Muse Kahdohnak Ah SAC Ralkap 10 An Thi, Hriam Tampi An Lak Khawh!
=======
Shan ram, Muse peng ah a cang mi kahdohnak chung ah SAC ralkap 10 an thi i hriam tampi an lak khawh tiah Ta’ang National Liberation Army (TNLA) nih cathanh a chuah. August 2 zinglei sml 10:00am in zaanlei sml 4:30pm tiang Muse peng, Nahtan le Kaungya khua pawng ah SAC ralkap le TNLA karlak ah kahdohnak fak a chuah hi a si.
SAC Brigade 99, Infantry 420, Infantry 261, Namkhan khua SAC kuttang pyi-thu-sit hna nih TNLA umnak lei ah kahdohnak an tuah caah kaphnih karlak kahdohnak a fak i SAC lei 10 an thi, 13 hrawng an i hliam tiah theih a si.
Kahdohnak chung ah RPG zuun 1, RPG-7 bom lung 20, MA-2 zuun 1, AK-81 zuun 1, 60MM 1, 81MM bom lung 40, MG 1, kuan 5,000, pehtlaihnak seh a ngan mi 1 le adang kahdohnak thilri tampi an lak khawh tiah theih a si. July thla 23 in August 2 tiang TNLA le SAC ralkap karlak ah kahdohnak voi 9 a chuak i kahdohnak chung ah SAC kuttang pyi-thu-sit 25 an thi i 27 an i hliam, 1 a nung in an tlaih tiah theih a si.
Myanmar Union Huap In Lutlai Mi 10 Rianphuah An Tong. Myanmar Union huap in lutlai a si mi, Union Supreme Court lubik, Office of the Auditor General (Myanmar), le Anti-Corruption Commission of Myanmar| National Human Right Commission Chairman minung 2, Union Minister Affairs minung 4 le SAC committee chungtel 3 tiah an dihlak minung 10 rianphuah an sinak kong cu August 2, ah SAC nih thawngthanhnak a tuah.
SAC committee chungtel Maung Ko, Dr. Aung Kyaw Min cu rianphuah an si i, Dr Kyaw Tun cu Centre ruahnak petu ah rianṭhial a si. Union huap in rianphuah a tong mi hna cu, Union Supreme Court lubik Chief Justice of Union Tun Tun Oo, Religion Minister Ko Ko, Electricity Minister Taung Han, Office of the Auditor General Tin Oo, Anti-Corruption Commission of Myanmar Chairman Htey Aung, Myanmar National Human Rights Commission Chairman Hla Myint, Energy Minister Myo Myint Oo le Labour Minister Dr Pwint San rianphuah an tonnak cu SAC lei nih August 2, 2023 thawngthanhnak in theih a si.
Khampat Khuachung Thilfir Pawl Ralrin Peknak. Ralhrang ruang ah Khampat khuachung mipi hna vansang chungpit le harnak ton caan ah mah le run-inn chung um ngam lo in hmunkip ah tlik/zaam in an um cio hna. Innchungkhar thilri hmanh lak/zaampi ngam lo tein himnak hmun kip ah an tli cio. Mi nih harsatnak an ton lio ah caanṭha lak riangmang in khuachung mipi inn pawl bauh in thil an fir ti kan theih.
Cucaah ningzahtlak thilsual nan tuah mi hi a rannak in ngol uh, Nan ngol hlei lo i, tlaih nan ton hnu ahcun hremnak fakbik in nan in tuar lai tiah CNO/CNDF UCR President Salai Enock min in ralring peknak cathanh an chuah.
Thla 7 Chung Ah SAC Ralkap Nih Pa 1,200 Hrawng An Tlaih Hna I 700 Leng An Thah Hna. Myanmar ram ah hramhram in uknak lak a si hnu kum 2 le cheu leng caan chung ah SAC ralkap nih sualnak ngei lo minung 3,868 leng an thah cang hna i a tlaih/hren mi minung 24,137 tiang an um cang tiah Assistance Association for Political Prisoners (AAPP) nih a thanh.
Atu cazin hi 2021 February 1 in 2023 July 18 tiang AAPP nih a khawmhsuat mi a si i khawmhsuat khawh mi leng ah a thi mi an tampi rih lai tiah a langhter. Pau Dothlennak chung, tuni tiang ah minung 19,689 an tlaih/hren cang hna i cu chung ah minung 6,859 cu thongthlak ding in biakhiah an si.
Dothlennak he pehtlai in an tlaih/hren hna i thah ding tiah biakhiah a tong mi 115 an um i hriawh in thah ding tiah biakkhiah a si mi 43 telh in minung 122 cu hriawh in thah ding tiah biakhiah an si caah thah ding tiah biakhiah a si mi an zapi te 158 an um cang.
Atutiang ah biakamnak he an thlah ṭhan cang mi hna 4,450 an um tiah a langhter. AAPP nih a khawmhsuat khawh mi cazin ning ah 2023 January thla in July thla dongh tiang, thla 7 chung ah SAC ralkap nih Myanmar ramchung pa 701 an thah cang hna i Sagaing ramṭhen ah a thi mi an tam bik i pa 407 tiang an thi.
Tabayin Peng Ah SAC Ralkap 130 An Kah Hna, 10 Hrawng An Thi. Sagaing ramṭhen, Tabayin peng ah thazang 130 hrawng SAC ralkap pawl cu PDF phufonh nih an kah hna i SAC lei 10 hrawng an thi tiah Shwebo peng PDF nih thawng an thanh.
August 2 zinglei sml 11:00am hrawng ah Tabayin peng le Ye U peng lei in a rak lut mi SAC ralkap 130 hrawng cu Shwebo Justice Force, Shwebo pengkomh B09, B12, Tabayin peng PDF phu pawl bawm in an kah hna tiah theih a si.
SAC lei nih Drone hmang in ngiathlainak an tuah i hriamngan in pehzulh an kah ko hna bu in an doh chih hna. PDF phufonh lei 7 thinphan awk um tuk lo in an i hliam. PDF lei nih bomrap lung 5 an puah khawh i SAC lei 10 an thi, kahdohnak hi sml 1 le cheu leng a rau tiah theih a si.
Tabayin Peng Ah SAC Ralkap 130 An Kah Hna, 10 Hrawng An Thi. Sagaing ramṭhen, Tabayin peng ah thazang 130 hrawng SAC ralkap pawl cu PDF phufonh nih an kah hna i SAC lei 10 hrawng an thi tiah Shwebo peng PDF nih thawng an thanh.
August 2 zinglei sml 11:00am hrawng ah Tabayin peng le Ye U peng lei in a rak lut mi SAC ralkap 130 hrawng cu Shwebo Justice Force, Shwebo pengkomh B09, B12, Tabayin peng PDF phu pawl bawm in an kah hna tiah theih a si.
SAC lei nih Drone hmang in ngiathlainak an tuah i hriamngan in pehzulh an kah ko hna bu in an doh chih hna. PDF phufonh lei 7 thinphan awk um tuk lo in an i hliam. PDF lei nih bomrap lung 5 an puah khawh i SAC lei 10 an thi, kahdohnak hi sml 1 le cheu leng a rau tiah theih a si. Credit; The Chinland Post