Ngazun Peng Ralzaam Minung 5 SAC Ralkap Nih An Thah Hna
===========
Mandalay ramṭhen, Ngazun peng ralzaam minung 5 cu SAC ralkap nih an thah hna i ni 9 chung SAC ralkap nih hmunhma an samh caah khuami tampi himnak hmun ah an zaam tiah theih a si. August 14 zinglei sml 5:00am hrawng ah Sagaing ramṭhen, Myinmu peng in a rak chuak mi SAC ralkap pawl cu Myinmu peng, Yuadawlay khua ah meithal an puah i an rak luh lio ah Ngazun peng ralzaam minung 4 an thi i ralzaam minung 2 an i hliam leng ah mipi cheukhat zong an tlaih hna tiah Khit Thit nih a langhter.
August 5 thawk in ralkap nih Ngazun peng chung ah lut in Yelaytaung khua ah meithal an thlah ṭhan caah miung 1 a thi, 1 aa hliam tiah theih a si. Cun Ngazun peng, Htantabin khua cu SAC ralkap thazang 100 hrawng an lut i mipi inn an khangh, sualnak ngei lo mipi 25 an tlaih hna i minung 7 cu Myotha lei ah an kalpi hna tiah theih a si.
August 6 zong ah Nabepin khua ah SAC ralkap pawl zaan ah an lut i sualnak ngei lo mipi 6 an tlaih hna, August 13 ah Thakyin khua mipi 2 zong an tlaih fawn hna tiah Khit Thit nih cun a langhter.
SAC Ralhrang Sin Ah Kalaymyo Thlanglei Pyitusit- Pyusawhtii Khua 12 Min Bunh in Bawmhhalnak Ca An ṭial! Gangaw peng chaklei ramri khua a si mi, Kalaymyo peng thlanglei Pyitusit- Pyusawhtii khua 12 a si mi Kyaukphoih, Kyanthar, Innkyun, Kyuaksee, Manda, Hantawaddy, Lekyi nichuah, Lekyi nitlak, Myoukkhayaing, Shwemiatta, Tharyarwaddy, Kukku khua hna nih SAC sin ah bawmhnak ca an ṭial.
Bawmhnak ca an tial mi ahcun, kan nih khua 12 nih SAC ralkap dirkamh mi Pyitusit khua kan si caah kan khua ah Datsi le eidin thilril thla 6 leng kan ngei ti lo. Kalaymyo in meng 48 aa hlatnak khua ah kan um cio hna tik ah PDF misual/ralhrang hna nih thilril phorhnak phihpiak kan si hlei ah leikuang chuak thlai zong PDF nih an lak tawn. Cucaah Kalaymyo in thlanglei khua vialte kan himnak ding ah SAC lei nih PDF kahdoh ding le Operation kan tuahpiak uh tiah Buddhist phungki pa min tial in SAC ralhrang sin ah cakuat in bawmhhal nak a tuah.
Shadaw Ah SAC Hriam Chiahnak An Kah, SAC Ralkap 5 An Thi I Hriam Tampi An Lak Khawh. Karenni ram, Sharrtaw peng chung ah a um mi SAC ralkap hriam chiahnak buk pakhat cu Karenni phufonh pawl nih an kah hna i sakhaan an lak khawh leng ah SAC ralkap 5 an thi, hriam tampi an lak khawh tiah theih a si.
August 13 zaanlei sml 3:00pm ah Sharrtaw peng chung ah a um mi SAC ralkap sakhaan pawl ah riahcaw chan ding in chikhat hmunhma an khuarnak hriam an chiahnak buk cu Karenni phufonh pawl nih an kah i an lak beh, kahdohnak ruang ah SAC ralkap 5 an thi i hriam tampi zong an lak khawh. SAC ralkap pawl nih hriam an chiahnak buk zong an khangh beh khawh i Karenni phufonh lei in 2 an nunnak a liam ve tiah theih a si.
Kahdohnak a dih hnu ah Karenni dothlennak phu pawl sakhaan cu SAC nih vanlei in bom a thlak tiah theih a si. August 14 zinglei sml 3:13am ah SAC nih bom lung 1, 3:17am ah bom lung 1 tiah vanlei in Karenni sakhaan ah bom a rak thlak nain hau leng ah a tlak caah a rawk mi a um lo tiah theih a si.
Myaing Peng, Thayatkua Khua Ah A Um Mi Pyusawthi Sakhaan Kahdohnak Ah Ralkap 2 An Thi. Magway ramṭhen, Myaing peng, Thayatkua khuate ah a um mi pyusawthi sakhaan cu dothlennak phu pawl nih an va kah hna caah ralkap 2 an thi tiah MVP Revolution Force nih thawng an thanh.
August 12 chun sml 2:00pm hrawng ah Myaing peng SAC ralkap nih hmunhma an khuarnak Thayatkua khua pyusawthi sakhaan cu dothlennak phu pawl nih an va kah hna caah ralkap 2 an thi i pyusawthi 1 aa hliam tiah theih a si. MVP Revolution Force, Myaing mipi vengtu phu B03 le adang PDF phu pawl bawm in pyusawthi sakhaan an kah hi a si tiah theih a si.
Hpakan Min Cimhnak Ruang Ah Minung 36 An Tlau, Pakhat Hmanh An Hmu Rih Hna Lo. Kachin ram, Hpakan peng, Mana khua pawng, lungvar kawlnak hmun cu August 13 zinglei ah Min a cimh caah minung 36 an tlau. Nifatin in an kawl lengmang ko hna nain August 14 chun sml 2:00pm tiang ah minung pakhat hmanh an hmu rih hna lo tiah bawmchantu pawl nih RFA ah an chim.
August 13 zaanlei sml 3:00pm hrawng ah min a cimh hi a si i tikhor pawng ah lungvar a kawl mi le sui a thianh mi pawl an i tel tiah khuami hna nih RFA ah an chim. Min a cimhnak hmun hi Kyauksein Thityoat Company hmunhma a si i Company pawl hi cu bomrap puah caan a si caah rian an i din chung. Company rianṭuannak pawl aa dinh lio ah, a hlan ah luh a rak ngah lo mi hmunhma pawl kha lungvar a kawl mi pawl nih an cawh len caah atu bantuk in min a cimh hi a si tiah khuami hna nih RFA ah an chim. Credit: The Chinland Post