Matupi-Hakha Lampi Cung Pengkomh Zung Ah Kahdohnak A Chuak I SAC Ralkap 1 A Thi!
===========
Chin ramkulh, Matupi peng, Matupi-Hakha lampi cung pengkomh zung ah ralkap thazaang tam ngai chap in a ummi SAC ralkap le CDF-Matupi kaphnih kar kahdohnak ah SAC ralkap 1 a thi i 5 nak tlawm lo hliam an pu, tiah CDF-Matupi nih an thanh.
October 27, zanlei 4:00 hrawng ah Matupi-Hakha motor lampi cung pengkomh zung ah a ummi SAC ralkap pawl cu CDF-Matupi nih an va kah hna hnu ah kaphnih kar kahdohnak a chuak, CDF-Matupi ralkap hliampu lo tein hnu an tolh kho, tiah theih a si.
Matupi, pengkomh zung ah ralkap thazaang an chap pah lengmang, kanmah battalion 2 zong ralring tein kan um peng, SAC ralkap pawl cu Biuha sakhan vennak ca ah tiin pengkomh ah ralkap thazaang an chap pengnak a si, tiah CDF-Matupi Battalion 2 in ṭuanvo ngei pakhat nih Zalen ah a chim.
Kawlrawn lei in motor 80 leng he SAC ralkap pawl cu rallam sial in an hung kai lio a si i Matupi peng chung ah kahdohnak fak a chuak khomi a si caah CDF-Matupi zong ralring tein kan um peng, tiah Battalion 2 in ṭuanvo ngei pakhat nih cun a chim. A luancia October 6 lio zong ah Matupi-Hakha lam cung pengkomh zung chung um SAC ralkap le CDF-Matupi an i kap i SAC ralkap 2 an rak thi.
Kanpetlet Khuachung Le Khuate Dihlak Tluk Cu Kan Uk Khawh Cang – CDF-Kanpetlet. Chinram thlanglei Kanpetlet khuachung le khuate dihlak tluk cu kan uk khawh cang, tiah CDF-Kanpetlet chimphuannak nawlngeitu nih a chim. Kanpetlet khuachung ah SAC ralkap pawl cu an i chawkvak ngam ti lo, sianginn zong an ong ngam lo, khuachung ummi cheukhat hmanh zalong in an um ngam lo, khua pawngkam ah hmunhma kan laak dih i kan uk khawh ṭhan cang, khuate lei zong kan uk khawh dih ti tluk a si, tiah CDF-Kanpetlet chimphuannak nawlngeitu nih cun a chim.
SAC ralkap pawl cu Kanpetlet khuachung pengukzung, BEHS sianginn, Yangaung pura le penguk fimcawnnak zung lawng ah umhmun an khuar kho cang, tiah theih a si. A luancia October 20 ni ah CDF-Kanpetlet nih khuachung um SAC ralkap pawl cu umhmun an khuarnak ah an va kah hna i ralkap 2 an thih pinah hliampu zong an tam, tiah CDF-Kanpetlet nih an rak thanh.
Kanpetlet khuachung ah SAC ralkap le CDF-Kanpetlet kaphnih kar kahdohnak fak a chuah tawn caah tualchung mi dihlak ti tluk cu ral an zaam i chungkhar 20 hrawng lawng an taang cang, tiah CDF-Kanpetlet in chimphuannak nawlngeitu nih a chim.
Kanpetlet khuachung ah kahdohnak fak a chuak kho ṭhanmi a si caah tualchung mi zong SAC ralkap nih umhmun an khuarnak naih ah umkal lo ding, tiah CDF-Kanpetlet nih ralrin an pek hna. Milu 5000 leng le inn 1200 a umnak Kanpetlet khuami hna cu Magway peng Saw khua leng ramtang le dum hna ah ralzaam in an i dornak kum 3 a tling deng cang.
Tonzang Peng Ah India Lei In A Rami Hriamtlai Phu Khat Cu CDF-Tonzang Nih An Kah Hna. Chin ramkulh, Tonzang peng, CDF-Tonzang Battallion nih an ukmi hmunram Thansi khua le Santone khua hna ah India lei in a rami Chin Kuki Liberation Army(CKLA) cu an kah hna, tiah theih a si.
CKLA hriamtlai phu cu CDF-Tonzang hmunram cheukhat ah khualtlawng mi, meithal he tlerhkhawnh in tangka hal, thilri laakpiak a hmangmi phu an si i khuate hna ah tualchung mi hrocer in phaisa hal an hman ruang ah CDF-Tonzang Battalion 1 le 2 nih an kah hna, tiah CDF-Tonzang Battalion-2 nih October 26 ah an thanh.
CDF-Tonzang Battalion 1 le 2 nih an kah hna caah CKLA phu cu an zaam dih i minung 3 cu India ralkap nih an tlaih hna, a dang cu Manipur tiva lei ah an zaam i minung tam ngai hliam an pu, tiah an thanhmi ah cun an langhter. CDF-Tonzang nih an langhter ning ah; CKLA hriamtlai phu cu India ram mi Ngam Cha le Ja Mon hruaimi phu a si i a luancia 2023 March 24, zan suimilam 10:00 hrawng ah Tonzang peng Phaisat khua ah lut in tualchung mi cu phaisa zong an rak chuh bal hna, tiah theih a si.
CKLA hriamtlai phu cu India-Myanmar ramri hrawng ah hrambunh in a ummi phu an si, tiah naihniam in a ummi nih an chim. Kuki miphun aiawh in hriam a tlaimi phu cu Kuki National Organization/Kuki National Army phu khat lawng an si i Kuki min pu in hriam a tlaimi phu dang cu Kuki miphun aiawhtu phu an si lo, tiah tualchung hriamtlai phu le Kuki mipi hna nih an chim.