AA Nih Hnungbu SAC Ralkap Sakhan An Laak Khawh Cang
===========
Chin ramkulh, Paletwa peng um Hnungbu SAC ralkap sakhan cu AA nih an laak khawh cang, tiah theih a si.
AA nih Paletwa peng um SAC ralkap Tharonai le Hnungbu sakhan cu November 14 ah an rak kah i Tharonai sakhan cu ni 21 a rauh hnu December 4 ah an rak laak khawh. Hnungbu sakhan cu ni 27 a rauh hnu December 10 ah an laak khawh, tiah Khit Thit Media nih a ṭial.
Hnungbu SAC ralkap sakhan kahdohnak ah SAC ralkap nih vanlawng le hriamngan an hman ko nain ni khat hmanh i din loin an kah. Kahdohnak ah sakhan uktu Brigadier pa a ruak le SAC ralkap cheukhat ruak pinah hriamnam le zen-kuan zeimawzat an laaknak kong AA nih an langhter.
European Union Nih Dan A Tatmi Hna Lak Ah Dr. Hmuh Thang Aa Tel Ve.Dr. Hmuh Thang le SAC chungtel hruaitu 3 pinah hriamnam zuartu Company pahnih hna cu European Union nih phihkham dantatnak a pek hnanak kong cu nizan December 11 ah EU nih an thanh.
European Union nih dan a tatmi hna cu; SAC hruaitu pathum Deputy General Nyo Saw, Wanna Maung Lwin, Dr. Hmuh Thang le Karen ramkulh chung vanlawng kahdohnak kong ah ṭuanvo ngeitu ralbawi Hla Moe hna an si.
Cu pin ah SAC pawl ca ah tangka a kawl i hriamnam zuar in chawlehnak a tuahtu Star Sapphire Group of Companies le Royal Shune Lei Company Limited hna cu European Union nih phihkham dantatnak a pek hna.
European Union nih dan a tatmi mi hna le Company nih an ngeihmi vialte cu EU kut ah a um chung rih lai i cu minung pumpak le Company an tangka luhnak hrampi le an chawlehnak vialte cu phihkharpiak an si pin ah Europe ram chung ah khualtlawng kho lo ding in kham an si fawn.
European Union nih SAC cawlcanghnak kong ah phihkhar aa timhmi a um rih i hriamnam le seh thilri cawkzuarhnak, sualnak ngei lo tualchung mi hna cung ah an hmanmi pehtlaihnak seh thilri vialte le ralkap nih an hmanmi thilri vialte cu kua kho ti lo ding in phihkharpiak an si.Credit: The Chin Post