Laiza Khua Pawng, Aunggya Sakhaan Lak Kahdohnak Ah SAC Ralkap Lei 20 Leng An Thi, A Nung In An Tlaih Mi Hna Zong A Um!
=========
Kachin ram le Shan ram chaklei ah a um mi SAC ralkap sakhaan pawl cu KIA nih an lak tiah SAC ralkap lei thawngzamh pawl nih an langhter. October 19 zinglei sml 9:00am hrawng ah Shan ram chaklei, Muse pengkomh, Mongkone khua ni tlaklei in meng 10 aa hlatnak ah a um mi Natkuat sakhaan, cun October 20 zong ah KIA Headquarter, Laiza pawng ah a um mi Lelone sakhaan (Aunggya sakhaan) cu July 8 thawk in October 20 tiang voi 81 bak thazang tampi in an kah hna. October 20 zaanlei sml 3:00pm hrawng ah Aunggya sakhaan cu KIA nih an lak khawh.
SAC lei nih Kawlram chung kahdohnak kong he pehtlai in thawng a thanh bal lo nain Kachin ram le Shan ram chaklei ah ah a um mi sakhaan an sunghnak thawng a langhter i sakhaan an lak khawh ṭhan nakhnga vanlawng in bom a thlak caah sualnak ngei lo mipi a thi mi pawl he pehtlai in sualnak kan ngei lo i sakhaan pawl ah kahdohnak kan tuah mi a si tiah an langhter.
Kachin ram, Momauk peng, KIA Headquarters pawng ah a um mi SAC ralkap Aunggya sakhaan cu KIA pawl nih an lak khawh i ralkap a nung in an tlaih mi hna zong a um. Sakhaan an sungh caah SAC ralkap lei nih vanlawng in bom a rak thlak tiah KIA lei nih an chim. SAC lei, Naypyitaw thawngzamh nih an langhter ning ah, Aunggya sakhaan kahdohnak ah SAC ralkap lei 20 nak tlawm lo an tlau tiah an langhter.
Salin Peng Rallamsialmi SAC ralhrang Le PDF Karlak Kahdohnak Ah Ralhrang Lei Minung 12 A Thi. Magway ramṭhen, Salin peng ah rallamsialmi SAC ralhrang le mipi hriamtlaiphu PDF karlak kahdohnak ah SAC ralhrang lei minung 12 an thih tiah Myin-Bo pengkomh No, 1 chungin ṭuanvo ngeitu pakhat nih Yangon Khit Thit ah a chim.
October 21, zaanlei suimilam 1:45 tluk ah thok in suimilam 4 tiang Salin peng Kyweu khua rallamsialin a ra mi SAC ralhrang le mipi hriamtlaiphu karlak ah kahdohnak fak a chuak tiah theih asi.
Kahdohnak hmun ah SAC ralhrang lei in minung 12 naak tlawmlo an thi 10 naak tlawmlo nih hliam an tuar tiah theih chih asi. Kahdohnak ah aa telmi mipi hriamtlai phufonh hna cu, Myin-Bo No, 1 , le SLN-LPDF battalion 2 ṭangṭi phufonh hna ansi tiah an langhter.
Yaw-Ngan Khua Ah Bomb Puahhnawhnak In Ralhrang Palik bawi Myo Myin Tu A Thi 3 Nih Hliam An tuar. Shan ramkulh, Yaw-Ngan peng ah bomb puahhnawhnak in ralhrang palik bawi Myo Myin Tu a thi midang 3 nih hliam an tuar tiah theih asi.
October 21, zing suimilam 8:00 tluk khan Taunggyi pengkomh Gyi Soe Than nih uk hruai mi SAC ralhrang palik motor 5 he arak chuak mi hna cu Yaw-Ngan peng Tapinpyaw khua pawng an phak zinglei suimilam 9:00 tluk ah mipi hriamtlaiphu PDF nih bomb an puahhnawh hna tiah theih asi.
Bomb puahhnawhnak in Taunggyi pengkomh palik bawi Myo Myin Tu le a kuttang mi Soe Myin Htue, A Ka Aung, le December Ko Ko hliam an tuar, culak ah ralhrang palik bawi Myo Myin Tu cu Yaw-Ngan khuapi sii-inn ah hliamfak in a thi tiah theih asi.
Ye Peng Kahdohnak Ah SAC Ralhrang 40 Tluk An Thi Hliamtuar An Tam. Mon ramkulh, Ye peng mipi hriamtlaiphu le SAC ralhrang karlak kahdohnak ah ralhrang lei in minung 40 tluk an thi hliamtuar an tampi tiah theih asi.
October 20, khan Dona rallamsialmi ralhrang hi Ye peng Guerrilla Force (YGF)၊ Mon ramkulh (MSRF)၊ ABSDF battalion 1 ṭangṭi phufonh nih suimilam 3 chung tluk ankah hna caah ralhrang 40 tluk an thi tliamtuar an tam ralthuam zeimzawzat anlak, mipi hriamtlaiphu chungin minung 12 hliam an tuar cu lak ah 2 hi nunnak caah ṭih nung in hliamtuarmi ansi tiah an langhter.
A voi 1 kahdohnak ah mipi hriamtlaiphu nih Sniper, hriamngan le hriamhme he Ye peng check-gate ah ralhrang thazaang 100 tluk he rallamsialmi cu ankah hmaisa hna ralhrang minung 18 an thi hliamtuar an tam mipi hriamtlaiphu chungin 1 ralhrang hriamngan hliam a tuar tiah theih asi.
A voi 2 naak kahdohnak cu mipi hriamtlai phu chungin hliamtuarmi sii-inn ah zohkhenh dingin an kirpi hna lio ah Kyonlaung khua le Wepaung khua karlak ah ralhrang nih an rak bawh hna i kahdohnak a chuak ṭhan ralhrang 27 an thi 3 anzaam. Zing suimilam 8:00 tluk ah mipi hriamtlaiphu chungin hliam tuarmi a phurtu Cycle le motor cu ralhrang nih hriamngan in ankah hna caah 11 hliam an tuar culak ah 2 hi nunnak caah thinphang ansi tiah an langhter.