SAC Hruainak Kuttang Ah Riantuan Duh Ti Lo Mi Thlali Chung Ah CDM Ralkap 500 An Um!
=======
SAC Hruainak kuttang ah riantuan duh ti lo mi thlali chung ah CDM ralkap 500 nih SAC an chuahtak tiah NUG Prime Minister Mahn Win Khaing Tan nih a chim tiah Khit Thit media nih a langhter. August 22, National Union Government (NUG) cozah a voi 28nak meeting ah a chim hi a si.
Ralhrang SAC kuttang ah riantuan duh ti lo in a tli mi CDM ralkap cu August thla chung ah 50 leng an si cang, April in July thla 4 tiang cazin ah Battalion Commander lutlai chang Major 1 telh in ralkap 500 an si. Mah hmah cu kanmah he pehtlainak a tuah mi an si i pehtlainak a tuah rih lo mi zong an um rih ko tiah Minister Mahn Win Khaing Tan nih NUG cozah meeting ah a chim.
Nihin ah a lamkip in thazang a zor ngai mi SAC nih CDMer cozah riantuantu pawl cu ralkap tuanter ding in cazin an lak mi zoh tik ah SAC thazang an ngei ti lo hi a fiang ko cang caah Khuapau dohthlennak ah teinak thandar thlirnak caan a nai ko cang tiah a chim chap.
Nihin Kachin ramkulh le Shan ramkulh ahcun Myanmar ram pumpi ah nifatin in kahdohnak a um cang i, SAC ralkap an thazang a der ngai ruang ah Non-CDM pawl raltu ding in min cazin lak in cheukhat cu ralkap training an kai ter cuahmah lio a si tiah People Spring news nih a chim.
2022 April 18, SAC tang ah rianṭuan duh lo in a nuar mi (CDM) ralkap 10,000 deng an si cang tiah NUG Chief Minister Mahn Win Khaing Than nih April 18 ah tuah mi Hluttaw meeting ah a rak chim bal. Cun CDM tuah a duh ko nain, a ruang tampi ruang ah a tuah kho lo mi ralkap zong an um i, anmah sin in ralkap chung thawngpang pawl kan lak khawh tiah a chim fawn.
Raltuknak vanlawng pawl he CDM nan tuah a si ahcun sing thonghra, SAC nih hman mi vanlawng, Helicopter, thilphor vanlawng, raltuknak vanlawng hrawh khawh, tlak ding in tuah hram in CDM nan tuah a si ahcun sing thongruk laksawng pek nan si lai tiah NUG nih a rak thap.
Cun, SAC nih datsi an chiahnak, hriamnam an chiahnak nan hrawh khawh a si ahcun, asilole CDM nan luh lio ah tank, khamnak mawṭaw (Armor) nan rak i put khawh a si ahcun sing thonghnih laksawng pek nan si lai tiah a rak thanh.
Demoso Kahdohnak Ah Dothlennak Phu Pawl Nih Hriamngan Hmang In An Doh Ve Hna. Karenni ram, Demoso peng, Ngwetaung khuathar kahdohnak ah SAC ralkap pawl kha dothlennak phu pawl nih hriamngan hmang in an doh ṭhan ve hna tiah The Irrawaddy nih a langhter.
Demoso peng, Ngwetaung khuathar pawngkam, August 22 zinglei ah hmunhma tlai kho ding in a rak lut mi SAC ralkap le dothlennak phu pawl karlak ah kahdohnak a chuak. SAC nih vanlei hmang in kahdohnak an tuah tiah theih a si.
“Kanmah lei nih 120MM, 60MM hna hmang in kan doh ve hna” tiah kahdohnak ah aa tel mi hriamtlai pakhat nih The Irrawaddy ah a chim. Mese peng June thla chung ah a cang mi sakhaan lak kahdohnak pawl ah dothlennak phu pawl nih 120MM hriamngan 2 an rak lak khawh. Demoso le Hpruso peng hna ah August 2 thawk in kahdohnak a chuak i SAC lei 71 nak tlawm lo an thi cang i, hriam tampi zong an lak khawh tiah theih a si.
Hramhram In Uknak Lak Ruang Ah A Chuak Mi Dothlennak Pawl. Rian a ṭuan cuahmah mi cozah kha phu hme pakhat khat nih a thlak ahcun hramhram in uknak lak a si tiah Britannica Encyclopedia nih a sullam a fianh. Hramhram in uknak lak a si ahcun ralkap, palek le adang zatlang phu pawl an zapi asilole cheukhat tlaih khawh hi a herh hrimhrim mi a si tiah a fianh.
Myanmar ram ah 1962, 1988 le 2021 ah a cang mi hramhram in uknak chuh mi vialte hi ralkap nih an tuah mi lawngte a si caah a cunglei ah Britannica Encyclopedia nih a langhter mi vialte a tling/a tlaih dih cang.
2021 February 1 ah ralkap nih hramhram in uknak a lak mi hi 2023 July 26 i Niger ram ah hramhram in uknak an lak mi dirhmun he aa khat ngai. Chan tampi ralkap nih a hip/uk i 2016 thimnak ah teinak a hmu mi NLD cozah kha a voikhatnak bik uknak nawl a pek a si nain 2020 thimnak ah teinak a hmu ṭhan i 2021 Hluttaw a auh hlan deuh ah ralkap nih hramhram in uknak a lak.
Niger ram zong ah mipi thim mi President nih adang pakhat kha dai tein uknak nawl a pek hnu kum 2 a rauh ah hramhram in uknak an lak ṭhan ve. Caretaker Government (အိမ်စောင့်အစိုးရ) tuak chih lo ahcun ralkap nih uknak a lak hi a voithumnak a si i Niger ram hi a voilinak a si. Credit: The Chinland Post