MAH a lu ai kheuh cang, zei lei dah panh si te hnga?
============
Unau Thumkomh Ṭangrual phu ai timi kha MAH te phu nih chaklei zawng pathum an ti hna. MAH te phu lam cu Kawlram mipi nih uico phu ti an si ve ko. Lai belte nih raap sachia kan ti deuh hna. GENZ mino thlen duh tak pawl hi an ral ṭha taktak ti hmuh khawh an si. Kawl an si ah, Lai an si ah. Ka nunnak a liam ruangah Kawlrampi ai thlen khawh ding si cun, keimah nunnak cu ka pek sian tuk ai timi lawngte an si.
“Chaklei zawng pathum an timi hna” thawng in atu cu Kawlram laifang kan phan cang hna tiah PDF pakhat nih live video a thlah. Zawng an kan ti zongah kan ram thlen khawhnak ding tiang kan doh khawh hna ahcun kai lungsi tuk ko, ka thih lo sual cun, bia ka chim ṭhan te lai, ai ti. Cu chaklei unau rual pathum nihcun BPLA lawng si lo, Mandalay PDF le adangdang dohthleng phu, phu 6 bakte an rak train hna, ti si.
Nain, zeidah ruah hau si rua ka timi cu, emotion le practical reality thil sining a cuai thlai thiam hau men lai. Unau pathum nih khuapi 9 cu an lak khawh cang tiah theih si. Nain, cu khuapi a 9 ningin an control kho tak rih hna lo.
Bianabia ah, Khampat zong khi thinphang ngai in an um rih hna. Bawmah pawl cu an lau tuknak ah, “NUG cozah a kai zongah, kannih pawl hi cu media a awnmi sawh kan si ko i an kan zuah si le, NUG cozah cu kan cohlan te ko lai” a titu zong an um. Caw Mio Min timi pa kha. Tikah, MAH a lau. Lashio lei Tuluk le Kawlram ipehtlaihnak lampi thluan cung khuapi pawl a sungh dihmi cungah, “Palik pawl san nan tlai lo tuk,” a tongh hna.
Palik bawi bik pi-ṭhe-yi (ပြည်ထဲရေး) vuanci a rian a phuah hngap―passport sernak tepawl ah eihmuar nan eipi tuk hna ti in sual an phawt. Zawng pathum an cah tuknak khi Kachin le Wah nih an hnulei in an bawmh hna, a tongh. MNDAA nih Wah ramchung ah itimhlamhnak ṭha tein ai tuah ai tuah hnu ah a kan phomhmi si, a ti.
Mah khan, a bawmah pakhat a cian colh. KIA an cii hloh ding ti in bia a chim. KIA pawl nih Buddhist phungki-cawng an khangh lawng si lo, kan phungki an chuih an lamh hna, an serhsat hna i an thah hna ti in lih bia a chim.
Kachin cu Khrihfa an si. TNLA, MNDAA le AA le Wah tbk khi Buddhist ngawt lawngte an si. Biaknak in mi ṭhencheu an duh tinak a lang. Insein Wars lio bang. Tuchan minung hi an fiim cang ko nain, caan a rauh cun chim khawh si lo. Mah caah iralrin a haumi si. Operation 1027 thawng cun Karenni lei nih eleven point eleven 11.11 cu nizan khan an thawk. Kayah khuapi pathum an va tuk hna nain, khua cu an laa kho rih lo. Raap sakhan tu cu 7 an laak khawh tbk a si.
Raap vanlawng pakhat a tla i (KNDF nih kan thlakmi si an ti), zei ruang set ahdah a tlak, ti biafiang cu a um rih lo. Mipi thah dingin a zuang lengmang mi raap vanlawng cu chiatserhnak ai mih caah a tlakmi si, ti deuh in micheu nih bia an khiah. (Note: vanlawng tlaknak debris an hmuh cang caah kahmi ruangah si dawh bik a si.)
Raap sakhan an va lak khawhmi pawl (TT raap sakhan zong) hmanthlak le video hmuh tikah, raap pawl khi Kawlram chung dohthleng phu a tam deuh nakcun an rak fel deuh, rian an rak ṭuan deuh ti hmuh khawh si. An sakhan chung i kahcham le kua an icawh, an ivih ning zoh tikah, an rak iralring tuk hna. Rome tehna siangpahrang chan lio level bantuk sakhan si ko lai nain, ram siifak tuk kan si caah, mah bantuk hmanh khi tapung ai titu pawl nih an tuah huam hna lo.
Cu ruangah hriamnam mak ngai a ngei ko nihcun Kawlram tapung phun pawl hi cu cikhat ah hloh khawh dih ding lawngte in an um. Tapung an tha thu tuk cu. Khampat lebang raap pawl an sakhan tang khi lei tang kua an rak ivih dih i cu an kua cun an rak zaam dih ti si. An meithal le an hriamnam vialte an ikalpi dih.
Mipi ralkap nih khuazei lei set an zaam an hliah manh hna lo. An kiangkap raap sakhan dang ah an vai iburh dih lai ti an zumh. Mah bantuk thil a um tikah, HKA Rungtlang raap sakhan pawl chung zongah khin lei tang kua zei can tiang dah an ivih hnga, zeiti phun in dah an himnak ca an isersiam hnga hngalh si lo. Cucaah, raap sachia pawl doh tikah khin, emotion sawh cun thah thlu pet ding cu an fawi lai lo dah! Credit: Salai C Alexander