Hramhram In Nawlngeihnak Laak A Si Hnu In SAC Ralkap Vanlawng Rawkmi A Tam!
========
SAC ralkap nih hramhram in nawlngeihnak an laak kum 3 tluk chung ah ralkap vanlawng 7 a rawk, tiah Delta News Agency nih an langhter. 2021 May thla chung ah Kachin ramkulh, Momauk peng ah SAC ralkap raltuknak vanlawng MI-35P cu a rak rawk i ralkap vanlawng rawk hmasa bik a si. Sagaing ramṭhen Homalin peng ah tualchung hriamtlai phu nih MI-17 zong an rak thlak khawh i a rawk.
Cu pin ah 2023 June thla chung ah Karenni ramkulh ah SAC ralkap vanlawng pakhat cu Karenni hriamtlai phu nih an rak thlak khawh. Cun November thla chung zong ah KNDF nih ralkap vanlawng K-8W pakhat an rak thlak i a rawk. Cu lioah cun vanlawng khaltu ralbawi pahnih cu an rak zaam nain pakhat cu tualchung hriamtlai phu nih an rak tlaih khawh. Nizan January 3 zong ah Kachin ramkulh, Wyandmao peng chung ah riahcaw phurhmi ralkap vanlawng cu KIA nih an kah i ralkap 6 an thi, vanlawng khaltu ralbawi pakhat an tlaih khawh.
2022 March thla chung ah SAC kuttang rianṭuan siangcachim pawl a rak phurtu ralkap vanlawng cu Chinram, Hakha khuapi pawng ah a rak tla. Cu pin ah 2023 June thla chung ah Naypyidaw, Lewe peng ah vanlawng khaltu ralbawi pakhat le a kuttang pa pakhat cu an rak tla i an thihnak kong cu SAC lei zong nih fehter in an rak thanh.
SAC Ralkap Byuha Sakhan Pakhat Cu TNLA Hruainak In Ṭangṭi Phu Nih An Laak. Ta’ang ralkap TNLA hruainak in tualchung hriamtlai ṭangṭi phu nih Naungcho peng Thanbo khua ah hrambunhmi SAC ralkap Byuha sakhan pakhat cu luhhnawh in an kah hnu ah an laak khawh, tiah Mandalay PDF nih nihin January 4 ah an thanh.
Cu sakhan kahdohnak ah cun Drone Jammer seh nganmi pawl telh in hriamngan dang tam ngai zong an laak khawh, tiah Mandalay PDF nih cun an langhter. Cu pin ah nizan January 3 chun ah Kyaukme in Thanbo khua lei ah kahdoh bawm ding in motor 3 he a kalmi ralkap pawl cu ṭangṭi phu nih an kah hna i ralkap thimi an tam, ralbawi pakhat zong an tlaih.
Thanbo khua kahdohnak ah cun tualchung hriamtlai phu lei in ram ca ah nunnak pemi an um ve bantukin atu tan sakhan laakmi cu mizapi ca ah kum thar laksawng ah cang hram seh, tiah Mandalay PDF nih cun an thanh.
Kanyutkwin Khuapi Pawng SAC Ralkap Sakhan 8 Cu KNLA Le Ṭangṭi Phu Nih An Laak. Yangon-Mandalay lam hlun Kanyutkwin khuapi pawng SAC ralkap sakhan cu KNLA hruainak in tualchung hriamtlai ṭangṭi phu nih nihin January 4 zinglei ah ah an kah i suimilam pakhat chung ah sakhan 8 an laak khawh, tiah KNU nih an thanh.
Nihin January 4, zinglei suimilam 4:30 hrawng ah KNLA le tualchung hriamtlai ṭangṭi phu nih Kanyutkwin khuapi pawng SAC ralkap sakhan 8 cu an laak khawh. Cu sakhan kahdohnak ah cun ralkap 20 hrawng an thi i hriamnam tam ngai zong an laak khawh, tiah thlanglei ramṭhen in PDF Battalion pakhat nih an thanh ve.
Phyu Peng SAC Ralkap Sakhan Kahdohnak Ah SAC Ralkap 20 An Thi. Bago ramṭhen, Phyu peng Kanyutkwin khuapi, Konetey khua pawng um SAC ralkap sakhan 5 kahdohnak ah SAC ralkap 20 an thihnak kong cu Tawwin Daung Column nih an langhter. Nihin January 4, zinglei suimilam 3:00 ah Yangon-Mandalay lam hlun Kanyutkwin khuapi, Konetey khua pawng um SAC ralkap sakhan 5 cu PDF ṭangṭi phu nih an kah i SAC ralkap 20 an thi, sakhan a zaamtak mi zong a tam, tiah theih a si.
Nihin January 4, zinglei kahdohnak ah tualchung mi pakhat a thihnak kong le Kanyutkwin khuapi he aa naihnak ah a ummi meng 142 thir hlei a cahnak kong zong tualchung mi hna nih an chim.
Pyu peng le Kyauktaga peng kar a ummi thir hlei a cahnak, Kanyutkwin khuapi he meng 2 aa hlatnak Taungkone khua ah kahdohnak aa thawknak le kahdohnak chung ah tualchung mi pakhat a thihnak kong cu tualchung mi pakhat nih Khit Thit Media ah a chim.
SAC Nih Thongtla 9,652 Le Ramdang Mi 114 Thonginn In An Chuah Hna. Myanmar ram zalonnak hmuh ni kum 78 tlin camtuak philhlonak ah thongtla 9,652 le ramdang mi 114 luatnak an pek hnanak kong cu nihin January 4 zinglei ah SAC nih thanhnak an tuah.
Nihin January 4, thanhnak an tuahmi ah thongtla 9,652 cu an sual an ngaihthiamnak hna le hi hnu sualnak an tuah rih ahcun thongthlak ṭhan dingin bia an khiahpiak hnanak zong an langhter chih.
Cu bantuk ṭhiamṭhiam in ramdang mi thongtla 114 zong an sualnak an ngaihthiam hna i an thlah ṭhan cang hna nain Myanmar ram chung ah um kho ti lo ding in dan an tat hna, tiah theih a si.