Malaysia Ah Ruah Lo Piin Tlaih Khih Kan Ton Tikah Hngalh Aw!
======
Tulio Malaysia dirhmun cu thinphan dai lo lungrethei in kan um lio pi a si. Zeitik dah operasi nih an kan phak lai tiah zan hmanh thathi i hngilh huaha loin um lio cio a si hna. Operasi nih inn an luh hnawh ahhin zantim tlai hnu deuh a si tawn caah zan zong ahhin tuan tuk i hngilh loin dide hi ngaih pah ah a tha.
Zantim ah ruah lo piin operasi nih an kan luh hnawh ahcun a fiang mi UNHCR card le UNHCR catlap a ngei lomi cu zangfahnak um loin tlaih i thonginn lei ah kalpi kha a si lai.
Cu ruang ahcun kan i ralrin dingmi tlawmpal te ka van langhter lai.
Zan ahhin inn leng ah keden tamtuk chiah lo ah a tha. Keden tamtuk a um ahcun mi an um timi kha a fiang cia tuk. Innka kha an boh khawh hlan lo an boh ko lai. Zantlai hnu innka onh lo ah an tha. Cun, operasi an luh ko ahcun i timh cia ah a tha. Zan ihnak hnipuan he hna kalpi cu a si kho lai lo caah i timh cia a tha.
Phaisa zong tlawmpal cu i ken ah a tha. Thonginn an kalpi tikah kawlram lei i tlun hna kan duh sual ah kan i kenmi kan phaisa te khan Kawlram lei ah tlunnak lam a kan sial piak khawh i tuan deuh ah Kawlram lei ah tlun khawh a si.
Malaysia thonginn kan kal tikah hin kan i kenmi thilri pawl kha pakhat hmanh a tlau lo. Palik nih tha tein fim piak dih a si. Phaisa nai kenmi zong a tlau lai lo. Tha tein an in fim piak dih ko lai. Pathian nih Malaysia um Chin miphun himnak kan pe cio hram ko seh.
Malaysia: KLCC, Pavilion Le Saloma Bridge Ah operasi An Lut. Kuala Lumpur khuapi chung ah minung an i but cemnak a simi KLCC, Pavilion le Saloma Bridge ah operasi an lut tiah theih a si. January 6,2024 zan suimilam 9:30 hrawng ah KLCC, Pavilion le Saloma Bridge ah ah tlaihkhihnak an tuah hi a si i ramdang mi 120 leng tlaih an si tiah Immigration nih an thanh.
Tu bantuk in operasi an luhnak hi ramdang mi an tamtuk ruang ah complain a um caah a si ti zong an chim. Tulio Malaysia cu operasi an hrang tuk lio a si caah Chinmi pohpoh nihcun ralring tein kan um awk a si. A herh lo ah leng ah chuah tuk lo ding. Zan hrimhrim ahcun leng ah chuah lo a tha bik.