SAC Ralkap Motor 90 Karenni (Kayah) Ram Lei An Kai!
========
Karenni (Kayah) ramkulh lei ah SAC motor 90 cu July 24 ni ah Moebye-Loikaw lampi in an kai tiah theih a si. “Kan khua an phanh hi July 24, zing 10:00 hrawngah motor 6, zanlei 5:30 ah avoikhat motor a rungpi arak kaimi motor 30, avoihnihnak a rak kai mi motor 40, July 25 zingah motor 15 tiin an dihlak motor 90 an rak kai” tiah Loikaw peng khuami nih a chim.
Moebe-Loikaw lam in a rak kai mi SAC motor rung cu nihnih chungah Karenni Nationalities Defense Forces (KNDF) le mipi ralkap hna nih lam-orh ah an kah hna caah SAC lei in a thi mi an um tiah khuami nih an chim.
Karenni (Kayah) ramkulh lei a rak kai mi SAC ralhrang lei mi 300 hrawng cu July 21 in July 26 tiang Moebye-Loikaw lam pi in an ra lio ah mipi ralkap he kahdohnak a um hi a si. SAC lei nih khuate um mipi 4 cu an tlaih hna. Mi 2 cu thah an ton. A dang pa 2 cu hriamngan le meithal hliamtuarnak in an thi tiah tuanvongeitu nih a chim.
Kachin Ramkulh Kanpaikti Ramri Gate Hngak Lt Col Hla Moe Naypyidaw Nih An Tlaih. Tuluk-Myanmar ramri Kachin ramkulh um Kanpaikti gate Sadone hrambumh LID battalion 389 commander L.t Colonel Hla Moe (ဗျူဟာမှူ:) cu July 24 ni ah Sadone khua a rak phan mi ralhrang nih Nay Pyi Taw order in an tlaih tiah theih a si.
“July 23 ah Sadone khua SAC ralkap le Lisho Pyi Thu Sit (militia) ralkap fonh in mi 60 nih LID 389 commander Lt. Colonel Hla Moe tlaih ding ah an rak kal i, July 24 ah an tlaih. An tlaihnak a ruang cu, Tuluk–Myanmar (Kachin ramkulh) ramri Kanpaikti gate in Tangka eihmur mi a tam.
Kuan le zen ramchung lutpinak ruangah kan hnu lei ah Northern Commander bawi lian mi 6 an tlaih hna hnu in atu battalion chung a ummi bawi hi tlaih hi a si ko” tiah naihniam SAC ralkap sin in thawng kan theih tiah an chim. Cun, Myitkyina-Bhamo lam LID 321 bawi pakhat Kazu khua gate hngak bawi le Kandaung khua gate hngak bawi zong tlaih an si tiah a chim chap.
July thlachung Kachin ramkulh SAC ralkap bawi tliah tonmi ah, Myitkyina hrambunh Northern Commanders Major General Ko Ko Maung, Deputy Commander Brigadier Aung Myo Oo, Colonel Aung Kyi Lin (Border Affairs Minister), Hpakant Commander le Kaamaing ဗျူဟာမှူ: colonel Myint Tun hna cu July 13 zan 8:30 Pm ah SAC headquarter Naypidaw zung in an rak tlaih hna tiah theih a si.
Kanpetlet Peng Cindwe Khua Ah Eidin Riahchaw Chan Ding In A Kal Mi Ralhrang Cu Mipi Ralkap Nih Ni 4 Chung Kahnak Ah Mi 11 An Thah Khawh. Kanpetlet peng, Cindwe khua ah eidin riahchaw chan ding in a kal mi ralhrang cu mipi ralkap he ni 4 chung kahnak ah ralhrang lei mi 11 an thi tiah theih a si.
SAC ralkap hi Magwe ramthen in Kanpetlet peng chaklei Cindwe khua hrambunh ralhrang sin ah eidin riahcaw chan ding in mi 300 hrawng an rak kai i, CDP-Kanpetlet he kahdohnak cu July 21-24 tiang fak ngai in kahdohnak a um. SAC ralhrang phu cu July 21 zing 9:00 hrawngah Mashuatui le Mawchaung khua karlak Mipi ralkap he kahdohnak ah SAC lei mi 4 an thi, hliamtuar in an um.
July 24 zing 8:30 ah Mawchaung in Hliangdoh khuathar pawng kahdohnak ah SAC lei mi 7 an thi than. Mah kahdohnak tamrual mipi ralkap lei in, Minbo district battalion 6 in ralkap 2 le CDP-Kanpetlet lei mi 4 hliam an tuar. Riahcaw chan ah a rak kai mi SAC ralkap cu Mashuatui khua ah an riak lio ah mipi inn bauh/hrawh in thil an fir tiah CDF-Kanpetlet Khonu battalion nih July 25 ni thawngthanhnak in theih a si.
SAC ralhrang nih biaknak inn le lo ah um hmun an lak lio ah biak inn chungah zu an din, an hmuh mi sa an thah an ei, sianginn chung um computer, record file, sianginn chung man ngei thilri vial te an fir tiah Khono battalion lei nih an chim chap.
Cun, Kanpetlet khua hrambunh ralhrang hna hmundang ah thialkam dingin kal aa thawhmi mi 100 hrawng cu July 24 zing ah Kanpetlet peng vanlawng bual pawng Mipi ralkap he kahdohnak ah CDF-Kanpetlet in ralkap That Kui cu ram le miphun caah a nunnak a pek tiah theih a si.
Kanpetlet peng ni 10 chung kahdohnak ah SAC ralkap a thi mi le hliamhma tuar mi hi 30 leng an si cang, tiah Chin ralkap lei nih an thanh. Kanpetlet ah pehtlai in kahdohnak a fah chim lengmang caah mipi bawmhchanhnak kan herh ko, tiah Kanpetlet peng zatlang uktu phu le Chin Defence Force -Kanpetlet nih an chim. Credit: The Chinland Post