Pekhon Peng Ah Kahdohnak Um Loin SAC Ralkap Nih Bomb An Thlak, Tualchung Mi 3 Hliamhma Fak Ngai An Tuar
===================
Shan ramkulh, Pekhon peng khuate pakhat ah SAC ralkap nih kahdohnak zeihmanh um loin bomb an thlak ruangah tualchung mi 3 hliamhma fak ngai an pu, tiah tualchung mi hna sinin theih a si. Nihin May 6 deilei suimilam 3:50 ah SAC ralkap nih kahdohnak um loin Pekhon peng khuate pakhat ah Fighter in bomb an thlak ruangah Roman Catholic Biakinn le tualchung mi inn cheukhat a rawk, tiah theih a si.
Bomb an thlak ruangah kum 10 tluk ngakchia pakhat zong hliamhma fak ngai a pu i, a nunnak ca ah thinphang ngai a si. A dang pahnih zong an hliamhma a fak ngaingai, tiah theih a si.
USDP Party Chungtel Pahnih Nih Thawng Pek Ruangah SAC Ralkap Nih Ralhrial Mi 4 An Tlaih Hna; Bago ramṭhen, Nyaunglaypin peng Hnetpyudaw khuami USDP party chungtel Chit Lwin le Thein Lwin nih SAC ralkap sinah thawng an pek hna ruangah ralhrial mi 4 cu ralkap nih May 3 zanlei suimilam 4:00 ah an va tlaih hna, tiah theih a si. Pazun khua in Hnetpyudaw khua ah ral a hrialmi pa 4 cu PDF he pehtlaihnak an ngei tiin USDP chungtel pahnih nih ralkap sinah an phuan caah tlaih an ton hi a si, tiah theih a si.
“Tlaih a tongmi pa 4 cu USDP party chungtel pahnih nih an phuan hna caah ralkap nih an tlaih hna i Nyaunglaypin khua ah an kalpi hna. An i dornak inn ngeitu cu an tlai lo,” tiah min langhter a duh lomi pakhat nih a chim. Tlaih a tongmi hna hi kum 30 tluk mi an si i, pa pakhat cu May 4 zing suimilam 8:00 ah an thlah ṭhan cang. A dang pathum cu nihin May 6 tiang ah an thlah rih hna lo, tiah tualchung mi hna nih an chim.
USDP party chungtel Chit Lwin le Thein Lwin cu 2021 hramthawk ahkhan ralkap uk duhlonak a langhtertu pa 4 zong SAC ralkap sinah an rak phuan hna caah ralkap nih 2 an rak tlaih hna, tiah theih a si.
SAC Nih Rakhine Ramkhel Party 4 Cu Register Tuahnak Nawl An Onh Ṭhan Hna; AFP party telh in ramkhel party 4 cu Union Election Commission nih ramkhel party sinak register tuahnak nawl an onh hna, tiah theih a si. AFP, RSNUP, Myo party le Khami party cu UEC nih March thla chungah register tuah ṭhan khawh dingin an onh hna, tiah theih a si.
SAC kuttang UEC sinah ramkhel party si khawhnak caah register a tuahtu hi Rakhine kulh in party 6 an si i, cu chungah ANP le Myo party cu UEC nih register tuah dingin nawl an pe rih hna lo, tiah theih a si. “SAC sinah ramkhel party sinak register a tuah dingin a soktu hna cu chekhlatnak an tuah cuahmah hna. Register an tuahter hna lai maw tuahter hna lai lo ti cu SAC nih an lungtlingmi an hmuh hna ahcun UEC nih an cohlan ko lai,” tiah Rakhine ramkhel thiamsang pakhat nih a chim.
UEC sinah ramkhel party 60 leng cu register an rak tuah i NLD telh in party 40 cu March 28 ah UEC nih an rak hrawh, tiah theih a si. Min Aung Hlaing nih Myanmar ram hi zei a can lai a fian lo caah ram pumpi thimnak tuah ding hi a har ngai rih, tiah a chim.