TNLA Sakhan Pakhat SAC Ralhrang Nih Cunglei In A Kah Caah TNLA Ralkap 5 Hliam An Tuar!
=========
Shan ramkulh, Lashio peng, Einaing khua pawng um Ta’ang National Liberation Army(TNLA) ralkap sakhan cu SAC ralhrang nih cunglei in a kah caah TNLA ralkap 5 nih hliamhma an tuar, tiah TNLA nih July 28 cathanh an chuah.
July 27, zinglei suimilam 10:30 tluk ah SAC ralhrang nih Mi-35 raltuknak helicopter 2 in TNLA Brigade-4 hmunram chung cu bomb 15 naak tlawm lo in a thlak. Lashio khuapi cu minute tlampal chung a hel hnu ah atu bantuk in bomb a thlak hi a si, tiah kan theih. SAC ralhrang nih atu bantuk in bomb a thlakmi ruang ah TNLA ralkap 5 nih hliamhma an tuar i inn 1 zong a rawk chih, tiah PSLF/TNLA thawngzamhnak nih a langhter.
Hpasawng Khuapi Pawng Um SAC Ralhrang Sakhan An Laak; Ralhrang Thimi An Tam. Karenni ramkulh, Hpasawng khuapi pawng um SAC ralhrang nih caan karlak umhmun an khuarnak sakhan cu Karenni Army(KA) nih an laak khawh i SAC ralhrang thimi zong an tam, tiah KA ralkap bawi Bhone Nine nih Khit Thit ah a chim.
July 27 zing ah Hpasawng khuapi chuahnak hmun um SAC ralhrang nih caan karlak chung umhmun an khuarnak sakhan kan luhhnawh caah an zaam tak dih hi a si i hriamthil tam ngai zong kan laak chih pinah SAC ralhrang lei thimi le hliam a pumi an tam nain an milu zah tu cu kan thei fiang kho rih lo, tiah a chim chih.
“A thimi le hliam a pumi an tam ngai lai tiah kan zumh i an hriamthil hna zong kan laak chih. Vanlawng pawl an rak zuang ngai ngai, nihin tu cu kahdohnak a um lo. Hnulei an pil dih caah an um ti lo, ngakchia pawl zong chuak/vaak hlah uh kan ti hna. A hnulei in an kan hel sual lai tiah ralrinnak kan pek hna. An zaam caah khawika lei an zaam ti kan thei kho rih lo” tiah a chunglei upa nih a chim chap.
Ramkomh Cozah, Ramkulh Federal Unit Commission le Karenni IEC, KSCC Meeting An Ngei. Ramkomh Cozah le Ramkulh Federal Unit Commission he caankharlak tangrual in riantuan ti ding in Karenni Interim Executive Council (IEC), Karenni State Consultative Council (KSCC) hna a voikhatnak Meeting cu July 28 ni ah an tuah tiah theih a si. Meeting ah Ramkomh Cozah le Ramkulh Federal Unit Commission Chairman caankarlak President Duwa Lashi La le Karenni State Consultative Council Aung San Oo nih onnak bia an chim.
Cun, Ramkomh Cozah le Ramkulh Federal Unit kharlak tamrual in riantuan ti ding Commission nih aa timh mi le hmailei a riantuan lai mi kong cu Ministry of Federal Affair’s Dr. Lian Hmung Sakhong, Karenni State Consultative Council phunglam le hmailei riantuan dingmi cu Council Chairman Aung San Oo le Karenni Interim Executive Council (IEC) Vice-Chairman Khun Bi Htu hna nih bia an chim.
Cu hnu ah Fimcawnnak, Ngandamnak, Harnak a tonmi sin bawm channak, Nu le ngakchia zohkhenhnak, Nuhrin covo, tangka kong, Uknak le raldohnak le a dangdang kong biaceihnak tampi an ngei.
Cun, National Unity Consultative Council ah ton biaruahnak ngaih ti thannak le hmailei karhlannak ah FSCC Secretary, IEC Secretary bu le KSCC Secretary chungtel he komh in Focal Group dirh ding in hnatlak nak an ngei.
Ramkomh Cozah le Ramkulh Federal Unit kharlak tamrual in riantuan ti ding Commission Vice-chairman Prime Minister Man Win Khaing Than le Karenni Interim Executive Council General Secretary Khu Pah Luh Reh hna donghnak bia chim hnu in meeting cu tluang te in an dih.
Meeting ah National Unity Government Duwa Lashi La, Union Prime Minister Man Win Khiang Than le Union Minister pawl, Karenni caankharlak council Chairman Aung San Myint le council chungtel, NUG committee chungtel Min Ko Naing le chungtel hna meeting a kai mi an si tiah theih a si.
Kalaymyo Letpanchaung Khua ah SAC Hriamngan Nih Mi 5 A Hliam. Sagaing ram, Kalaymyo peng Letpanchaung khua chungg SAC hriamngan kahnak ah khuami 5 hliam an tuar tiah theih a si. July 26 zaan 10:00 ah Kalaymyo hrambunh hriamngam battalion in Letpanchuang khua ah hriamngan 2 an kah i pakhat cu khuachung inn ah a tla caah mi 5 hliam an tonnak a si.
Kalaymyo peng chungah, June 1 – July 27 thlakhat leng ah hriamngan kah ruangah mipi 9 an thi i hliamtuar mi 31 leng an si. SAC lei nih runvennak an laknak hmun le an ralkap pawl umkalnak lam deuh ah nifatein hriamngam kahnak le bom puak a tam caah Kalay khuachung um mipi pawl cu thinphan in an um ko.
“July thlachungah khuachungah SAC lei hriamngan kahnak voi 10 leng a um i cheukhat inn ah a tla. Ralhrang nih an duhnak paoh ah hriamngan kahnak an tuah lengmang caah kan inncung ah hriamngan zeitik aa tla sual te hnga tiah thinphan in kan um ko” tiah khuachung pakhat nih RFA ah a chim.
Hriamngan kahnak a tuahmi ralkap bu cu kalaymyo hrambunh, keralkap battalion-365, battalion -228, Regional Operations Commands (ROC) (ဒေသကွပ်ကဲမှု စစ်ဌာနချုပ်) Kalay hna nih hriamngam kahnak an tuah ton. Credit: The Chin Post, The Chinland Post, Lungmili Media