Loikaw-Moebye Kar Kahdohnak Ah SAC Ralhrang 20 An Thi; Hriamnam Cheukhat An Lak
=========
Shan le Karen ramri Loikaw-Moebye lam cung kahdohnak ah SAC ralhrang a thi mi le hliamtuar mi an tam pin ah hriamnam cheukhat zong kan lak chih tiah KNDF nih July 31 ah thanh ca an chuah.
July 20 in SAC ralhrang hna cu rallam sial le thazaang chap dingin motor in a ra mi hna cu KNDF ralkap tangti phu nih an kah hna hi a si.
July 24 in 25 chungah kaphnih kahdohnak a chuak i ralhrang lei 20 nak tlawm lo an thi i meithal zun 8, kuan le hriamnam dang zong KNDF lei nih an lak piak chih hna. SAC ralhrang hna cu Pekhon-Moebye -Loikaw lam cung ah an mah motor le mipi motor hmang in Kareni ramkulh chung ah an rak lut hna i nifa tin KNDF he kahdohnak a chuak tiah an langhter chih.
SAC ralhrang hna nih Kareni ramkulh cu humhak ding an i zuam nain a hlan bantuk in cun an humhak kho ti lo, Loikaw khua pakhat lawng an humhak khawh cang” tiah Pekhon khua mi pakhat nih a chim.
Hi kahdohnak cu KA, KNDF B/2, KNDF B/14, KNDF B/12, KNF ETD le Loikaw-PDF hna an i bawm. Pekhon-Moebye -Loikaw lam cung ah ralhrang hna cu an i chok vak rih i zeitik caan paoh ah kahdoh nak a chuah khawh caah mipi hna nih umkal i ralrin ding kong zong an langh ter chih.
Nihin August 1 Ah Thongtla Mi 7000 Leng Cu SAC Nih Luatnak An Pek Hna. Nihin 2023, August 1 ah Myanmar ram pumpi thonginn hmunkip ah thongtla mi hna chung in minung 7,749 cu luatnak pek an si, tiah SAC nih nihin August 1 ah a thanh.
Kum saupi thongthlak ding in biakhihpiak mi president U Win Myint le rampi ruahnak petu Aung San Suu Kyi zong sual phawtnak an khinhmi chung in zeimawzat an hlihpiak hna, tiah an langhter.
Yangon, Insein thonginn ah thong a tla mi hna chung in luatnak a hmu ding mi hna cu an chungkhar nih nihin August 1, chunhnu tiang an hngah hna, tiah RFA nih a ášial.
SAC Nih Thla 6 An Sauh Chap, Nihin NDSC Meeting Ah Henry Van Thio Aa Tel. July 31, nihin ah SAC nih National Defense and Security Council (NDSC) meeting an tuah i State Emergency caan thla 6 an sauh than tiah theih a si.
SAC nih an thanh ning ah tutan thla 6 an sauh chap mi hi 2008 phunghrampi poh-mah 425 cherhchan in kan sauh ti a si. Nihin NDSC meeting ah caansau ngai a lang ti lo mi Pu Henry Van Thio zong aa tel ve.
State Counsellor Daw Aung San Suu Kyi le President U Win Myint luatnak kan pek hna tiah SAC ralhrang nih a thanh. SAC ralhrang nih Kawlram President U Win Myint le State Consellor Daw Aung San Suu Kyi cu tazacuainak an sinak le dantatnak pek ciami biakhiahnak in kan hnawtpiak hna. Cucaah 1 August 2023 in luatnak kan pek hna tiah thawng an thanh.
Hi thawngthanhnak cu SAC ralhrang Secretary Lt. Gen. Aung Linn Dwe minthut in thanh a si. Hi bantuk in luatnak an tuahnak a ruang hi ASEAN tlangtlaknak in a si kho tiah ramkhel lei ngiathlaitu cheukhat nih an chim.
Kalaymyo Pengkomh Ah Kyats 20,000 Ca Hmankhawh A Si Lo Tiah PDF Nih Ralrin Pek. Sagaing ramthen Kalaymyo pengkomh chung ah mipi hna nih SAC cozah chuah thar mi Kyats 20,000 ca cu hman lo ding in an kham nak kong Kalaymyo pengkomh mipi hriamtlai phu PDF nih ralrin peknak thawng an thanh.
July 31 zinglei ah a thar chuak mi Kyats 20,000 ca cu dothlennak tuah tu phu nih a humhaknak chung ah luhpi lo dingin kham a si i a hmang mi le a luhpi mi kan in hmuh sual hna ah cun nan cung ah dan tatnak tuah dingin tinhtuahnak kan ngei tiah an langhter.
“Tuanvo kan i pek nak pengkomh kip ah kham a si. Hmundang cio zongah a tubantuk in an kham lai zumh a si, minung pakhat nih hi tangka a hman lio voi 3 kan hmuh ah cun upadi ning in dantat a si ko lai” tiah Kalaymyo pengkomh PDF tuanvo ngeitu pakhat nih a chim.
“Mipi sinin Kyats 20,000 ca a hmangtu kan hmuh sual hna ah cun a voi khat nak ah a tangka chuh in kan thleh lai, a voi 2 hnihnak ah ralrin kan pek lai i a voi thumnak ah upadi ningin dandat a si cang lai” tiah a chimchap.
SAC cozah nih Kyats 20,000 ca a chuah mi cu Bank, chawleh thal tuah mi le Non-CDM sin hna in a pek hna lai caah hi tangka cu mipi ralkap nih kan humhaknak hmun ah luh pi in hman khawh a si lai lo tiah thanhca chuah mi ah an langhter chih. NUG cozah zong nih a luan cia July 27 ni ah SAC cozah Center Bank nih Kyats 20,000 ca chuah ding cu kan co hlang lo tiah mipi sin ah thawngthanh nak a rak tuah. Credit: The Chinland Post, The Chin Post, Lungmili Media