SAC Nih Aung San Suu Kyi Umnak An Ṭhial!
==========
Naypyidaw ah SAC nih an hren mi, rampi ruahnak petu Aung San Suu Kyi cu zalong deuh in um khawh a sinak inn pakhat ah an ṭhial, tiah NLD party in ṭuanvo ngeitu pakhat nih fehternak he a chim.
“Suu Kyi cu Naypyidaw cozah inn pakhat ah an ṭhial timi thawngpang hi fehter a si ko,” tiah Naypyidaw thonginn he naihniam in ummi pakhat nih nihin July 28, ah RFA ah a chim. Ramchung media cheukhat nih cun, Suu Kyi cu July 24, nikhatni ah khan Naypyidaw deputy minister pawl umnak inn ah an ṭhial tiah an langhter.
Ramchung le ramleng in hneknak(pressure) a tam caah ramkhel lei kong he pehtlai in SAC nih an rian ah harnak an ton ruangah atu bantuk in an ṭhialnak hi a si, tiah NLD party in ṭuanvo ngeitu pakhat nih a chim.
Suu Kyi cu SAC ralkap nih thonginn an ṭhial hnu ah Pyituh hlutdaw chairman U Ti Khun Myat he an tonter hna. Cu pinah atu lio Naypyidaw ah a tlawng mi Chinese Ambassador to ASEAN, Deng Xi he tonnak caan an pek hna lai zumh a si, tiah ramleng media hna nih an langhter.
Chinese Ambassador to ASEAN Deng Xijun cu SAC nih Myanmar ram uknak a laak hnu ah voi thum tiang a phan cang. SAC chairman telh in SAC lutlai hna he tonbiaruahnak zong an rak ngei. A luancia February thla zong ah Myanmar ram chaklei tlangcung hriamtlai phu hna he daihnak kong biaruahnak an rak ngei.
A ra laimi July 31 in cun lakhruak caan karlak uknak aa chapmi thla 6 zong a tlin cang lai caah SAC ralkap nih zeidah pehzulh an timh ti cu theih a si rih lo. Kum 78 mi Aung San Su Kyi cu SAC nih uknak an laak 2021, February 1 zinglei ah khan an rak tlaih i sualpuhnak phun 19 in, kum 33 thong thlak ding in biakhiahnak an tuahpiak.
Daw Aung San Suu Kyi Le Hluttaw Speaker T. Khun Myat An I Tong. SAC cozah nih uknak a lak ni thok in tlaih a tongmi Aung San Suu Kyi le Pyithu Hluttaw Speaker T. Khun Myat an i tong i Nyapydaw a phan mi Tuluk cozah Asian kongkau palai he zong an tong kho tiah AP thawngzamh nih a langhter.
Daw Aung San Suu Kyi cu Naypyidaw thonginn in, inn pakhat ah an thial tiah NLD party tuanvo ngeitu upa pakhat nih a chim mi kong zong a langhter chih. A voi 2nak Naypyidaw a phan mi Tuluk cozah Asia kongkau palai Deng Xijuan cu July 27 ni ah SAC cozah remdaihnak kongkau hautu General Ya Pyae he an i tong tiah SAC cozah thawngzamh nih July 28 ah a langhter.
NLD cozah lio ah Pyithu Hluttaw Speaker a tuan mi T.Khun Myat cu SAC cozah nih uknak a lak hnu in mipi nih hmuhkhawh a si ti lo. A si nain SAC cozah nih thla 6 dan ah uknak pehsoh ding kong tonpumhnak chung lawng ah a lang tawn. Tu thla dih ah SAC cozah nih humhimnak kongkau (ကာလုံ) tonpumhnak tuah ding in timhtuahnak a ngei than i thla 6 ca uknak pehsoh ding kong an ceih lai tiah Myanmar Now nih a langh ter.
Ramkomh Cozah, Ramkulh Federal Unit Commission le Karenni IEC, KSCC Meeting An Ngei. Ramkomh Cozah le Ramkulh Federal Unit Commission he caankharlak tangrual in riantuan ti ding in Karenni Interim Executive Council (IEC), Karenni State Consultative Council (KSCC) hna a voikhatnak Meeting cu July 28 ni ah an tuah tiah theih a si. Meeting ah Ramkomh Cozah le Ramkulh Federal Unit Commission Chairman caankarlak President Duwa Lashi La le Karenni State Consultative Council Aung San Oo nih onnak bia an chim.
Cun, Ramkomh Cozah le Ramkulh Federal Unit kharlak tamrual in riantuan ti ding Commission nih aa timh mi le hmailei a riantuan lai mi kong cu Ministry of Federal Affair’s Dr. Lian Hmung Sakhong, Karenni State Consultative Council phunglam le hmailei riantuan dingmi cu Council Chairman Aung San Oo le Karenni Interim Executive Council (IEC) Vice-Chairman Khun Bi Htu hna nih bia an chim.
Cu hnu ah Fimcawnnak, Ngandamnak, Harnak a tonmi sin bawm channak, Nu le ngakchia zohkhenhnak, Nuhrin covo, tangka kong, Uknak le raldohnak le a dangdang kong biaceihnak tampi an ngei.
Cun, National Unity Consultative Council ah ton biaruahnak ngaih ti thannak le hmailei karhlannak ah FSCC Secretary, IEC Secretary bu le KSCC Secretary chungtel he komh in Focal Group dirh ding in hnatlak nak an ngei.
Ramkomh Cozah le Ramkulh Federal Unit kharlak tamrual in riantuan ti ding Commission Vice-chairman Prime Minister Man Win Khaing Than le Karenni Interim Executive Council General Secretary Khu Pah Luh Reh hna donghnak bia chim hnu in meeting cu tluang te in an dih.
Meeting ah National Unity Government Duwa Lashi La, Union Prime Minister Man Win Khiang Than le Union Minister pawl, Karenni caankharlak council Chairman Aung San Myint le council chungtel, NUG committee chungtel Min Ko Naing le chungtel hna meeting a kai mi an si tiah theih a si.
Kalaymyo Letpanchaung Khua ah SAC Hriamngan Nih Mi 5 A Hliam. Sagaing ram, Kalaymyo peng Letpanchaung khua chungg SAC hriamngan kahnak ah khuami 5 hliam an tuar tiah theih a si. July 26 zaan 10:00 ah Kalaymyo hrambunh hriamngam battalion in Letpanchuang khua ah hriamngan 2 an kah i pakhat cu khuachung inn ah a tla caah mi 5 hliam an tonnak a si.
Kalaymyo peng chungah, June 1 – July 27 thlakhat leng ah hriamngan kah ruangah mipi 9 an thi i hliamtuar mi 31 leng an si. SAC lei nih runvennak an laknak hmun le an ralkap pawl umkalnak lam deuh ah nifatein hriamngam kahnak le bom puak a tam caah Kalay khuachung um mipi pawl cu thinphan in an um ko.
“July thlachungah khuachungah SAC lei hriamngan kahnak voi 10 leng a um i cheukhat inn ah a tla. Ralhrang nih an duhnak paoh ah hriamngan kahnak an tuah lengmang caah kan inncung ah hriamngan zeitik aa tla sual te hnga tiah thinphan in kan um ko” tiah khuachung pakhat nih RFA ah a chim.
Hriamngan kahnak a tuahmi ralkap bu cu kalaymyo hrambunh, keralkap battalion-365, battalion -228, Regional Operations Commands (ROC) (ဒေသကွပ်ကဲမှု စစ်ဌာနချုပ်) Kalay hna nih hriamngam kahnak an tuah ton. Credit: The Chin Post, The Chinland Post, Lungmili Media