Mara buainak vs unau thum buainak!
=========
Ca an ttialmi tete zoh cio ah Mara i tthen nak kong ah CNF mawhchiatnak tete he pehpar in Falam peng, Mindat peng le peng dangdang buainak kong an chim chih ttheu. Mara he dirhmun khat bantuk in an chim hna. Mara buainak hi Mindat (CNC), CNO le ZFU ti bantuk buainak he ai lo lo timi hi zapi nih kan thleidang kho rua lo.
Thantlang peng ah Zophei, Lautu, Mara tiin kan um. CDF-Thantlang nih nanmah tein nan dir kho lo tiah thahrum hmang in kham hna seh law Chin Unau pathum he khin dirhmun khat, CDF-Thantlang zong, a si ve ko hnga. CDF-Thantlang nih buai ding ah a ruah lo caah buainak a um lo. Bu khát min khát tang i an um lo ruang ah an i hua hlei maw? Hua hlah. Dawtnak tu a ngan deuh. A herhnak paoh ah ral an tu tti ko hna.
Mara buainak tu cu ai dang. Unau hna pathum buainak khi sang buainak a si ahcun Mara buainak cu chungkhat sahlawh kar buainak a si hnga. Unau hna pathum buainak khi chungkhat sahlawh lak buainak a si ahcun Mara buainak cu u le nau chuaktti buainak bantuk khi a si hnga. Chim duh mi cu Mara buainak hi atu lio i a buai cio mi a dang buainak he tahchunh ding a si lo. Ai dang mi a si.
Ka sia a rem lo ngaimi cu peng pakhat chung an buai tikah CNF ttheu mawhphurh a si. Chinland Council ah zapi in sawm an si. Peng pakhat chung in a cheukhat nih an duh, a cheukhat nih an duh lo. Zapi tein sawm mi puai ah a kal duh lomi nih a kal duhmi, a kalmi hna an kalnak kong he pehtlai in a sawm tu mawhphurh hi a si ding a si maw si lo ti ruah ding a si.
Mara buainak tawlrel daan in phu dang buainak hi tawlrel awk a ttha lai lo. Cucu a tawlrel daan zong thleidan thiam a hau i mipi zong nih kan thleidan thiam a biapi ngai. Mararam buainak hi Chinland Council caah a biapi ngai, a hmasa bik test nak bantuk a si tiin ka ruah. Tluangte in an tawlrel khawh ahcun Chinland Council hmailei a lamthluan caah lam ttha a phahtu a si kho.
CDF Mara cathanh ah MDF kahnak in a nunnak a liam mi CDF-Mara le CNA pakhat chung ah CNA ralkap ruak a sining an langhter chih. Hihi a dik ko a si ahcun MDF upa hna caah zohdawhlo thil ngai a si tiah ka ruah. Tuk vuaknak in a pum a khat ti a si. A thih hnuah maw an vuak hnga, a thih hlan ah dah an vuak hnga ti ruah ah ruah ding a tam chinchin.
A thih hlan i an vuak i a thih ahcun a poi ngai ding a si. MDF a limhang a zorter lai. A thih hnu i an vuak ahcun MDF ralkap hna an lungput a langhter tu tuahsernak a si hnga. A thaw a um ti lomi pum cung i kutke thlak ding cu ruah ah tuk a sum.
An upa hna an ning a zah ngai ding ah ka ruah, mah le mah karah hi tluk faak in huatnak a khah hi hruaitu upa hna chimrel le tuahsernak ai tel lai lo ti chim awk a har caah. Ral lioah cun i tinh lo ning in thihloh a cang sual kho, nain a thicia mi pum cung i kutke thlak chap timi cu a naang ai dang. zeitluk in dah huatnak an thi chung ah a khah timi a langhter tu khi a si ko. Thantlang a khangtu ralkap hmanh an tlaih hna ahkhan hitin an tuah hna lo.
Atu lio online ah ngaihchia ngai a simi cu MDF le CDF-Mara kar kahnak ruang i a thimi kong an ttialnak tang ah a nimi emoji a um len. A ho an si zoh tikah MDF supporter le CNF/A a dotu ti awk a ttha mi an si an FB page hei kau ah pehtonh khawh ding a tam. Kum thum kan ram a buai chung ah hi tluk in maw Chinmi kan lungput a rawh ko ti ruah ah khuaruah a pit. Ngaihchia tuk a si.
Ramleng ram daihnak i a ummi hmanh nih kanmah le kanmah kan i kah i kan i ngaihchiat pi khawh lo, kan di a riamh ahcun a hmun i a ummi chinchin zeidek an hwi lawh hnga? Ruak cung i kutke an thlak zong cu a maw hme maw ti lo awk a ttha lo.
MDF he ai pehtlai mi upa chung ah keimah pumpak in ka theih i ka upat ngaimi an um hna. Atu ah Mararam chung ramkhel thlihfan a ciankuang lo tuk lio a si caah ramkhel sining in nam a kan neh tiah an ruahmi phu/bu ramkhel sining in an lehrulh hna hi cu a phung a si. Nain CNA huatnak, Thlantlang Hakha/Lai huatnak mipi lakah a herh lo tiang in a um lo ding cu hruaitu hna nih an i zuam ve ding tiah ka ruah. A hleihluat tuk a si hlan ah tlaihbawh an i zuam ding a biapi. Lai le Mara cu heiti ko ahcun thawi tawi khat ai hrawmmi an si. Dannak i kawl len hmanh ah nipi ni sunglawi ahcun ai dang kho an si hlei lo.
Mara buainak hi CNF/A zong nih faak deuh in an ruah i daihnak a um nakhnga lam kawlpi ding a biapi ngai. Meithal in lehrulhnak a um sual ahcun buainak mei phakh a fawi lai lo. Aho ca hmanh ah hlawknak a um lo ding a fiang. Mararam buainak a san chin sual nakhnga lo ai pehtlai mi bu kip in upa hna nih a nemnak lam tu i thim in rualremnak a umnak hnga thinlung kaupi he lungsau tein tawlrel i zuam hram hna seh.