Kokang Hmunram Ah MNDAA Nih SAC Ralkap Sakhan 4 An Laak Chap, Sakhan 144 An Laak Cang!
============
Shan ramkulh, Kokang hmunram SAC ralkap sakhan 4 cu MNDAA nih an laak chap i a zate ah sakhan 144 an laak khawh cang, tiah MNDAA thawngzamhnak The Kokang nih an thanh. Nihin November 14, zinglei suimilam 10:50 hrawng ah Kokang pengkomh, Shishan hmunram Huashihpan pawng SAC ralkap sakhan cu MNDAA ralkap nih hriamngan in an kah pin ah tanglei in kahdoh an bawmh hna i zinglei suimilam 11:30 ah an laak khawh, tiah theih a si.
Nizan November 13, zinglei suimilam 7:30 hrawng ah Shaukkai Check Gate zong Kokang MNDAA nih an kah i an laak khawh. Cu ni ṭhiamṭhiam chun suimilam 12:45 ah Hone-ai hmunram hmai SAC ralkap sakhan pakhat cu an kah ṭhan i zanlei suimilam 4:30 ah an laak khawh. Cu sakhan laak kahdohnak ah cun seh meithal 1, 60mm Sniper 1, bomb, meithal kuan, kutcheh bomb le hriamngan dangdang zong an laak khawh, tiah theih a si.
Cu pin ah Mawhtite hmun lei panh in a kalmi SAC ralkap pawl cu MNDAA nih Chonekan hmun an phanh ah an kah hna. November 11 zan ah Theinni Yipu Gate SAC ralkap sakhan cu MNDAA le ṭangṭi phu nih an kah i November 12, chun suimilam 12 ah an laak khawh, tiah theih a si.
Laukkai Khuapi Kan Laaknak Ding Ni Caan A Nai Cang Tiah MNDAA Nih Cathanh An Chuah. Kokang ralkap MNDAA cu Laukkai khuapi la kho ding dirhmun ah kan dir cang, Laukkai khuapi kan laaknak ding ni le caan a nai cang, tiah November 14 ah cathanh an chuah. Laukkai khuapi laaknak ding kong he pehtlai in China ca in cathanh an chuahmi cu MNDAA chimnak nawlngeitu Lee Kyar Win nih a leh i hrilhfiahnak a tuah.
“Laukkai khuapi laak ding ni le caan a nai cang i tualchung mi chung in thi le hliam an um kan duh lo caah atu bantukin a hlankan in ralrin peknak le theihternak cathanh kan chuah hmasanak a si,” tiah Lee Kyar Win nih cun a chim. Khuapi laak kahdohnak ah aa tel dingmi mipi ralkap dihlak nih Operation kong ah an zulh dingmi zulhphung zong ṭha tein an zulh i mipi an nun a him khawh nakhnga a ṭha bik in kan venhim hna lai, tiah cathanh ah cun an langhter.
Cu pin ah lih le hrokhrawl in rian a ṭuantu Company tang ah aa hrengmi minung hna zong kan chanhchuah hna lai. Dik lo tuk in Company rianṭuannak thazaang a pe i a dirkamhtu minung zong kan ṭhio dih hna lai. Phung buar in rian a ṭuantu Company ngeitu vialte zong dantatnak kan pek hna lai, tiah cathanh ah cun an telh. Khuachung ah phungning tein chawlehthalnak a tuahtu hna cu a si khawh chung in kan runven hna lai, tiah MNDAA chimnak nawlngeitu nih cun a chim.
MNDAA telh in hriamtlai phu unau thum hna nih 1027 Operation kahdohnak cu a luancia October 27 in an rak thawk i SAC ralkap sakhan 170 leng an laak khawh cang i Konlone, Chinshwehaw, Monekoe, Phaungsai, Pansan, Theinni le Namkham khuapi hna cu an laak i an uk khawh cang.
Kawlin Pengkomh Myanmar Commercial Bank Chung Tangka Sing 9,000 Leng Cu NUG Caan Karlak Central Bank Nih Cazin He An Fimken Chung. Mipi ralkap ṭangṭi phu nih Sagaing ramṭhen, Kawlin pengkomh Myanmar Commercial Bank chung tangka Kyats sing 9,000 leng cu NUG Central Bank nih cazin he an fimtawl chungnak kong phungning tein thanhnak an tuah.
A luancia November 6 ah Sagaing ramṭhen, Kawlin khuapi cu Kawlin peng hriamtlai phu hrihhawhnak in KIA, PDF, Pah-Kah-Phah le ṭangṭi phu hna nih an rak laak. November 8 ni ah Kawlin pengkomh chung i a biapi bik tiah ruahmi pengkomh ruatkhangtu phu cu NUG, caan karlak zatlang ukhruaitu Central Committee Chairman le ramkomh Minister Man Win Khaing Thein nih nawl an chuahmi no. (1/2023) in ṭuanvo an pek hna, tiah theih a si.
Kawlin pengkomh ruatkhangtu phu nih SOPs-Standard Operating Procedure zulhphung in an kalpi i Kawlin pengkomh, Myanmar Commercial Bank i tangka Kyats nuai 952.345 cu an kutchung a phanh hnu ah tangka cu NUG caan karlak Central Bank sin ah an ap ṭhan cang. NUG caan karlak Central Bank lei zong nih cazin ning tein tangka cu an fimtawl i Myanmar Commercial Bank i tangka a chiami mipi an sungh nakhnga lo tlawttlau lo tein an tawlrel ding kong thanhnak an tuah ve.
Shanram Chaklei Ah MNDAA Nih SAC Ralkap Sakhan 3 An Laak Chap, Sakhan 141 An Laak Cang. Shan ramkulh chaklei, Kokang hmunram chung SAC ralkap 128 Byuha sakhan, Shaukkai khua sakhan le Pasinkyaw sakhan cu MNDAA nih an laak khawh i, SAC ralkap sakhan 141 kan laak khawh cang, tiah MNDAA nih an thanh.
Nihin November 13, zinglei suimilam 7:30 ah Shishan hmunram Shaukkai khua lamṭhen, SAC ralkap nih chekhlatnak an tuah tawnnak sakhan cu Kokang MNDAA nih hriamngan in an kah pin ah tanglei in an kah hna i sakhan cu an laak khawh, hriamnam tam ngai zong an laak khawh, tiah theih a si. November 12, zanlei suimilam 3:50 ah SAC ralkap 128 Byuha sakhan cu MNDAA nih ralkap thazaang tam ngai he an kah i zanlei suimilam 4:50 ah an laak khawh, zanlei suimilam 5:17 ah Kokang pengkomh Honshin hmunram Chonkan khua SAC ralkap sakhan zong an laak khawh.
November 12 ni ṭhiamṭhiam, zanlei suimilam 1:30 hrawng ah Monekoe pengkomh Laikyone hmun ah a ummi SAC ralkap sakhan cu MNDAA le ṭangṭi phu hna nih an kah i an laak. Cu pin ah Lasho khuachung SAC ralkap 507 sakhan cu MNDAA nih hriamngan in voi 11 an kah i mentung 12 ah hrambunhmi SAC ralkap sakhan zong voi 1 an kah, tiah theih a si.