Pastor Le Khrihfa Mi Hna Cu Remdaihnak Lamthluan Ah Karhlang Dingin Min Aung Hlaing Nih A Sawm Hna
==========
SAC Chairman Min Aung Hlaing nih khrihfa hna caan sunglawi Krismas donnak cu 24 December ah, Pinmana khuapi um, Micheal Catholic Biakinn, Naypidaw ah a telpi hna i, Pastor hna le Khrihfa mi hna cu remdaihnak lamthluan ah karhlang in, i teltum cio dingin sawmnak a tuah.
SAC nih remdaihnak rian an kalpinak, remdaihnak tuah dingin rian an ášuan cuahmahnak kong le hi remdaihnak lamthluan ah Pastor pawl le Khrihfa mi hna zong thazaang chuah chin in i tel tum cio a herh kong cu Min Aung Hlaing nih a chim.
Zei bantuk biaknak paoh nih remdaihnak an duhnak bantuk in vawlei lei zong ah remdaihnak ser a herhnak kong le SAC nih remdaihnak an sernak lamthluan ah lam kaupi an hun i, zeitik caan paoh ah hriamtlai phu he remdaihnak ser an duhnak kong zong a chim chap.
Hakha Khuapi Chung Ah Tu Kum 2023 Christmas Hlunghlai Piin Tuah A Si Lo.Chin ramkulh, khuapi Hakha khuachung ah HCMF nih tu kum(2023) Christmas cu hlunghlai ngai in tuah lo ding ah thawng an rak thanh bantukin hlunghlai piin tuah a si lo, tiah theih a si.
“HCMF nih tu kum 2023 Christmas cu hlunghlai ngai in tuah lo dingah thawngthanhnak an rak tuah bantukin Hakha khuapi um Khrihfa bu kip ah Christmas hlunghlai piin tuah a si lo. A bik in dohthlennak lio a si i mi bu piin Christmas caan hman lo le ramtang um fanau hna zawnruahnak he hlunghlai ngai in Christmas tuah a si lo,” tiah tualchung mi pakhat nih The Chin Post ah a chim.
Hakha khuapi ah hlunghlai ngai in Christmas tuah lonak hi 2020 covid lio in a si cang. SAC nih nawlngeihnak an laak hnu in mah le Khrihfabu kip ah pumhnak in Christmas caan hman deuh a si. Sathah, rawlhrawmnak le laksawng thlennak tuah a si lo i lakphak le changreu dangh a si. Cheukhat Khirhfabu ahcun lakphak le sathluak zong an dangh hna, tiah theih a si.
Hakha khuapi Khrihfabu kip ah cun pumhnak lawng in Christmas caan hman a si nain khuate lei ah cun hlunghlai tein Christmas an tuah i caan an hmang kho hna. Khuate lei ahcun anmah le khuami ramdang ummi nih Christmas a tuahpiakmi zong an um, tiah tualchung mi pakhat nih cun a chim.
HCMF nih thawngthanhnak an rak tuahmi ah Hakha khuapi ah 2024 Kum Thar zong hlunghlai ngai in tuah lo ding ah an rak thanh bantukin Khirhfabu kip nih sathah le rawlhrawmnak tuah in Kum Thar don an i tim lo, tiah theih a si.Credit : The Chin Post