Lailenpi Khuapi Pawng Ah MDF Nih CDF Mara Ralkap Pahnih An Tlaih Ṭhan Hna!
=========
Chinram, Lailenpi khuapi pawng ah MDF nih CDF Mara ralkap pahnih an tlaih ṭhan hna i, an dihlak 6 an tlaih cang hna, tiah CDF Mara sinin theih a si. January 19 zing suimilam 10:00 hrawngah Lailenpi khuapi pawng meng 9 ah CDF Mara Battalion 3 in Company Commander Sang Hnin le ralkap Ra Lai cu MDF nih an tlaih hna, tiah CDF Mara chimphuannak nawlngeitu nih a chim.
Company Commander Sang Hnin an tlaih lio ah cun meithal aa ken i ralkap Ra Lai an tlaih lio tu ahcun meithal aa ken lo, tiah theih a si. January 5 ah CDF Mara ralkap pahnih cu MDF nih an rak tlaih hna i CDF Mara in Brigadier Htet San le Battalion Commander Khuma nih MDF le AA ṭuanvo ngeitu cu thlah dingin nawlnak an rak tuah.
AA le MDF ṭuanvo ngeitu hna nih CDF Mara ralkap pahnih cu thlah dingin an ti ko nain January 7 ah CDF Mara Brigadier pa le Battalion Commander pa zong Shweleikwa khua ah an tlaih ṭhan hna, tiah CDF Mara nih January 17 ah an rak langhter. MDF nih Mara hmunram chung ah theihternak tuah hmasa lo, hriamtlai phu dang duh paoh in luh chuahnak le umhmun khuar lo dingin January 18 ah an rak langhter.
“MDF ralkap pawl cu Lailenpi khuapi pawng meng 9 ah umhmun khuar in CDF Mara ralkap cu an kan tlaih pah lengmang. Hi bantuk an tuahser mi hi Lailenpi uk an timh caah a si kho,” tiin CDF Mara chimphuannak nawlngeitu nih a chim.
CNF/CNA, CDF- Mara, CDF- Matupi, CDF- Lautu, CDF- Zophei le CDF- Thantlang nih 2023 November 19 ah Lailenpi khuami hna cu ralhrial chung dingin an rak chimh hna i Lailenpi khua um SAC ralkap pawl cu ni 5 an rak kah hna hnu November 24 ah an rak laak.
Maraland Defense Force-MDF Nih An Ram Chung Ah Hriamtlai Phu Dang Lut Lo Ding In Ralrin Peknak An Tuah. Maraland Territorial Council/Maraland Defense Force (MTC/MDF) nih biakhiahnak an rak tuah cang bantukin Maraland Territorial Council nih a uk mi hmunram chung ah MDF dah ti lo zei bantuk hriamtlai phu hmanh luh le cawlcangh khawh a si lo, tiah nizan January 18 ah Maraland Defense Force-MDF nih an thanh.
A liamcia 2022 February 1 ni a voi khatnak Mara mipi tonpumhnak ah biachiah mi, 2022 October 28-29 ni ah tuah mi laakhruak Council tonbiaruahnak biachah mi le 2023 April 24 ni ah Maraland Territorial Council nih bia a chah cang mi ning in Maraland Territorial Council nih a uk mi hmunram chung ah MDF dah lo mizei hmanh nih hriamtlai phu an ser kho lo i cawlcanghnak nawl an ngei lo, tiah Maraland Defense Force nih cun an thanh.
Maraland Territorial Council/Maraland Defense Force (MTC/MDF) nih a herh lo mi ah buainak chuahter kan duh lo caah voi tampi ralrin peknak kan rak tuah cang ko nain a hlankan in theihternak tuah hmasa lo in Mara hmunram chung ah hriamtlai phu dang pawl lut in an cawlcang, umhmun khuar in buainak an chuahpi tawn ruang ah voi tampi biakhiahnak kan tuah mi an buar a si, tiah MDF nih an langhter.
MDF le hriamtlai phu dang kar ah a herh lo mi hnahnawh buaibainak a chuah kan duh lo i atu ralrin peknak cathanh kan chuah ni thawk in a hlankan in theihternak tuah hmasa lo in MTC hmunram chung ah umhmun khuar le cawlcanghnak tuah ti lo ding in a donghnak bik ralrin kan in pek hna, tiah MDF nih an langhter chih.
Mararam chung ah hin tualchung hriamtlai CDF-Mara an um ve i, hi cathanh kong he pehtlai in lehnak an tuahmi hmuh ding a um rih lo. CDF-Mara nih January 17 i an thanh ning ah, CDF-Mara Tactical Operation Command le Commanding Officer tel in CDF-Mara ralkap 4 cu AA le MDF nih a luancia January ni 5 le 7 ah an rak tlaih hna, tiah theih a si.