakhan 4 zong November 9 ah an laak khawh, tiah MNDAA thawngthanhtu The Kokang nih a thanh.
1027 Operation ni 15 tiang ah Kokang MNDAA nih SAC ralkap sakhan a ngan he a fa he a zate ah 133 an laak khawh, tiah theih a si. Nizan November 10, zinglei 5:30 ah MNDAA nih Tonshan hmunram Taton (တာတုန်း) hmun SAC ralkap sakhan cu Drone in an kah i zinglei 6:30 ah an laak khawh, sakhan chung ummi ralkap zong an zaam dih, tiah theih a si.
Nizan November 10, zinglei 8:00 hrawng ah MNDAA ralkap hna nih Siyunkyi (ရှီယွင်ကြည်)khua pawng Laukchunpu (လောက်ချွင်ပု) sakhan ah a ummi Pyituhsit pawl cu an kah hna i zinglei 8:20 ah Laukchunpu sakhan zong an laak khawh. Cu sakhan laak kahdohnak ah cun SAC ralkap 3 le Pyituhsit 11 an thi, 3 hliam an pu i 1 an tlaih khawh. SAC ralkap motor 3 zong an hrawh khawh i hriamngan zeimawzat zong an laak, tiah theih a si.
Cu pin ah November 9 ni ah chaklei hriamtlai phu unau thum nih Kokang ah rallam a sialmi SAC ralkap pawl cu an kah hna i Siyunkyi khua, Shishan (ရှီရှမ်)hmunram, Tashwethan (တာရွှေထန်) khuakomh le Manlaw (မန်လော်) khuakomh um ralkap sakhan 4 cu an laak khawh, tiah theih a si.
Kalaywa Peng Ah PDF Sakhan Cu SAC Ralkap Nih An Luhhnawh. Sagaing ramṭhen, Kalaywa peng Sinaima khua pawng PDF sakhan cu November 9 zanlei ah SAC ralkap nih an luhhnawh hna i PDF ralkap tam ngai tlaih an tong, tiah tualchung mi nih an chim. Sinaima khua pawng PDF pawl cu ralkap thazaang 80 tluk deng he a kal mi SAC ralkap nih hriamngan le hriamhme he luhhnawh in suimilam 1:00 chung hrawng an kah hna i, meithal zeimawzat an sungh hlei ah sakhan zong an khanghpiak hna, tiah tualchung mi nih cun an chim.
PDF ralkap a thimi le tlaihmi an um ko nain fiang in kan chim kho lo, tiah tualchung mi pakhat nih RFA ah a chim. “A thimi hi an tam ngai ko lai, asinain a zat belte chim a har, an zate in an tlau dih caah an thi maw, an tlaih hna dah kan chim kho lo, atu ah cun minung 10 an thi ti lawng kan hngalh,” tiah tualchung mi pakhat nih cun RFA ah a chim.
SAC nih an hmanmi Telegram Channel nih cun Sinmaai khua pawng PDF sakhan cu November 9, zan 8:30 ah SAC ralkap nih luhhnawh in an kah, tiah an ṭial ve. Sinmaai khua pawng PDF sakhan laak kahdohnak ah PDF ralkap 28 an thi tiin thawngpang a thang nain, cu kong he pehtlai in fehternak tuahmi a um rih lo.
Kanbalu Nichuahlei Kahdohnak Ah SAC Ralkap 100 Hrawng An Thi. Sagaing ramṭhen, Kanbalu peng nichuahlei ah rallam a sialmi SAC ralkap cu tualchung hriamtlai phu nih an kah hna i, kahdohnak ah SAC ralkap 100 hrawng an thih pinah hriamnam tampi kan laakpiak hna, tiah Infinity Group in ṭuanvo ngeitu pakhat nih Khit Thit Media ah a chim.
Nihin November 10 zinglei ah SAC ralkap le pyusawhti 300 hrawng cu PDF nih lamhruang in an kah hna, tiah theih a si. “SAC lei in ralkap 100 hrawng an thi. Rallam a sialmi hi ralkap le pyusawhti 300 hrawng an phan. Kawlin khuapi cu PDF kuttang i a um cang caah ralkap thazaang tampi in rallam an sialnak hi a si,” tiah Infinity Group in ṭuanvo ngeitu pakhat nih cun a chim.
SAC ralkap le pyusawhti hi November 7 ah Chatthin hmunram in Kutaungbu lei ah rallam an rak sial. Nihin November 10 zinglei suimilam 5:00 hrawng in rallam a sialmi SAC ralkap le pyusawhti cu kan kah hna i zing suimilam 10:00 hrawng ah kahdohnak a dai. SAC lei in ralkap a thimi leng ah a zaammi zong an tampi, tiah Infinity Group in ṭuanvo ngeitu nih cun a chim.
Hi kong he pehtlai in NUG runvennak zung nih cun, Kanbalu peng Ahlelkhon khua nitlak chaklei kahdohnak ah SAC ralkap 80 leng hrawng an thih pinah 20 hrawng hliamhma an pu. PDF ṭangṭi phu nih meithal zun 59 le zen-kuan tampi an laak, tiah an thanh. Credit: The Chin Post