SAC Ralkap Nih Latt Khat Taung Lak Khawh Ṭhan An I Zuam Nain Ralbawi Telh In 17 An Thi!
==========
KNU hruai mi mipi hriamtlai phu pawl nih an lak mi Myawaddy peng, Latt Khat Taung sakhaan cu la kho ṭhan ding in SAC nih voi tampi aa zuam nain tlang hram hmanh an naih kho lo tiah Cobra Column nih thawng a thanh. July 21 ah Latt Khat Taung sakhaan cu mipi hriamtlai phufonh pawl nih an lak khawh i July 24 thawk in SAC nih ralkap thazang tampi hmang in kahdohnak a tuah ṭhan tiah theih a si.
Mipi hriamtlai phu pawl nih cu tlang sakhaan an lak khawh hnu July 24 in August 13 tiang ah kahdohnak voi 10 nak tlawm lo a chuak i SAC Captain 2 telh in 17 an thi, 34 an i hliam tiah Cobra Column nih a langhter. Mipi hriamtlai phufonh lei in pakhat a nunnak a liam ve i Drone pakhat zong a rawk tiah theihternak an tuah. Cun SAC ralkap Lt. Sergeant le adang ralkap 1 hriam he KNLA sin ah an rak i fonh.
Cu SAC ralkap 2 nih 60MM 1, 60MM kuan 5, MA-2 1, kuanbawm 6, kuan 6,000 he an rak i fonh tiah an thanh. Cun SAC ralkap pawl sin in 40MM lung 8, M16A2 zuun 2, M16 kuanbawm 10, Carbine 188, Carbine kuanbawm 6, NATO kuan 93, bomrap 1, SAC 5.56 kuan 300, 5.56 kuan 688, AK kuan 7 hna an lak khawh tiah an thanh. Latt Khat Taung hi kahdohnak caah a biapi tuk mi le a rem tuk mi hmunhma a si i kahdohnak pawl ah KNLA Brigade 6, Cobra Column, Kyathit Nat, Federal Wings, Yaung Ni phu hna bawm in SAC ralkap an doh hna hi a si.
Latt Khat Tlang Sakhaan Lak Khawh Ṭhan Aa Zuam Mi SAC Ralkap A Thi Mi An Tam. KNLA phufonh nih an lak mi Karen ram, Myawaddy peng ah a um mi Latt Khat tlang sakhaan cu la kho ṭhan ding in SAC ralkap nih kahdohnak an tuah ṭhan hi voi 10 a si cang. Kahdohnak chung ah SAC ralkap a thi mi an tam i ralkap chung a rawh ngai cang caah a zaam mi zong an um tiah NUG Ministry of Defense Secretary U Mg Mg Swe nih RFA ah a chim.
Myaing Peng, Thayatkua Khua Ah A Um Mi Pyusawthi Sakhaan Kahdohnak Ah Ralkap 2 An Thi. Magway ramṭhen, Myaing peng, Thayatkua khuate ah a um mi pyusawthi sakhaan cu dothlennak phu pawl nih an va kah hna caah ralkap 2 an thi tiah MVP Revolution Force nih thawng an thanh.
August 12 chun sml 2:00pm hrawng ah Myaing peng SAC ralkap nih hmunhma an khuarnak Thayatkua khua pyusawthi sakhaan cu dothlennak phu pawl nih an va kah hna caah ralkap 2 an thi i pyusawthi 1 aa hliam tiah theih a si. MVP Revolution Force, Myaing mipi vengtu phu B03 le adang PDF phu pawl bawm in pyusawthi sakhaan an kah hi a si tiah theih a si.
Kalay Peng Thlanglei Thasi Khua Kahdohnak Ah Cawngtaik -Sedawoo Pyusawhtii 2 An Thi! Sagaingramṭhen, Kalaymyo peng thlanglei ah SAC ralkap le Mipi ralkap hna karlak August 15 zinglei kahdohnak ah Cawngtaik-Sedawoo khua Pyusawhtii 2 an thi i Thasi khua mipi pawl himnak hmun ah an zaam tiah khuachung um mi thawngpe sin in theih a si.
Kalaymyo thlanglei kahdohnak ah SAC ralkap thazaang 200 hrawng cu Kalaymyo peng thlanglei ah rallam an sial lio a si i zing 10:13 am in 12:30 tiang Kalaymyo hrambunh Miakpi Battalion nih hriamngan voi 12 a kah I lam a sialpiak hna. Jet fighter zong in an kah chih hna. Rallam a sialtu SAC ralkap le Mipi ralkap phu hna cu Thasi khua pawng ah an i kah caah khuachung mi hna cu himnak hmun ah an zaam.
“SAC ralkap cu ralbawi VIP caah ruakkuang pakhat ah 120,000 MMK man le adang ralkap le Pyusawhtii pawl caah ruakkuang 60000 MMK man pawl cu motor pakhat ah ruak kuang 10 cio an phorh hnu ah timhcia in raldohnak ah an kal” tiah ralkap thawngpe sin in theih a si.
A luan cia June 25 zong sh Kalaymyo thlanglei, Thasi khuate ah a rak lut mi SAC ralkap 120 hrawng cu PDF phufonh nih an kah hna caah SAC ralkap 30 hrawng an thi/hliam an tuar tiah Ranger Defense Force – RKDF nih cathanh an rak chuah.
Cu kahdohnak ah SAC ralkap pawl lak ah Pyusawhtii pawl zong an i tel ve i zinglei sml 9:00am in zaanlei sml 5:00pm tiang kahdohnak a fak i SAC ralkap pawl nih mipi inn 7 an khangh. Kalaymyo thlanglei ah a um mi Thasi khua le Zinkalin khua karlak ah SAC ralkap mawṭaw pawl cu June 25 ah an kah hna tiah CDF-KKG nih an thanh ve.
SAC Ralhrang Sin Ah Kalaymyo Thlanglei Pyitusit- Pyusawhtii Khua 12 Min Bunh in Bawmhhalnak Ca An ṭial. Gangaw peng chaklei ramri khua a si mi, Kalaymyo peng thlanglei Pyitusit- Pyusawhtii khua 12 a si mi Kyaukphoih, Kyanthar, Innkyun, Kyuaksee, Manda, Hantawaddy, Lekyi nichuah, Lekyi nitlak, Myoukkhayaing, Shwemiatta, Tharyarwaddy, Kukku khua hna nih SAC sin ah bawmhnak ca an ṭial.
Bawmhnak ca an tial mi ahcun, kan nih khua 12 nih SAC ralkap dirkamh mi Pyitusit khua kan si caah kan khua ah Datsi le eidin thilril thla 6 leng kan ngei ti lo. Kalaymyo in meng 48 aa hlatnak khua ah kan um cio hna tik ah PDF misual/ralhrang hna nih thilril phorhnak phihpiak kan si hlei ah leikuang chuak thlai zong PDF nih an lak tawn. Cucaah Kalaymyo in thlanglei khua vialte kan himnak ding ah SAC lei nih PDF kahdoh ding le Operation kan tuahpiak uh tiah Buddhist phungki pa min tial in SAC ralhrang sin ah cakuat in bawmhhal nak a tuah.
Natogyi PDF Sakhaan An Luh Hnawh Hna, Hriam Cheukhat An Sung. Mandalay ramṭhen, Natogyi peng, Thusu le Latwai khua karlak ah a um mi PDF sakhaan hme pakhat cu SAC ralkap nih an luh hnawh hna caah hriam cheukhat an sung tiah theih a si. August 13 zaanlei sml 4:00pm luan hrawng ah SAC ralkap nih hriamngan bawm in Natogyi PDF sakhaan an luh hnawh hna hi a si i kaphnih karlak kahdohnak a um ko nain a thi mi an um lo tiah theih a si.
Natogyi peng chaklei ah a um mi NPDF sakhaan an luh hnawh hna hi a si i meithal zuun 3, pistol 1, kuanbawm 1 le kuanzen pawl SAC ralkal nih an lak tiah theih a si. SAC leiṭang Telegram Channel nih cun Natogyi peng PDF sakhaan SAC nih an luh hnawh khawh hna i PDF 2 zong an thah hna tiah an langhter ko nain NPDF nih cun kan minung an si lo tiah an fehter.
Chaung U Khua Pawng Ah SAC Ralkap Mawṭaw Sniper In An Kah i Mawṭaw 2 A Rawk. Sagaing ramṭhen, Chaung U khua pawng ah SAC ralkap caah datsi le riahcaw a phor mi mawṭaw pawl cu Sniper in an kah hna i datsi a phor mi mawṭaw a kaang i adang mawṭaw 1 zong lam thlang ah a tla tiah theih a si.
August 14 zaanlei sml 4:00pm hrawng ah Myinmu peng, Gwepindaw khuate SAC ralkap sakhaan in Monywa khua lei ah a kal mi datsi phor mawṭaw le riahcaw phor mawṭaw 16 hna cu Chuang U khua luhnak pawng ah Sniper in an kah hna. Sniper in kah ruang ah datsi phor mawṭaw a kaang i riahcaw phor mawṭaw lamthlang ah a tla i a rawk tiah Delta Force Taungtha nih a langhter. Kahdohnak chung ah Delta Force Taungtha PDF le Moekyo Guerrilla phu hna an i bawm tiah thawng theih a si.
Ngazun Peng Ralzaam Minung 5 SAC Ralkap Nih An Thah Hna. Mandalay ramṭhen, Ngazun peng ralzaam minung 5 cu SAC ralkap nih an thah hna i ni 9 chung SAC ralkap nih hmunhma an samh caah khuami tampi himnak hmun ah an zaam tiah theih a si.
August 14 zinglei sml 5:00am hrawng ah Sagaing ramṭhen, Myinmu peng in a rak chuak mi SAC ralkap pawl cu Myinmu peng, Yuadawlay khua ah meithal an puah i an rak luh lio ah Ngazun peng ralzaam minung 4 an thi i ralzaam minung 2 an i hliam leng ah mipi cheukhat zong an tlaih hna tiah Khit Thit nih a langhter. August 5 thawk in ralkap nih Ngazun peng chung ah lut in Yelaytaung khua ah meithal an thlah ṭhan caah miung 1 a thi, 1 aa hliam tiah theih a si.
Cun Ngazun peng, Htantabin khua cu SAC ralkap thazang 100 hrawng an lut i mipi inn an khangh, sualnak ngei lo mipi 25 an tlaih hna i minung 7 cu Myotha lei ah an kalpi hna tiah theih a si.
August 6 zong ah Nabepin khua ah SAC ralkap pawl zaan ah an lut i sualnak ngei lo mipi 6 an tlaih hna, August 13 ah Thakyin khua mipi 2 zong an tlaih fawn hna tiah Khit Thit nih cun a langhter. Credit: The Chinland Post