Kokang Hmunram Ah MNDAA Nih SAC Ralkap Sakhan 3 An Laak Chap, Sakhan 147 An Laak Cang!
=========
Shan ramkulh chaklei Kokang hmunram ah MNDAA nih SAC ralkap sakhan 3 an laak chap, sakhan 147 an laak khawh cang. Cu sakhan laak kahdohnak ah cun SAC ralkap 20 nak tlawm lo an thi, tiah theih a si. Nihin November 15, zinglei suimilam 6:30 ah MNDAA nih Shaukchonekan, Mawtite Saikyaukshan le Mawtite Talinkae tlang SAC ralkap sakhan 3 cu an laak khawh i sakhan zate 147 an laak khawh cang, tiah theih a si.
Nizan November 14 zong ah MNDAA nih Kokang hmunram SAC ralkap sakhan 2 an laak chap i sakhan laak kahdohnak ah SAC ralkap thi le hliam zate 50 leng an si i hriamnam zeimawzat zong an laak khawh. “Nihin November 15, Kokang hmunram sakhan laak kahdohnak ah SAC ralkap 20 leng an thi i hriamnam tam ngai kan laak khawh,” tiah MNDAA ral hmaikal ṭuanvo ngei pakhat nih a chim.
Kutkai le Tangyan Ah A Um Mi Ralkap Le Pyithusit Sakhaan 3 TNLA Nih An Lak. Shan ram, Kutkai pengle Tangyan peng ah a um mi ralkap le pyithusit sakhaan 3 cu TNLA nih an lak tiah TNLA nih an thanh. November 10 zaan sml 12:00am hrawng ah Kutkai peng ah a um mi ralkap kuttang pyithusit sakhaan cu TNLA nih an lak, November 14 zinglei sml 4:00am hrawng ah Kutkai peng, Lwaikan khua pawng ah a um mi ralkap le pyithusit sakhaan cu TNLA nih an lak chap i sakhaan chung um kahdohnak thilri pawl zong an lak khawh tiah theih a si.
Cubantuk in November 14 ah Tangyan peng ah a um mi ralkap ralkap Sai-Hlian sakhaan zong TNLA nih an lak. November 14 ah Kutkai peng ah a um mi ralkap kuttang Mon-hyun pyithusit phu le Monpaw pyithusit phu hna cu TNLA sin ah hriam zuun 10 an rak ap. Cun November 15 zinglei sml 5:00am hrawng ah Kyaukme peng, Naungpyit khua lamṭhen ah ralkap le TNLA hna karlak ah kahdohnak a fak tiah theih a si.
Hsipaw Khuapi Um SAC Kuttang Zung Rianṭuantu An Zaam Dih, Khuapi Cheu 3 Cheu 2 TNLA Nih An Uk Cang. Shan ramkulh, chaklei Hsipaw peng khuapi um SAC kuttang zung rianṭuantu vialte cu an dihlak in an zaam dih cang, tiah Hsipaw khuami hna nih Khit Thit Media ah an chim.
November 12 thawk in Hsipaw peng ah TNLA nih kahdohnak an thawk i November 13 ah Hsipaw khuapi um SAC kuttang zung le palik sakhan ah zung rianṭuantu ahohmanh an um ngam ti lo i an zaam dih, tiah theih a si. “GAD, Lah Wah Kah zung le a dang zung pawl ah zung rianṭuantu an um ti lo. Cheukhat zung tu cu zung hngak an um rih. TNLA nih khuapi cu cheu 3 cheu 2 an uk cang,” tiah Hsipaw khuami pakhat nih a chim.
November 12 ah Hsipaw peng le Kyaukme peng kar um Kyinthi hlei zong TNLA nih bomb an rak puah i a rawk dih. Lashio-Hsipaw, Hsipaw-Kyaukme lam TNLA nih an uk i Theinni-Lashio-Hsipaw lam um chek gate zong November 11 ah an rak laak.
Loikaw Ah SAC Ralkap 32 Nih Hriamnam An Chiah I Kahdohnak Ah Ralkap 110 Leng An Thi. Karenni ramkulh, Loikaw ah SAC ralkap 32 nih an hriamnam an chiah, tiah KNDF nih phungning tein an thanh. KNDF nih Loikaw Sianghleirun ah umhmun a khuarmi Tatma 66 kuttang Khah Mah Yah 425 le Khah Mah Yah 6 in SAC ralkap cu an kah hna i operation 1111 a ni thumnak le nilinak ah SAC ralkap 32 nih hriamnam an chiah, tiah theih a si.
KNDF nih November 13 chunnitlak te Loikaw Sianghleirun ah umhmun a khuarmi SAC ralkap cu an kah hna i Khah Mah Yah 425 Battalion Commander le Deputy Battalion Commander telh in Battalion pakhat ning tluk in SAC ralkap an thi, tiah theih a si. November 14 ah Loikaw Sianghleirun ah umhmun a khaurmi Khah Mah Yah 6 in SAC ralkap pawl cu KNDF nih zinglei in zanlei tiang an kah ṭhan hna. Hriamnam chia dingin caan an pek hna i SAC ralkap 32 nih KNDF sinah hriamnam an chiah.
Kahdohnak ah Battalion Commander le Deputy Battalion Commander telh in SAC lei ralkap 110 leng an thi i ralkap 38 KNDF nih an tlaih hna leng ah hriamngan, meithal zun 128 le zen-kuan tampi an laakpiak hna. KNDF sinah hriamnam a chia mi SAC ralkap pawl cu KNDF nih ṭha tein an zohkhenh hna, tiah theih a si. Credit: The Chin Post, The Chinland Post