Lam an zawhpi hna hnu le an sualpi hna hnu ah an thah hnami Kukki miphun nu pa 2 nih an tonmi thil!
===========
India ram Manipur state chung miphun le biaknak buai ruangah Khrihfa a si lomi Meitei pawl nih sualpi/tleihhrem ding ah an taklawng bak in an hruai hna, lam an zawhpi hna hnu le an sualpi hna hnu ah an thah hnami Kukki miphun nu pa 2 nih an tonmi thil cu India ram chung lawng hmanh si loin vawlei pi zong a hninh dih.
Vawlei cungah democracy hruainak lei kap in a sang bakmi le mipi zalonnak in aa hruai bakmi India ram chungah hi bantuk thil a canmi hi cu fih hrim a nung kho tak tak. India ram cu Covo (Right) a san baknak ram a si nain mu kan rak him lo tuk ti hi tutan thil cangmi nih a langhter tuk.
Tutan ah Manipur ram ah chuakmi buainak hi miphun le miphun kar ah buainak a si tiah a leng huap cun ruah a si men lai nain a tak tak ah cun BIAKNAK lei buainak a si, Manipur ram hi Hindu biaknak le an pathian in khat dih seh ti an duh ruang bak ah si ko timi hi a fiang tuk cang eee. Zei hmanh tuah piak khawhmi kan neih hna lo zongah a nungmi kan Pathian sin thlacamnak tetal in bawm cio hna usih!
Manipur Kuki Unau Hna Dirkamhnak Ah Mipi Thong Leng Nih Aizawl Khuapi Ah Lamzawhnak An Ngei! Manipur Meitei miphun le Tlangcungmi Kuki-Mizo-Chin hna buainak he pehtlai in Mizoram khualipi, Aizawl khuapi ah lamzawhnak an ngei i, lamzawhnak ahhin mining a thong leng an chuak. Manipur Kuki unau hna dirkamhnak an aupi leng ah nu pahnih taklawng in lamhrawnpi an si i, tlaihhrem an ton ruangah duhlonak an langhter.
Lamzawh hi zing suimilam 11 in thawk a si i, Chanmari kawn in phoih khat, Kulikawn in phoih khat ah kal in, Raj Bhavan pawng lamtonnak ah an i tong hna. Raj Bhavan lamtonnak hmun ah hin zapi caan hmannak an ngei i, NGO Co-Ordination Committee lei in ṭuanvo ngeitu nih caan a hruai.
Central Young Mizo Association(CYMA) President, Mizo Upa Pawl (MUP) president le Mizo Hmeichhe Inzawmkhawm Pawl(MHIP) president cio nih biachimnak an ngeih leng ah Rev. Dr. C. Chawnghmingliana, Mizoram Synod Moderator hruainak zapi thlacamnak zong an ngei.
Hi caan hmannak ahhin Manipur Kuki unau le Meitei buainak kong ah rianrang in hmalaknak a um khawh nakhnga India central cozah cu an auhnawh i, Manipur Kuki unau vialte kan in dirkamh hna tiah an au. Lamzawhnak ah a chuak mi nih cataar phunphun an i ken i, Manipur Chief Minister N Biren Singh mawhchiatnak cataar hna zong hmuh ding a um.
Tutan NGO Co-Ordination Committee tawlrel mi lamzawhnak ah hin All NGO nih biatung(resolution) panga(5) an chuahpi mi a um i, cu hna cu :- 1) Manipur ah remnak leh daihnak a um khawhnak ding ah India cozah fak piin cawlcang seh. 2) Demcracy a dir khawh nak ding ah Central cozah nih a tuanvo la seh. 3)Manipur ram buainak ruangah inn le lo hrawhpiak a tong mi, nunnak a liam mi le hliamtuar mi hna caah bawmhnak pek siseh.
4) Mizo nungak/ngaknu pahnih taklawng i khualak i chawhpi le tlaihhrem an ton mi kong he pehtlai in hi bantuk thil a tuahtu hna hi an i tlak ning in dantat si hna seh. 5) Manipur ram buainak ruang i N Biren Singh cozah nih Mizo miphun dan a tat mi hna le thong an thlak mi vialte hna hi chuahter si hna seh.
Manipur Kuki – Chin Khrihfa Nungak Hna Cungah Meitei Misual Thiltuah Mi Nih Khua Fakpi In A Ka Ruahter – US Cozah. July 24, ah Unnited States nih cathanh chuah in India ram state pakhat Manipur Kuki (Chin) Khrihfa nungak pahnih hna taklawng in an chawhpi mi hna video viral kong ah Meitei misual nih nungak hna cung i nesawhnak, zeirellonak lungthin ngei in an tuahto mi cung ah a lungfahnak le a thinhunnak kong a langhter tiah theih asi.
U.S State Department in biachim tu Matthew Miller nih Khrihfa nungak pahnih hna cung i Meitei misual hna thil tuah mi cu ṭihnung le tuksum bak a si tiah a langhter. India ṭuanvo ngeitu hna sin ah nawlnak le sawmnak a tuah mi cu remnak le deihnak um seh, ṭuanvo ngeitu hna zong nih bawmhchanh herh mi bawm in venhim herh mi venghim hnaseh chungkhar khuasaknak inn,
Biakinn le biaknak phunglam zong hi ṭihzah ding in kan nawl hna tiah a lungduhnak a langhter. May 4, khan Meitei misual rual nih Khrihfa nungak 2 kum 19 le 21 mi cu an hnipuan phoihter in lam an zawh pi hna pin ah an tlaihhrem chih hna tiah theih a rak si.
Mizoram Mipi Tam Khawh Chung Lamzawhnak Ah Tel Ding In Sawmnak; NGO Co-Ordination Committee chairman R. Lalngheta nih, Manipur i Zo-hnahthlak unau hna harsatnak le hremnak tuarpi ding le duhlonak langhter in lamzawhnak tuah ding timhlamhnak kan ngei ca ah Mizo mipi hna a tam khawh chung chuak ding in kan in sawm hna tiah theihternak le nawlnak a tuah tiah theih a si.
R. Lalngheta nih, “Manipur ah ummi kan unau hna tuarnak kan tuarpi ve hna tinak le kan dirpi peng hna ti langhternak ding ah buaibainak dang siam lo le thazaang chuah lo tein mipi lamzawh ding ah kan in sawm hna kan unau nunnak liam mi hna thlahnak ding ah kan dihlak in puannak zar dih ding a si lai in tiah a chimh chih hna.
July 25, Mizo mipi lamzawhnak tuah ding mi hi Aizawl ah cun zinglei suimilam 11:00 in Chanmari sang le Kulikawn ah hmunhnih i ṭhen in tuah ding a si lai i, Raj Bhavan North gate pawng ah an tonhnak a si lai. Hi hmun ah NGO aiawh in minung tampi nih biachimnak zong an ngei lai tiah an langhter chih.
A Unaupa Hreitlung In Thattu Thonginn Chung In A Zaam; July 24, zing suimilam 9:30 tluk ah nunchung thongthlak ding in beiceihzung nih bia khiah piak cang mi a mah unaupa hreitlung in thattu Tuansianmuanga cu Champhai district thonginn chung in a zaam i zanlei suimilam 5:00 tiang ah a konglam zeihmanh theih awk umlo tiah theih a si.
Champhai district thonginn nih Zalen News sin ah theihternak a tuah ning cun, tonginn chung hnawmtam hlonhtu (sanitation motor) in leng ah hnawm hi thongtla pawl an hlonhter tawn hna. Cu bantuk ṭhiam in July 24, zinglei suimilam 9:30 tluk khan unau that tupa Tuansianmuang hi hnawmhlonh ah a kal ve i lengchuahnak gate a phak bak in a zaam colh tiah an langhter.
Thong zohkhanh tu hna nih a zaam ti an theih bak in kawl hram an thok colh a sinain, July 24, zanlei suimilam 5:00 tiang ah a konglam zeihmanh theikawk umlo tiah an langhter. Thuansianmuang hi kum 2021, June ni 23 khan a unaupa cu hreitlung hmang in a rak thah i biaceihzung nih a konglam ṭha te in hlathlainak a tuah hnu ah July ni 20, 2023; khan Champhai Addl. District & Session Judge nih thiam lo canter in nun chung thongthlak ding ah bia khiah piak mi a si tiah an langhter chih.
China Ram Sianginn Zaangleknak Zung A Cimh Ca Ah Minung 11 An Thi. China ram thlanglei ah ruahpi faak ngai in a sur i fimcawnnak sianginn um zaangleknak zung a cimh caah minung 11 an nunnak a liam, tiah state-run media nih July 24 ah an langhter.
Nunnak liam mi lak ah a tam deuh cu ngakchia an si hna tiah mithmutu pakhat nih news outlet ah a chim. Zaangleknak zung cimh lio hi nu volleyball team cawnnak an ngeih lio ah a si, tiah an langhter chih.
Fimcawnnak sianginn Zaangleknak zung cim mi nih a chilh mi hna minung 19 lak ah 4 hi nungdam te in chanchuah khawh mi an si, tiah ṭuanvo ngeitu hna nih an chim. Hi kong he pehtlaiin, July 23 khan China palik hna nih Hailongjiang ramṭhen Kakaha khuapi ah Gum zohkhenhtu pakhat an tlaih, tiah theih asi. Credit: Lungmili Media