Mithla ka hmuh (Based on true Story)
========
A caan cu 1997 ah a si. Ka putar Rev. Van Lo “Nungna Diamond Jubilee” lai a si. Kei hi ka ningṭih a pang taktak. Mui hnu lengchuah a ngamh bak lomi ka si. Chunlai zong ah inn chung mah lawng lut ngam lomi ka si. Ralchiat ah a pihnak bak.
Jubilee cu Sihhmuh ah tuah a si. Tangkua kai lio kharpi tlun he ai tong fawn i tlung ding cun kai tim ve. Kan i tuai ngai cio hna. Ka zal hme tein ka angkileng le bawngbi kai senh. Ka farnu Dimdim Van Tha Par Dim le a hawile nih ka zaal cu an rak put i Ciacia inn in kan rak in hngah te lai, an ka ti le an rak kal chung.
Ka vun dawi hna cu an i ngaih tuk rua, an rak lan diam ai. Ciacia cu ka zal an chia ta maw, ka hun ti i ka hngal lo ee, a ti caah ṭhutnak hrawng ka zoh luklak i ka hmuh lo caah ka lan ve.
Sopum (khua hlun) ah ka von phak hna cu….. ka zal an rak bei ti lo ai.
Jubilee ah kai hruk aih ding ka thil kenret um lo cun Khawmpi le Jubilee te hna hi ṭah chuak an rak si ko cuh. Thinhun tein chuncaw kai ei zau i Thantlang ah cun ka kir top. Chun 2:00 ah Thantlang Ciacia dawr ka phan. Lakphak kai din i 2:40 in Sihhmuh lei tlun ah kai thawh nolh. Thantlang in Sihhmuh cu meng 20 hrawng a si cu mu. Ke bak in kal chan.
Tuak ko, meng 20 hrawng zanlei 2:40 ithawh cu..Sopum (meng 9)ka phak ah nitlak ai tim. Lamphawk in ka zuang thluahmah i Thingva ka phak ah nika a lang ti lo. Mizoram in a hung tlung mi nungak tlangval (sumdawng) pa thum ka ton hna i pahnih cu an i uar pah ti ka hngalh. Thingva leikuang thlam ah riah an itim. Sihhmuh phak ding cu a si kho ti hnga maw? an ka ti len. Thingva in Sihhmuh lei cu vom vai tamnak le horkuang thuk lawngte.
Ningṭihnak hmun lawngte a si cang. 1987 hrawng ralkap pa an thahnak le lamthlang i a ruak an thuhnak hmun, Pahaar hrawng, mi tlung kal paoh nih thawngpang an theih lengmangnak Vanzang lampial hrawng, chun lai hmanh ah a king i a mui ngai mi Sihhmuh va kuang, Thingkung sang pipi le a tang a cheng ngai mi Saza sih va hrawng le Lungdonh le thlanhmun umnak Dinhhmun hrawng. Aiaiaiaaaii.
Ka tli peng ko rih. Ralkap pa thihnak hrawng le Pahaar hrawng cu mui tuk deuh hlan ah ka lonh manh. Sihhmuh va ka phak ah cun lam chak diltlang muai pah in ka kal cang. Lam kawi zawn cu an mui tuk ah ka thaw a ip tuk tawn. Vanzang lampial hrawng phak ko hi ka zenh.
Lungdonh cung in an rak ka zoh lai ka phang. Ka thaw chuah rem tein ka tuah i duhsah in ka kal. Vanzang lampial zawn cu ṭha taktak in ka hun zoh. A muih tuk caah lam hla ka hmu kho lo. Ningṭih cu a fak hringhran ko. Lungdonh cungah aho hmanh an rak ṭhu lo i ka ke fah le ka rawl ṭam celh lo ah kai bei mi changreu tete kai chuah i ka ei pah. Ka ṭhu lawlaw.
Lit va ka chuak. Bakba va kuang hrawng cu a ti tuk lehpek cang, a dap bak in kai dap ko. Lam thlang lei cu a cheng taktak. Cu lio ka ruah mi cu ka hmai lam kawi zawn lam thlang chumhmui nak pi kha mithla ah ka rel sual khawh, zeicahtiah ka tha baa tuk i ka mit a maw pah cang. A kuarhnak zawn a muihnak hrawng cu ka hun lonh. Ka dir ta i ṭha tein khua ka zoh, lam thlang thinghmui nak pi cu fiang set loin ka hei hmuh. Ka hnangam deuh.
Cucun kun pah bu khin duhsah in ka kal. Nithawng kai ṭhunh. Ka baat si, ka ke durh mi fah si, ka hung dir. Lamthlang lei cu ka hun hoih. Cu bak ah cun awww…ka thlang zawn ah nutar nu puan nakpi i khuh in a sam a hun ṭhen lio mi bak cu ka hmuh ko. A zam a ṭhen mi karlak khin a mit tleu pipi pahnih ka hei hmuh. Cun a hun ka nih ko ai!! Maw…ka nu te..ka ti i ka nithawng in ka hun tuk chih. Kuk! tiah a ring i ka thaw ka hun i hrim.
Lam tlang ah ka khup bil in kai nok pah. Ka lung a hung fim i tarnu pi cu lamthlang thinghmui pi a rak si kha ka hun hngalh. Ka tuknak ka nithawng cu a kawi ve. Ka thaw cu phuuun…tiah ka hun chuah. Kar kua-hra ka hun kar ah lam chak in thiahlei nupa lam thlang lei hnoci phul lak ah an hun i hlonh hoi ai. Ningṭih lio ah cun vanlawng thawng tluk in ka theih ko. Kai hlok hoi ai.
Saza sih lei cu a muih tuk ah a pit. Lam ah kun in ka vaak cang. Ka thaw hmanh fak in ka chuah ngam ti lo. Zunceh farvaang cu a hme he a ngan he an zuang. Hau an sakmi kai ko hi thliing a za. Hnu lei her lengmang bu in hor lei ka fuh. Cun khua lei hoih in cho fuh khin ka hun fuh cang.
Dinhhmun cun Sihhmuh a lang cang lai va si kaw.. Aih! Si hlah, mithi vuinak le lungdonh vialte ah khan aho dek rak ṭhut khawh a si. Ralkap pa thla zong rak ṭhut khawh a si. Thin phudip bu in ka hung kai. Lam diltlang muai bu te cun. Dinhhmun lungdonh cu a pel tein ka hun pel cang. Lungdonh le thlan zawn cu pakhat hnu pakhat ka vun ngiat hna. A cawngcang mi pakhat khat ka hmu sual hnga maw ti khin. Lungdonh pipi cu cuangdur an rak um ko. Vanṭhat ah Sihhmuh a lang cang i Khawmpi mandat meiceu cu cerh zung in a hung lang.
Thinphannak vialte an tlau i Za Hum pu ti thlum hrawng le Kaidawn hrawng mui padap hna khi cu thanuam ngai in ka hun tan ngam ko cang hna. Cuticun zan pumh an chuah lio sml 9:30 pm ah ka pilepu inn te cu ka phan. A thaizing ah ka pitar nih ar a ka thah bak ve. Credit: Jimmy Pa Kawi Tial