Malaysia Ah Gas Dur Puahkehnak In Chinpa 1 Nunnak A Liam, November Thla Chung Ah Chin Mi 4 An Nunnak A Liam!
=========
Malaysia ram ah khuasa mi Chinpa pakhat cu meh a chuan lio ah gas dur puahkehnak a chuak i November 6 ah a nunnak a liam, tiah theih a si. Nunnak liammi hi Chin ramkulh, Hakha khuami Salai Za Hup Thang (Kum 34) a si i November 6 lio ahkhan a umnak inn-khan ah meh a chuan lio ah gas dur a puak i Ann-Pan sii-inn ah a nunnak a liam, tiah Malaysia um Myanmar miphun bawmchantu phu in ṭuanvo ngeitu pakhat nih a chim.
“Malaysia, Silangor ramkulh, Ann-Pan khuapi ah khuasa mi a si i gas dur puahkehnak in sii-inn pi ah a nunnak liam. A ruak cu a chuahsemnak Hakha khuapi ah tlunpi ding in timhlamh a si” tiah a cunglei upa nih a chim.
Salai Za Hup Thang ruak cu November 10 ah Ann-paan sii-inn pi in Kachan khuapi ah kalpi a si lai i thlacamnak ngeih dih hnu ah a chuahsemnak Hakha khuapi ah an tlunpi lai, tiah Malaysia um Myanmar ram bawmchantu phu sinin theih a si. November 1 in 8 tiang ah Malaysia ram um Chin miphun hna chung in minung 4 an nunnak a liam. Nunnak liammi hna cu Paletwa khuapi in minung 1, Hakha peng in minung 2 le Tedim khuapi in minung 1 an si, tiah theih a si.
Khampat Khuapi Chung Ah Pafa Karlak Bia I Alnak In Thahnawnnak A Chuak. Sagaing ramṭhen, Khampat Khuapi No.2 sang ah khuasa mi Pu Ṭhapuia nih amah chungchuak a fapa kum 20 mi cu namte in a thah, tiah theih a si. November 8, zanlei sang ah Pu Ṭhapuia le a fapa Tv.Lallawmawma hi angkilum/leng ruang ah pakhat le pakhat i hmuh thiam lo in an karlak ah bia-alnak an ngei i, a fapa cu lungfak in a nii le inn ah zan a va riak.
Zinglei sang i inn a rak ṭin ahcun a pa he bia alnak an ngei ṭhan i, hringtu a pa nih a chungchuak fapa cu a hnungzaang ah voi 3 tiang namte in a sawh caah a nunnak liam, tiah theih a si. 2023, November 9 ah Pu Ṭhapuia cu mipi ralkap nih an tlaih i, a fapa ruak vuinak zong tlamtling te in an tuah, tiah tualchungmi hna nih an chim.
Yazagyo Palik Sakhan Laak Kahdohnak Lio Ah A Zaam Mi SAC Chungtel 4 Cu Meithal Zuun 2 He An Tlaih Hna. Sagaing ramṭhen, Kalaymyo Peng, Yazagyo palik sakhan laak kahdohnak lio ah a zaam mi SAC ralhrang chungtel 4 hna cu meithal zuun 2 he nihin ah an tlaih hna, tiah NUG runvennak vuanci zung nih thawng an thanh.
November 3, deilei suimilam 3:00 ah Yazagyo khua pawng um SAC thong sakhan 1 le 2 hna cu Special Battalion 2 nih luhhnawh in an kahdoh caah an laak khawh i chun suimilam 12:46 tluk ah SAC ralhrang nih raltuknak vanlawng in bomb a thlak. Mah sakhan thong 1 ah ummi SAC ralhrang chungtel 20 hrawng cu mizapi sinah an i fonh, tiah theih a si.
Cu sakhan laak kahdohnak lio ah a zaam mi SAC ralhrang chungtel 4 cu meithal zuun 2 he November 9 ah an tlaih khawh hna i ralkap phungningte in kan hren hna, tiah NUG runvennak zung nih thawngthanhnak an tuah.
Paletwa Peng Hmunhma Cheukhat Ah SAC Ralhrang Le AA Ralkap An Cawlcang I Tualchung Mi An Lungre A Thei. Chin ramkulh, Paletwa peng, Pee hmunram chung ah Arakan Army (AA) ralkap le SAC ralhrang pawl an cawlcang i tualchung mi hna cu thinphang in an um hna, tiah theih a si. SAC ralhrang le Arakan Army (AA) ralkap pawl nih hmunhma zohfelnak kan tuah tiin an cawlcanghnak pawngkam ah ummi khuate cheukhat hna ah khualtlawng mi hna cu chekhlatnak an tuah hna, tiah tualchung mi pakhat nih Zalen ah a chim.
“Atu hi Paletwa peng, Pee hmunram chung ah SAC ralhrang an um i AA ralkap pawl zong an um ve. Luhchuah kan duh ahcun nawl kan hal hna i khualtlung kan ngeih zong ah theihternak kan tuah hna. Theihternak kan tuah hna lo ahcun dantat kan si” tiah a chim.
SAC ralhrang nih AA ralkap pawl thazaang nan pek hna tiin an kan tlaih i sakhan ah chekhlatnak an kan tuah. AA ralkap zong nih facang le eidin kan purh ahcun SAC ralhrang ca ah maw? nan phurh tiin chekhlatnak an kan tuah ve, tiah a chim chap. AA ralkap pawl nih Paletwa peng hmun cheukhat ah aluan ciami October thla in khualtlung le ramchung, ramleng in a lutmi tualchung mi hna cu chekhlatnak le mincazin laaknak zong an rak tuah hna, tiah theih a si. Credit: Lungmili Post