Malaysia Ram Mincimh Ruangah Chinmi Minung 5 An Nunnak Liam.Malaysia ram, Cameron Highlands, Pahang ramkulh, Raja khua ah mincimhnak a chuak i Chinmi minung 5 an nunnak a liam, tiah K’cho Ethnic Association Malaysia nih an thanh.
Pahang ramkulh, Raja khua dum pakhat ah rian a ṭuanmi Mindat khua mi minung 5 cu January 25 zan suimilam 8:00 hrawng ah mincimhnak ruangah an nunnak a liam i an ruak zong an kawl cuahmah hna, tiah K’cho Ethnic Association Malaysia in ṭuanvo ngeitu pakhat nih a chim.
A nunnak a liammi hna hi Mindat khua mi lawngte an si i cinthlaknak dum pakhat ah mincimhnak in an nunnak a liam. Chungkhar 3 le a dang 2 an umnak a si tiin kan theih. An ruak zong an kawl cuahmah hna i ruak pakhat lawng an hmuh rih, tiah a chim chap.
Nunnak a liam mi minung 5 cu pa 4 le nu 1 an si i Pu Shing Lawha, Pu Lawha Phe, Pi Uam Myo, Pa Thang Maung le Pa Ki Shing Uam hna an si, tiah theih a si.
Thawngpang Dang Rak Rel Chih ! Chin Hriamtlai Phu Khat Le Phu Khat Kar Ah Hriamnam Hmang Lo In Cabuai Cung Biaruahnak Tu Ngei Ding In CCM Nih Forhfialnak Tuah.Chinram chung ah dohthlennak a tuah mi Chin hriamtlai phu khat le phu khat kar ah buainak a chuak tawn mi kong ah hriamnam si lo in cabuai cung ah biaruahnak he ceihmainak tu ngei deuh ding in Chin Civic Movement nih nizan January 25 ni ah forhfialnak an tuah.
January 24 ni ah a cang mi Mara hmunram chung Lailenpi khuapi Chin hriamtlai phu kaphnih kar kahdohnak ruang ah nunnak tiang a liam mi kong he pehtlai in a rannak in biaruahnak le ceihmainak he ngawlter ding le kaphnih ṭuanvo ngeitu hna cu Chin hriamtlai phu dangdang cio cu unau sinak lungput he tonbiaruahnak ngei ding in le ceihmainak ngei ding in Chin Civic Movement nih forhfialnak an tuah.
Lailenpi khuapi ah MDF nih CNA le CDF Mara cu an kah hna i, CNA in Sergeant pakhat le CDF-Mara ralkap pakhat an nunnak a liam. CDF-Mara Second Company Commander pakhat hliam zong a pu. Cu pin ah CDF-Mara Tactical Operation Command le Company Commander telh in ralkap 5 cu MDF nih an rak tlaih hna i, nihin tiang an thlah rih hna lo i pehtlaih khawh an si ti lo.
Chin Civic Movement nih dohthlennak a tuah mi Chin hriamtlai phu khat le phu khat kar kahdohnak le ramkhel he pehtlai in buainak a chuak tawn mi kong ah an lungre theihnak an langhter i, mizapi i telnak ruahnak fumtom mi cu Chin hriamtlai phu hna sin ah pek a si cangnak kong zong January 19 ni thawngpang ceihmainak ah an rak chim.Credit : The Chin Post