Mipi ralkap nih Ralhrang Gate Drone Bom in an phomh hna!
========
Pakhokku Khua Lutnak Inpin Gate Drone Bom In SAC Ralkap 1 A Thi, 3 Hliam An Tuar, Myaing Peng Hnisikan Khua Pawng SAC Thilri Phor Motor Drone In Bomb An Thlak. Magwe ramthen, Pakhokku khua lutnak Inpin gate cu August 22, zaanlei sml 4:00pm ah Drone bom an thlak hnawh hna I SAC ralkap 1 a thi, hliam tuar mi 3 a um tiah Middle Revolution Task Force (MRTF) Drone ralkap bu nih Yangon Khit Tit ah an chim.
Cun, August 31 ah MRTF, DMG, RPTF le Shwe Daa Bo phu hna nih Myaing peng Hnisiikan khua thlanglei ah SAC motor nawncek ah a tap mi cu drone bom an thlak hnawh hna I SAC lei a thi mi le hliam a pu mi an um lai tiah MRTF drone ralkap bu sin in theih a si.
Kantbalu Peng Khuate Ah SAC Ralkap Nih Khuachung Mi Ni 2 Chung Ah Mi 6 An Thah Hna. Sagaing ramthen, Kantbalu peng, Zikung MEC Cini sehzung pawng a um mi khua ah SAC ralkap le Pyusawhti phu hna nih ni 2 chung ah khuachung mi 5 le mipi ralkap 1 an thah hna tiah theih a si.
LIB 361 ralkap bu hruai mi hriamtlai 100 hrawng hna cu Khin –U peng in Kantbalu peng ah August 25 in an lut. SAC ralkap nih Myanmar Economic Corporation MEC Cini sehzung pawngkam Ywar Tit, Palanchaing, Sisunkyi le Tayetkhaung khua pawl ah mithil chuh in lainawnnak an tuah tiah Myanmar Now nih a chim.
SAC ralkap Khuachung an luh caan ah mipi inn ah luh in thil an lak /fir hnu ah MEC Cini sehzung ah an kalpi. MEC Cini sehzung saknak ah 1999 kum lio SAC ralkap nih khuami sin in vawlei acre 880 leng cu acre pakhat ah kyat 2000 tangka pek hramhram in an lak mi a si.
Kantbalu peng nitlak lei khua pawl cu SAC ralkap leitang Buddhist phungki U Ywar Ta Wa le a ralkap Pyusawhti- Pyituhsit thazang an ṭhawnnak khua pawl an si. Atu khua mi thahnak ah LIB 361 ralkap Operation ah Pyusawhti minung a cheu hrawng an i tel lai tiah khuami hna nih an chim.
Kalaymyo Khuachung Ah SAC Kuttang Sianginn Saya 3 Tlaih An Tong. Kalaymyo khuachung ah SAC kuttang sianginn saya 3 cu August 7 le 8 ah Kalaymyo pengkomh mipi ralkap nih an tlaih hna tiah theih a si. August 7, zing sml 11:30am ah Kalay pengkomh mipi ralkap Urban Operation hruaitu le ralkap hna nih Taungphila sang um siangsangruun (High school No. 9) hlan No. 13 sianguk U San Tun Maung – High School Head Master le U Vum Suam Khai -Assistant Teacher, saya 2 cu an tlaih hna i, August 26 ah Kalaymyo peng palek (South) sakhaan ah an kuat hna. An pahnih in 52|(A) in tazacuai an tong.
Tlaih a tong mi Vum Suam Khai hringtu anu hi SAC kuttang sangsangruun High School no. 6 ah SAT sayamah rianṭuan lio mi a si i, a farnu pakhat zong SAC kuttang Komaing sianginn ah JAT sayamah rianṭuan lio mi a si tiah Kalay Township People’s Police (KPP) nih cathanhnak an tuah.
Kalaymyo peng Kyaukkar khua Sianglairuun Middle School Headmaster Mang Mang Khin zong SAC ralkap leiṭang tu tiah Kalaymyo pengkomh mipi ralkap nih August 8, zanlei 6:30pm ah an rak tlaih. Kyaukkar khua ah Middle School Head master a ṭuan lio mi Mang Mang Khin cu Kalaymyo khuachung Urban Operation UG lutlai a changtu nih Kalaymyo khuachung Taungphila sang a amah inn a um lio caan an theih i, mipi ralkap 7 he an va tlaih hi a si. Kyuakkar khua cu Kalaymyo thlanglei um khuate pakhat a si.
Tlaih a tonh mi saya 3 hna cu NUG kuttang a um mi, Kalaymyo biaceihnak zung ah a konglam ceihkhan ding in an tawlrel lio a si tiah Kalay Township People’s Police (KPP) nih August 31, 2023 ah ca thanh an chuah hi a si.
Demoso- Hpruso Lamcung, Thlakhat Chung Kahdohnak Ah SAC Ralbawi Telh In 70 Leng An Thi. Karen ram, Demoso-Hpruso lamcung ah a cang mi kahdohnak pawl ah SAC lei ralbawi telh in 70 leng an thi i hriam tamlak te zong an lak khawh tiah theih a si.
August 3-30 tiang Demoso-Hpruso lamcung le Ngwetaung khuate lei ah a rak lut mi SAC ralkap pawl cu Battle Wings, 1106 Battalion, T2S2 Technology phu le adang phu tampi fonh in Operation voi 20 an tuah i bom lung 54 leng an thlak tiah theih a si. Kahdohnak pawl chung ah SAC lei ralbawi telh in 70 leng an thi, tamlak an i hliam i hriam tampi zong an lak khawh tiah Naypyitaw PDF nih thawng an thanh.
Kahdohnak pawl ah KA, KNDF, Naypyitaw PDF, DMO Local PDF le adang phu pawl cu Karenni phu pawl hruainak in kahdohnak an tuah hi a si i mipi hriamtlai phufonh lei zong in a nunnak a liam mi an um tiah an langhter. Credit: The Chinland Post