Dawei Peng, Phayarme Gate Kahdohnak Ah SAC Ralkap 2 An Thi!
=========
Taninthary ramṭhen, Dawei peng ah a um mi SAC ralkap Phayarme gate cu PDF phu pawl nih an kah hna i SAC ralkap 2 an thi tiah theih a si. September 11 chun sml 2:30pm hrawng ah Dawei peng ah a um mi SAC ralkap phayarme gate cu DGRF Company 2 le U-Aw Column nih Sniper in an kah hna tiah Maung Media nih a langhter.
Kahdohnak chung ah, gate pawng aa chawk mi SAC ralkap 3 cu sniper in an kah hna i 2 cu a hmun ah an thi, dothlennak phu pawl nih 79 hriamngan lung 1, 80MM lung 3 in gate chung an kah chap hna tiah theih a si.
Wetlet Ni 2 Chung Kahdohnak Ah Pyusawthi 7 An Thi. Sagaing ramṭhen, Wetlet peng ni 2 chung kahdohnak ah pyusawthi 7 an thi tiah theih a si. September 3 ah Shwebo peng ni chuahlei Taunghla pura tlang ah hmunhma a khuar mi pyusawthi pawl le IB 12 hna cu Wetlet peng Htungbu khuate lei ah an lut i mipi pawl an tlaih hna, khuate pawl an khangh caah PDF phufonh pawl he ni 2 chung kahdohnak a chuak i pyusawthi 7 an thi tiah theih a si. Kahdohnak chung ah Brave Brothers, Daung Nyinaung, Nattaung Naga le adang PDF phu tampi an i bawm tiah theih a si.
Pyigyimandaing Khua Gate Kahdohnak Ah SAC Ralkap 2 An Thi. Taninthary ramṭhen, Pyigyimandaing khua ah a um mi SAC ralkap gate an kah hna i SAC ralkap 2 an thi tiah Kawthoung Pengkomh PDF B01 sin in thawng theih a si. September 11 zinglei sml 11:17am hrawng ah Pyigyimandaing khua ah a um mi SAC ralkap gate cu Kawthoung pengkomh PDF B01 nih ah kah hna hi SAC ralkap 2 an thih hi a si tiah Khit Thit nih a langhter.
“Pyigyimandaing khua, Laynya khua pawng hlei ah hmunhma an khuarnak SAC ralkap gate cu Kawthoung pengkomh B01 nih an kah hna i SAC ralkap 2 an thi. Dothlennak phu lei an him” tiah Kawthoung pengkomh B01 ṭuanvo ngeitu nih a chim.
Pale Ah Riahcaw A Phor Mi SAC Ralkap Pawl An Kah Hna, 2 An Thi. Sagaing ramṭhen, Pale peng ah SAC ralkap pawl riahcaw an phorh lio ah an kah hna i 2 an thi tiah Southern YSO PDF sin in thawng theih a si.
September 12 zaanlei sml 5:00pm hrawng ah Pale peng, Inmahti pyusawthi khua in a rak chuak mi SAC ralkap 80 hrawng cu Ingyin khua in riahcaw, tangka, sui le mansung thilri pawl an fir i cawleng 18 in an phorh. Inmahti pyusawthi khua lei an kir lio ah dothlennak phu pawl nih an kah hna hi a si tiah Khit Thit nih a langhter.
Cun hmaisuang ah a kal mi SAC ralkap pawl le dothlennak phu pawl karlak ah kahdohnak a chuak ṭhan i SAC ralkap 2 an thi, SAC lei nih 60MM, 40MM le Machine Gun pawl in an kah ve ṭhan hna.
Kahdohnak chung ah Yinmarbin pengkomh PDF B03, B04, B05, B06, Southern YSO PDF hna bawm in kahdohnak an tuah tiah theih a si.
Myawaddy Ah A Um Mi SAC Ralkap Hmunhma Pawl Drone In Kan Doh Than Lai: Federal Wings. Myawaddy peng chung ah SAC ralkap he aa pehtlai mi hmunhma pawl cu Drone in kan doh than than lai caah SAC ralkap zung le an umnak hmunhma pawl he Meters 400, 500 chung ah a um mi pawl nih hmunhma i thial ding in Federal Wings nih thawng an thanh.
Tungse Peng Ah Khuabawi Nu Pakhat An Thah. Bago ramṭhen, Tungse peng, Sanshwehtan sang SAC kuttang khuabawi nu pakhat cu Tayarwaddy Galone ralkap bu nih an thah tiah theih a si. September 11, zaanlei sml 6:15pm hrawng ah Tungse peng, Sanshwehtan khuabawi nu Daw Theint Theint Lwin cu a fanu he Tayaraye khua in Motor cycle in an kir lio ah ralkap battalion 35 pawng lampi ah an thah hi a si.
“Kan nih bu nih dai tein a um sawhsawh mi kan that hna lo, a fanu cu zeihmah harnak pek lo in kan thlah, khuabawi nu belte meithal in voithum kan kah thah” tiah Tayarwaddy Galon bu ṭuanvo ngeitu nih People’s Spring ah a chim. SAC lei a ṭang mi Sanshwehtan khuabawi hlun Tun Tun zong Tayarwaddy Galon mipi ralkap bu nih November, 2022 kum ah meithal in an rak kah thah cang.
KNLA Phufonh Nih SAC Ralkap Thit-Chiah Sakhaan An Lak, SAC Ralkap 15 An Thi. Bago ramṭhen, Mone peng ah a um mi SAC ralkap Thit-Chiah sakhaan cu KNLA le PDF phufonh nih a luancia September 1 ah an kah i sakhaan an lak khawh.
Cu sakhaan lak kahdohnak hi August 21 zaan sml 12:00am luan hrawng in kahdohnak an thawk i September 1 zaanlei sml 5:30pm hrawng ah sakhaan an lak khawh. Thit-Chiah sakhaan ah LIB 439, IB 350 le IB 351 hna nih hmunhma an khuar i kahdohnak chung ah SAC lei 15 an thi, hriamngan zuun 2, Machine Gun 1, le meithal zuun 19 an lak khawh tiah KNLA nih an rak thanh.
Cu sakhaan kahdohnak lio ah Spring Warrior’s Column hriamtlai 2 an nunnak a liam i Special Commando Battalion in hriamtlai 5 an i hliam. Sakhaan lak kahdohnak lio ah SAC ralkap nih vanlawng in bom an rak thlak i hna. Credit: The Chinland Post