Central Cozah Hruaitu Hna Nawlpeknak Lo Cun Dinh Ka Tim Lo – Manipur CM Biren Singh
=========
Manipur tualchung buainak ruangah pengtlang kip in nehnamnak a tong mi Manipur Chief Minister Biren Singh nih tualchung mipi nih ka rian in dinhter ka tim hmanh hnasehlaw cozah laipi (Central) hruaitu lutlai hna nawlpeknak lo cun karian ka chuahtaak hlei lai lo tiah a chim.
“A tu ka dirhmun cun ngol duhnak lungthin ka ngei lo central cozah lutlai hruaitu hna nih i din cang an ka titik lawngah ka rian ka chuahtaak lai” tiah interview an tuahnak ah Manipur CM Singh nih a chim.
Manipur Kuki (Chin) nungak pahnih taklawng in an chawhpi mi hna video pholangh a si hnu ah tualchung mipi Congress party dang dang nih Manipur chief Minister Biren Singh cu CM dirhmun in dinter ding ah cozah laipi Central sin ah nawlnak an tuah tiah theih asi.
“BJP nih Chief Minister dirhmun in dinter ding an chimh mi konglam ah Biren Singh nih a chim mi cu Manipur mipi duhthimnak in CM a tling mi ka si tiah a chim. A sinain, cozah laipi central lutlai hruaitu le Manipur mipi nih ka rian dinh dingin an ka duh piak si ahcun ka post hi ka chuahtaak ko lai” tiah a chim chih.
Vawlei cung ramkhel party ngan le state pakhat ah Chief Minister ka si. Cu caah central lutlai hna nawlpeknak paoh poah cu ka zulh lai ka rianṭuannak hmun in an ka dinhter si ahcun ka din ko lai tiah a dir hmun alanghter.
Manipur Thaazang Chuah In Ci Le Kawr Miphun Biaknak Karlak Thleidannak In A Chuak Mi Buainak Hi Deihter Cang. National Human Rights Commission (NHRC) nih Manipur cozah sin ah thazaang chuah in miphun karlak dohdalnak a um tilonak lai rianrang in cawlcanghnak la seh tiah theihternak a tuah.
Ci le Kawr karlak buainak ruang in harsatnak a tong mi hna caah state cozah nih bawmhchanhnak a pek ning konglam (NHRC) nih biahalnak zong a ngeih chih tiah an langhter. “Ṭuanvo ngeitu hna cu Human right ṭihzah piak ding le thazaang chuah in kahdohnak hi deihter ding ah nawlpek ansi tiin” human right in ṭuanvo ngeitu hna nih a langhter.
Manipur state chung i buainak hi pehzulh in a kal peng caah human right ṭihzah lo in a pahchih mi hna cuungah zeibanuk in dah state cozah nih an cungah cawlcanghnak a lak lai timi hi kan hngak lio. Cu ruang ah ṭuanvo ngeitu hna cawlcanghnak hi kan theih hmaisa a herh i thah/nawn naak kahdohnak lak i an cawlcanghnak ah hin commission nih biakhiahnka a tuah hlan ah ṭuanvo ngeitu hna cawlcanghnak theih a duh tiah (NHRC) an langhter.
Tualchung buainak ruangah nunnak liam mi chungkhar hna sin ah tuni tiang in state cozah nih bawmhchanhnak zeizat dah a pek cang nunnak liam mi chungkhar hna caah teh rianṭuannak hmunhma pek aa tim maw tiah (NHRC) nih biahalnak zong a tuah chih.
Africa Niger Ah Ralkap Nih President An Tlaih Cozah Uknak An Lak. Africa nitlak lei ram Niger ah ralkap hriamtlaiphu nih cozah uknak thlak an timhnak kong hriamtlaitu phu chung in ṭuanvo ngeitu pakhat nih state television ah a phuan.
Ram i hruai ning phunglam rawk a si pin ah caan saupi i hruainak phunglam upadi le ramri zong phihkhar a si tiah ralkap hriamtlaiphu chung in ṭuanvo ngeitu nih theihternak a tuah. July 26, zinglei sangah Africa nitlak lei ram Niger president Mohamed Bezoun hi hriamtlaiphu nih an tlaih i an hren tiah theih asi. Hi kong he pehtlai in, Ralbawi Amadou Adramane nih ralkap le security force hna nih Niger cozah hruainak cu an phihkhar cang tiah a chim.
Cozah thlak a sinak a ruang cu an ram venhimnak a chiat tuk ruang le i ṭhithruainak, Economy ṭhat lo ruangah a si tiah an langhter. Miphun ramdang nih buaibainak an ser lai lo tiah phuan a si i, thil sining a deih hlan cu an ram vanlawng le ramri zong khar asi lai tiah an langhter chih. Credit: Lungmili Post