Mandalay PDF Nih SAC Raltuknak Tank Pakhat An Hrawh I Meithal Le Hriamngan Dang Zong An Laak!
==========
Shan ramkulh, Naungcho peng Ummati- Ummakha lamṭhen pawng ah SAC ralkap raltuknak tank cu tualchung hriamtlai phu kahnak in a rawk i methal zun 6 le hriamngan zeimawzat an laak khawh, tiah Mandalay PDF in ṭuanvo ngei Aungsamon nih a chim.
November 1, zanlei suimilam 4:27 ah Pyn Oo Lwin in Naungcho khua lei hoih in raltuknak tank 2 le motor 28 he a kalmi SAC ralkap 150 hrawng cu Mandalay PDF nih Naungcho peng Ummati-Ummakha lamṭhen pawng ah an kah hna i raltuknak tank pakhat a rawk i SAC ralkap pawl cu hnu an tolh. Tualchung hriamtlai phu nih SAC ralkap hmanmi MA1 zun 1, MA2 zun 3, MA3 zun 2 le a dang hriamngan pawl an laak khawh, tiah theih a si.
“Raltuknak tank cu kan kah i meikhu a zelh in aa zel i hnu an tolh, kaphnih kar kahdohnak a fah caah SAC ralkap thi zat a fiang rih lo, meithal zun 6 cu kan laak khawh,” tiah ṭuanvo ngei Aungsamon nih cun a chim. Naungcho peng ah kaphnih kar kahdohnak a um lo nain SAC ralkap nih zing suimilam 11 hrawng ah voi khat, chunhnu hrawng ah voi 1 tiin Jet Fighter in kahdohnak a tuah.
Kaphnih kar an i kahdoh lio zong ah vanlawng in sehmeithal he voi 14 nak tlawm lo kah an bawmh hna, tiah theih a si.
Tuzan suimilam 7 tiang ah kaphnih kar kahdohnak fak a chuak i SAC pawl zong hmai an fong kho lo, tiah Mandalay PDF nih thawng an thanh. PDF Mandalay cu NUG Defense Ministry tang ah a ummi phu an si i 2023 October 26 ni thawk in Taungtaman Operation an kalpi, tiah theih a si.
SAC Nih Hramhram In Nawlngeihnak An Laak Hnu Ni 1000 Chung Ah Tualchung Mi 4000 Leng An Thi! SAC ralkap nih hramhram in nawlngeihnak an laak hnu ni 1000 chung ah sualnak ngei lo tualchung mi 4000 leng an thi, tiah ramkhel thongtla zohkhenhtu phu Assistance Association for Political Prisioners nih an thanh. 2021 February 1 – 2023 October 31 tiang ah sualnak ngei lo tualchung mi 4000 leng an thi, cu chung ah nu 630 an i tel i ngakchia 476 an i tel, cu pin ah hramhram in thahnawn a tongmi 1507 an si, tiah AAPP nih an thanh.
SAC ralkap nih hramhram in nawlngeihnak an laak hnu ah Sagaing ramṭhen in tualchung mi a thimi an tam bik i 2000 tluk an thi, Mandalay, Magway, Yangon le Bago ramṭhen hna zong ah SAC hriamngan ruang ah a thimi an tam ngai, tiah theih a si. Cu pin ah SAC ralkap nih hramhram in nawlngeihnak an laak hnu ah tualchung mi 25000 leng an tlaih hna, tiah theih a si.
Chaklei Hriamtlai Phu Unau Thum Hna Nih An Tuahmi Operation 1027 Kong Ah CNF Nih Cathanh An Chuah. Chaklei hriamtlai phu unau thum hna nih an tuahmi Operation 1027 kong he pehtlai in Chin National Front (CNF) nih October 30 ah cathanh an chuah.
Hriamtlai phu unau thum MNTJP/MNDAA, PSLF/TNLA, ULA/AA nih mipi duhmi SAC uknak ṭha lo a hram bongh ding, mipi innlo le chawva humhimpiak, hmunram zohkhenhnak kong le vanlawng kahdohnak khamnak ding, online chung tangka lentecelh in i hlennak lohternak, SAC ralkap le Pyituhsit phu hna fimhlawmnak ca ah tiin 1027 Operation nan kalpimi cung ah kan lung a tling, tiah CNF nih cathanh an chuah.
Hriamtlai phu unau thum nih October 27 thawk in Operation 1027 nan kalpinak in SAC ralkap sakhan le an hriamnam hna nan laak i teinak nan hmuhnak cung ah kan i lawm i, kahdohnak kip ah teinak a hmu khotu si hram ko u tiin kan duhnak kan rak langhter, tiah CNF nih cun cathanh an chuah.
SAC ralkap nih rampi nawlngeihnak a laak ruang ah ralkap nawlngeihnak cu a hram in kan bongh lai, tlangcung mi nih a dikmi ramkhel in ramkomh sernak ding ca ah caanṭha a si. Cucaah atu bantuk caanṭha cu liamter sawh lo in hriamtlai phu unau thum hna he kahdohnak ah kan i tel ve lai, tiah CNF nih an cathanh chuahmi ah an langhter. Credit: The Chin Post