ASEAN Bu Chungtel Philippines Ram Ah Min Aung Hlaing Telh In SAC Lutlai Mi 10 Tazacuai Ding In Timhtuah Lio A Si!
===========
ASEAN ram chungtel Philippines ram ah Min Aung Hlaing telh in SAC lutlai 10 cu tazacuai ding in timhtuahnak an ngeih lio a sinak kong cu Chin Human Rights Organization nih thawngthanhnak a tuah. SAC ralhrang nih ramchung mipi thahnawmnak a tuah mi kong, inn meikhanghnak, Khrihfa biakinn hrawh mi, nuhrin covo buarnak vialte cu Philippines ram tazacuainak zung ah tazacuai ding in soknak ca an chaih cang; Chin ramkulh ah ralhrang kut in harnak a ingtu minung 5 nih Philippines upadi bantuk in Philippines ram sihni he bawm in Min Aung Hlaing hruai mi ralhrang nih sualnak a tuah mi vialte cu hlathlainak tuah ding in nawl an hal hna.
Chin ramkulh, Thantlang peng ah 2021 kum ralkap uknak a lak hnu in ralhrang nih inn 2,000 leng a hrawh, mi 250 nak tlawnlo a thahnak, milu 60,000 leng India ram an zaamnak kong te pawl tazacuainak kong pawl Khit Thit media nih a tial.
Tazacuainak kong ah September 29, 2021 kum Thantlang khua ah an thah mi Pu Ral Tu fanu zong aa tel. Pu Hram Cung le Pu Ral Tu hna pahnih hi Thantlang khuachung kahdohnak lio ah mipi a tli zaam mi caah sii an va lak lio ah SAC ralkap kut in an thi. September 18 ni 2021 Pastor Cung Biak Hum zong ralkap kahnak in a nunnak a liam.
Philippines sihni Romel Bagares le Gilbert Andres chimning ahcun, vawlei cung nuhrin covo dirhkamhnak ding ah vawlei cung khuazei hmun poah ah nuhrin covo nawl a buar mi kong hi tazacuainak nawl onh cu Philippines ram zong ah tazacuainak nawl a umnak tiah Sihni nih cun an chim.
Cyclone HAMOON Ruangah Chin Ramkulh Telh In Ramṭhen Le Ramkulh Tampi Ah Tilian Le Mincimhnak A Chuak Kho. Chittagong thlanglei in Bangladesh rili ah a kalmi Cyclone HAMOON cu nichuah chaklei ah aa ṭhial cang caah Myanmar ram hmun tampi ah ruah lo piin ti a ngan kho i min cimhnak zong a chuak kho, tiah Myanmar ram khuacaan tuaktannak zung nih nihin October 25 zinglei ah an thanh.
Cyclone thlichia HAMOON ruangah nihin October 25 in thaizing 26 tiang Sagaing ramṭhen, Mandalay ramṭhen, Magway ramṭhen, Kachin ramkulh, Shan ramkulh nichuah, chaklei le thlanglei, Chin ramkulh, Rakhine ramkulh le Naypyidaw ah ruah a sur kho i Sagaing ramṭhen, Mandalay ramṭhen, Magway ramṭhen, Kachin ramkulh, Chin ramkulh le Rakhine ramkulh ah faak piin ruah a sur kho, tiah an langhter.
Cyclone thlichia HAMOON ruangah thli hrannak, faak piin ruah surnak a chuak chuak kho i tilian le mincimhnak zong a chuak kho. Min cimhnak a chuak khomi a si caah tlang par a ummi hna i ralring ding in le Rakhine ramkulh rili kam ummi, tivate kam ummi le tiva ngan deuh kam i a ummi zong khuacaan tuaktantu nih ralrin an pek hna pinah rili ah nga tlaitu hna zong a hlankan in i ralring ding in ralrin an pek hna, tiah theih a si.
Cyclone thlichia HAMOON cu nichuah chaklei ah aa ṭhial chin lengmang khomi a si caah India ram Mizoram ramkulh ah thlichia hme in aa thlen khawh pinah Chin ramkulh le India ramri zong ah thli a hrang kho, tiah khuacaan tuaktantu hna nih cun an zumh.
Ruah Tam Tuk A Sur Caah Yangon Ah Ti A Lian. Yangon ah October 24 ah ruah faak tuk in a sur i ti a lianh caah zan tiang tilian nih motor lam a phih dih, tiah Yangon ummi hna nih Khit Thit Media ah an chim. October 24 zanlei thawk in Yangon ah ruah faak tuk in a sur i Yangon khuapi peng cheukhat ah ti a lian. Ti a lianhnak hmun hna hi Tamwe, South Okkalapa le Thingangyun peng hna an si, tiah theih a si.
Taxi khaltu pakhat nih cun, “October 24 zan suimilam 8:00 luan tiang ah lam cung ti aa dilmi a zor hlei lo. Wayzayana lam zong ti a ngan tuk. Tamuai Ocean, Bahan lei kap zong a ngan ngaingai nain ti a zor deuh cang,” tiah a chim.
Khuacaan tuaktantu zung nih an thanh ning ah Bengal rili in nitlak chaklei ah a chuakmi Cyclone thlichia “HAMOON” cu nichuah chaklei ah aa ṭhial i Myanmar ram, Thandwe khua nitlaklei-nitlak chaklei ti lam meng 255 hrawng, Sittwe khua in nitlaklei-nitlak chaklei ti lam meng 140 hrawng, Maungdaw khuapi in nitlaklei ti lam meng 105 hrawng, India ram Digha khuapi(West Bengal) in nichuahlei- nichuah thlanglei ti lam meng 175 hrawng, Bangladesh ram Khepupara in thlanglei-nichuah thlanglei ti lam meng 80 hrawng le Chittagong in nitlak thlanglei ti lam meng 125 hrawng aa hlatnak ah thlichia a hrang kho. Hi thlichia ruangah Yangon telh in Myanmar ram chung ah faak piin ruah a sur kho, tiah an thanh.