Malaysia Chinmi Le Bawlung Chuih Roruak A Mak Tuk Cang!
==========
Malaysia ah a ummi Chinmi caah Bawlung chuih a hung lar ngaingai. Khrihfabu, khua, tlang, peng, Chinmi dihlak huap ( CND Cup ) tiin kum fatin ti awk hi Bawlung chuih puai tuah a si. Mah vial hmanh hi a tamtuk kan ti lio ah a tu cu a huam poh nih Club dirh i Club pawl Bawlung chuih a hung lar ciamman cu zarh chiar ti awk in Bawlung chuih zuamnak a um cang.
Bawlung chuih hi a tha maw tiah ahcun a tha tuk ee. Lentecelh phun khat a si caah kan tuah awk a si. Sinain khoika hmun le ram ah dah ka um timi hi kan i fian deuh cu a hau ko. A ngaingai tiah cun Malaysia ahhin Chinmi hi umnak nawlngeimi kan si lo. A thli tein phungning loin a ummi kan si timi hi kan i hngalh peng ah a tha. A thli tein a ummi minung nihcun mah siarem ning poh le mah duh ning poh in tlawnlen le cawlcangh phung cu a si bal loh.
Malaysia ahhin thaw i chuahnak ah le i hawikomhnak ah tiin khua, Fellowship, pengtlang bawlung chuih a um ko i cucu a za diam ko lo maw? Mah hmanh hi tuah lo awk a that ahcun tuah lo hmanh a tha. Cu si loin Club kan tuah i kanmah duh poh in bawlung chuih lawng kan rianh ko ahcun nikhat can khat cu anmah rammi nih kan bawlung chuih hi an simh te lai i kan caah a poi khomi a si.
Kannih cu phung ning loin a ummi kan si caah a si khawh chung in kan i fimkaan a hau. Langsar tuk in kan um le kan nun ding a si lo. Tlaih kan ton cang hnu i kan i chir tik ahcun san a tlai ti lai lo. Malaysia cozah nihhin a thli tein an kan ngiat peng ko. Tulio tlaihkhih operasi a tamtuk lio a si fawn. Bawlung kun ah tlaihkhihnak zong voikhat an rak tuah bal cang khah. Bawlung kun zong ahhin operasi an lut lai lo tiah chim awk a tha ti lo.
Cu caah Malaysia um Chinmi hna hi langsar tuk in um le nun hi i sum deuh hna usih. A herh tuk lem lomi Bawlung chuih tuk le lenvah zong hi i sum deuh hna usih. Tlaih khih kan ton ahcun a poi ti pin chim ding a um ti lai lo.
Bawlung chuih hi thil sual tuah a si lo i bawlung kan chuih ruang ah tlaih a si lo. Amah belte siikaan kan ngeih lo ruang tu ah tlaih kan si kho. Bawlung kun ah siikan kan nghei lo cun tlaihkhawh kan si btk in rian kan tuannak, kan sang kan pawngkam ah siikan kan ngeih lo cun tlaih khawh thiam kan si. Abiapi mi cu bawlung chuih si lo in siikan kan ngeih lo mi tu hi remh hmasa a hau deuh mi si. Nan no lio nan thazaang um lio nan chuih khawh lio caan te ah tampi chuih uh tar hnu cun chuih duh zawng ah ngah ti lo mi si Malaysia bawlung chuih mi pawl.