Kum 3 Chung Ah Bomb I Lamhsualnak In Chinram Chung ah Minung 33 An Thi I 52 Hliam An Pu.SAC ralkap nih hramhram in nawlngeihnak an laak 2021 February 1 in tukum 2024 February 1 tiang kum 3 chung ah SAC ralkap hmanh mi bomb i lamhsualnak in Chinram chung ah minung 33 nunnak a liam i, minung 52 hliam an pu, tiah Chin Human Rights Organization (CHRO) nih an thanh.
SAC ralkap nih an hmanh mi bomb i chuahsualnak in a thi mi lak ah kum tling lo ngakchia 5 hrawng zong an i tel i, minung 4 hrawng hliam an pu, tiah CHRO nih cun an langhter.
“SAC ralkap nih hramhram in nawlngeihnak an laak kum 3 chung ah CHRO nih kan khawmh i fehter khawh mi ah minung 33 hi SAC ralkap bomb hmanh mi ruang ah a thi mi an si i, bomb hliam tuar ruang ah pum tlamtling lo ah aa chuah mi hna telh in minung 52 hliam an tuar,” tiah CHRO ṭuanvo ngei Salai Mang Hre Lian nih a chim.
Tuthla February 4 ni ah Chinram, Mindat peng ah SAC ralkap Khah-Lah-Yah 274 Battalion sakhan pawng inn dum pakhat ah leiphum mi bomb i lamhsualnak in kum 14 tleirawl nu pakhat a ke a bul i, kum 12 pa ngakchia pakhat a keng ah hliam a pu.Cu pin ah Tedim peng, Taingen khua ah a luancia January 26 ni ah kum 50 hrawng pa pakhat cu sia a kawlnak ah leiphum mi bomb aa lamhsual i a ke khatlei a bul ve.
A Zual Ko Ee :SAC Ralkap Le Pyusawhti Phu Nih Tualchung Hriamtlai Pahnih Cu Meikhangh In An Thah Hna.Magway ramṭhen, Gangaw peng ah SAC ralkap le Pyusawhti phu nih tualchung hriamtlai pahnih cu an tlaih hna hnu ah an hrem hna i meikhangh in an thah hna, an thah hna lio video tawi zong social media ah an langhter.
Myaukkhinyan khua ah meikhangh in tualchung hriamtlai phu a thattu hna hi Pyusawhti hruaitu Htet Wai U kuttang pawl le SAC ralkap an si, tiah theih a si.
A liamcia 2023 November 7 ni ah Myaukkhinyan khua Pyusawhti phu le SAC ralkap pawl cu tualchung hriamtlai phu YDF, YPDF, CNA, CDF-KKG, Dragon Pah-Kah-Phah le Yaw Pah-Kah-Phah ṭangṭi phu nih an rak kah hna.
Cu kahdohnak ah cun tualchung hriamtlai phu in minung pahnih cu Myaukkhinyan khua Pyusawhti phu le SAC ralkap nih an rak tlaih hna i, thirhri in an ṭem hna hnu ah an khangh hna, tiah theih a si.
SAC ralkap le Pyusawhti phu nih an khangh mi hna tualchung hriamtlai pahnih cu YDF ralkap an si i Sameik khua le Zeepya khua mi an si, tiah theih a si. Meikangh in thah a tong mi hna kong he pehtlai in YDF hriamtlai phu lei nih cun fehternak an tuah rih lo.Credit : The Chin post