Lengpui Airport Ah SAC Vanlawng Nih SAC Ralkap A Zaam Mi 151 A Laak Hna
===========
December 29, 2023 i Mizoram, Lawngtlai peng Tuisentlang khua ah a zaam mi SAC ralkap 151 cu SAC ralkap vanlawng nih nizan January ni 2 ah a laak hna.
SAC ralkap vanlawng hi Mizoram khualipi Aizawl khuapi pawngah a ummi Lengpui Airport ah voihnih ṭum in a ṭum i, a voikhatnak ah ralkap 84 a thiar hmasa hna hnu in zanlei suimilam 3:24 ah ralkap 67 a thiar ṭhan hna, an dihlak ralkap 151 cu him tein Myanmar an phan.
SAC ralkap 151 hi AA nih Myeik Wa camp(Point 377) an rak kah lio ah a rak zaam mi an si i, a luancia December 29, 2023 ah khan Lawngtlai peng, Tuisentlang khua ah an rak lut. Ralkap pawl hi voihnih luh in an rak lut i, a voikhatnak ah ralkap 83 an luh hnu ah ralkap 68 nih an rak chap ṭhan. An lak ah hin hliamhma pu 9 an um i, an lak ah ralkap 4 cu an hliamhma a faak ngai, tiah theih a si.
India le SAC hi pehtlaihnak ṭha an ngeih caah India ramchung ah himnak kawlin a zaam mi SAC ralkap dihlak cu him tein Myanmar lei ah kuat a si peng. A luancia 2023, November thla zong ah SAC ralkap 101 cu Mizoram ah lutin Central cozah le SAC an i chawnh hnu ah Mizoram in Moreh ah India ralkap vanlawng phorh an si i, Myanmar lei ah an rak lut cang.Credit : The Chin Post