SAC Nih Rampi Thimnak Ca Ah Milu Cazin Laak Hneksaknak Cu Hakha Zong Ah An Tuah Lai!
===========
Rampi thimnak ca ah rammi milu cazin laak hneksaknak cu SAC nih October 1-15 tiang peng 20 ah an tuah lai i, Chin ramkulh khualipi Halkha zong ah an tuah ve lai, tiah theih a si. SAC nih milu cazin laak hneksaknak kan tuahnak peng hna cu Pathein, Mawlamyaing, Bago, Ralhine chaklei Maungtaw, Chin ramkulh khualipi Hakha le Sagaing ramṭhen khualipi Monywa peng ah a si, tiah an langhter. Hmun dang cu fiang tein an langhter rih lo.
SAC nih an langhter mi hmanthlak ah milu cazin latu hna cu ralkap le palik nih humhimnak an laakpiak hnanak hmuh khawh a si. Sagaing ramṭhen khualipi Monywa ah October 2 ah milu cazin a latu hna zong Nah Mah Khah uktu pa nih a va zoh hna.
Milu cazin laak hneksaknak hi thimnak vote cazin ca ah a si. 2024 ah rampi milu cazin laaknak tuah a si lai i cu hnu ah thimnak tuah a si lai, tiah SAC ralbawi zik Min Aung Hlaing nih a chim.
2023 kum chung ah Yangon telh in hmun cheukhat ah SAC nih milu cazin laaknak an rak tuah i cu bantuk thil tuah cu lih le hrokhrawl thil tuah a si caah mizapi cu i tel ve lo ding in le aa telmi cu ralhrang dohnak upadi in dantat nan si lai, tiah NUG nih an rak thanh.
Hakha Khua Leisen Sang Inn Cheukhat Ah SAC Ralkap le Palek Pawl An Lutchuak! Chin ramkulh, Hakha khua, Leisen sang, Senthang Biakinn pawnghrawng inn cheukhat ah SAC ralkap le palek pawl an lutchuak tiah thawng theih a si. October 2 zinglei ah SAC ralkap pawl nih atu bantuk in Leisen sang, Senthang biakinn pawnghrawng mipi inn pawl an luhchuah hi a si.
“Nizaan in SAC ralkap mawṭaw pakhat cu No. 4 B.E.H.S hmai ah an dirter i lam a cheu zong a phih. Cun No. 4 B.E.H.S luhnak pawng ah a um mi dawr hmete cung ah an ṭhu. Mawṭaw umkal mi cheukhat zong an chek hna. Tuni (October 2) ahcun Senthang biakinn lei inn cheukhat pawl an lutchuak. An mawṭaw zong No. 4 B.E.H.S hmai ah a um rih ko” tiah Hakha khua a um mi pakhat nih The Chinland Post ah a chim.
SAC ralkap pawl nih atu bantuk in mipi inn cheukhat ah an luhchuahnak kong he pehtlai in khuami cheukhat nih သန်းခေါင်စာရင်း an la i အိမ်ထောင်စုစာရင်း he ṭha tein an zoh chih tiah an chim ko nain The Chinland Post nih adang tein a fehter khawh mi a um rih lo.
Mindat Khua September Thla Chung Kahdohnak Ah SAC Ralkap 4 An Thi I 9 An I Hliam. Chin ramkulh, Mindat peng, September thla chung ah CDF-Mindat le SAC ralkap karlak ah kahdohnak voi 5 a chuak i SAC lei 4 an thi, 9 an i hliam tiah CDF-Mindat nih October 1 ah thawng a thanh.
September 7 ah, Mindat khuachung Bawathit sang kahdohnak ah SAC chungtel 2 an thi i 7 an i hliam. Cubantuk in September 13 meng 5 University pawng kahdohnak ah CDF-Mindat hriamtlai 1 a nunnak a liam, 1 aa hliam tiah theih a si. CDF-Mindat le a hawikom phu nih September 18 ah Magway ramṭhen, Kyaw hmunhma kahdohnak ah SAC hriam le kuanzen pawl an lak khawh.
Cun September 24 khuachung kahdohnak ah SAC chungtel 2 an thi chap i September 26 le 29 i khuachung kahdohnak ah SAC ralkap kah mi hriamngan nih mipi 2 a hliamh hna. Mindat peng September thlachung ah SAC ralkap nih sualnak ngei lo mipi 60 a tlaih hna i 50 a thlah ṭhan hna nain 10 cu a thlah rih hna lo tiah CDF-Mindat thawngthanhnak in theih a si.
Mindat Khua Luhnak Gate A Naih Tein An Kah. Mindat khua, ni chuahlei meithat zung umnak pawng, SAC ralkap Gate kahdohnak muicawl cu CDF-Mindat nih an thlah. Kahdohnak hi September 24 zinglei ah CDF-Mindat Battalion 1 nih an tuah mi a si. Muicawl chung ah SAC ralkap 1 a tluk kha hmuh khawh a si. Mindat peng thlakhat chung ah kahdohnak voi 5 a chuak i kaphnih lei a thi mi an um tiah CDF-Mindat nih October 1 ah a rak thanh.
Kum 2 Le Cheu Leng Caan Chung Ah SAC Ralkap Nih Mipi Inn 86,000 Leng An Khangh. Hramhram in uknak lak a si hnu kum 2 le cheu leng caan chung ah Myanmar ramchung mipi inn 86,000 leng a kaang cang tiah Institute for Strategy and Policy (ISP-Myanmar) nih a thanh.
Khangh a tong mi inn hi 86,134 nak tlawm lo a phan cang i cu chung i 72% hi Sagaing ramṭhen ah a kang mi an si. Cun 2023 August tiang Myanmar ramchung ah a kaang mi inn hi Sagaing ramṭhen ah a tam bik i 80% hrawng a si tiah an langhter.
Mipi in khanghnak hi 2022 February thla ah a karh chin i SAC ralkap pawl kahdohnak ningcang (byuha) hi mah nih va kah nak in mah umnak sakhaan runven a si deuh cang caah 2023 kum lai hrawng cun inn khangh a tong mi a zor deuh ngai. Inn khangh a tong mi peng le ramṭhen a tambik hi Sagaing ramṭhen dih in Magway ramṭhen nih a zulh i Rakhine ramṭhen hi inn khangh a tlawmbik ram a si i inn 14 nak tlawm lo a si tiah an langhter.
Dothlennak caan chung ah SAC ralkap nih Chin ramkulh chung mipi inn a kangh mi hi 1,544 leng a phan cang tiah ISP-Myanmar nih cun a langhter. Sagaing ramṭhen, Kachin ram, Chin ram leng ah ramchung hmun tampi ah kahdohnak a fak peng rih.