Mino Pawl Ralkap Tlakter Ding Ah Mincazin A Latu SAC Kuttang Rianṭuan 16 Fimhlawm An Si Cang. Myanmar ram hmun kip ah SAC nih ralkap tlak ding ti mi phung a chuah mi zulhpiak in rian a ṭuan i mino pawl mincazin a latu SAC kuttang rianṭuan khuabawi le chungtel minung 16 fimhlawm an si cang.
RFA nih an khawmh mi cazin ning ah SAC nih a luancia March 10 ni ah Myanmar ram mino ralkap tlak ding ti mi phung an ser hnu in nizan March 25 tiang ah Sagaing ramṭhen, Magway ramṭhen, Mandalay ramṭhen, Bago ramṭhen, Mon ramkulh le Rakhine ramkulh chung khuabawi, sangbawi le penguk zung cazi minung 16 fimhlawm an si cang.
SAC nih mino ralkap tlakter ding ti mi phung an chuah hnu in, cu bantuk cawlcanghnak ah i tel lo ding in tualchung hriamtlai phu PDF nih ralrin an pek hna hnu ah nawl a ngai lo mi cu an fimhlawm hna, tiah theih a si.
SAC nih ralkap tla ding mi mino pawl khawm ding in peng kip ah rianṭuantu phu an dinhter hna i khuabawi le sangbawi an tawlrelter hna, tiah sangbawi chungtel pakhat nih a chim. Myanmar ram hmun kip ah mino pawl ralkap tlakter ding ti mi phung an chuah hnu in ralkap tla ding mi mino nuai 13 an um, tiah SAC nih an chim. The Chin Post