Myanmar Lei Kah Mi Bomb Ruang ah Bangladesh ah Mi Pahnih Nunnak Liam .Myanmar-Bangladesh ramri, Rakhine ramkulh chung kahdohnak ruang ah hriampi kuan pahnih Bangladesh ramchung ah a tla i minung pahnih an nunnak a liam, tiah Bangladesh tualchung thawngzamhnak BDNews24 nih a langhter.
Nihin February 5, chunhnu sml. 2:45 hrawng ah khan Myanmar lei in an kah mi hriampi pahnih cu Bangladesh ram, Jalpaitali khua i inncung ah a tla i nu pakhat le pa pakhat an nunnak a liam.
A nunnak a liam mi hna cu kum 55 a si mi Bangladesh ram mi nu pakhat le Bangladesh ah ral a zaam mi Rohingya putar pakhat an si, tiah an langhter.Bangladesh-Myanmar ramri kahdohnak ah SAC ralkap nih helicoter zong a hman i, ramri ah a um mi Bangladesh khuami tampi himnak hmun ah an zaam hna, tiah Bangladesh tualchung thawngzamhnak Prothomalo-English thawngzamhnak nih a ášial.
Nizaan February 4 ah khan AA le SAC ralkap karlak kahdohnak ruang ah Bangladesh ram ah SAC ralkap 60 leng an rak zaam, tiah Dhaka Tribune nih a langhter.
A Zual KO EE! Demawso peng sianginn pakhat ah SAC nih bomb a thlak i Ngakchia pali an thi.Nihin February 5, zinglei sml. 10:00 hrawng ah Karenni ramkulh, Demawso peng Nitlak lei Dawsiei khuate ah a um mi sianginn cu SAC nih vanlawng in bomb an thlak caah ngakchia pali an thi i 10 leng hma an pu tiah JOBS For Kayah nih a langhter.
Cu sianginn cu ralzaam le tualchung ngakchia hna ca ah hon mi sianginn a si i, ngakchia pawl ca an cawn lio ah SAC ralkap nih vanglawng in bomb voi hnih an thlak tiah theih a si.
SAC vanlawng nih bomb a thlak ruang ah a thi mi hna cu kum 11 in 13 kar pa ngakchia an si. Hma a pu mi ngakchia chung ah a hma a faak mi zong an um tiah theih a si.
Good News ! KNLA le PDF nih Thantaunggyi peng Mainglun SAC Camp an laak.Karen ramkulh, Thantaunggyi peng, Leiktho TOC kuttang ah a um mi Mainglun SAC camp cu Karen miphun ralkap KNLA le PDF nih an laak tiah NUG, Runvennak Minister Zung nih a thanh.
KNLA le PDF Central Command, Nay Pyi Taw ramthen PDF i bawm in ni thum chung an kah hnu ah an laak khawh tiah an langhter.Cu Mainglun SAC Camp ah cun khangh cia mi raal ruak pasarih tel in SAC ralkap 20 hrawng an thi tiah an tial. Camp laak kahdohnak ah hriamnam ngan bomb thei, kuanzen le riahcaw tampi kan laak tiah NUG, Runvennak Minister Zung nih a thanh. Credit : The Hakha Post