KNU Le KTLA (Kaw Thoo Lei Army) An I Kap I, KNU Lei Ralkap 2 An Thi, 5 Hliam An Tuar!
=========
Tanintharyi ramṭhen, Dawei pengkomh, Myatta-Htikhi lam ah KNU Brigade 4 le Kaw Thoo Lei Aalkap (KTLA) cu July 19 ah an i kap i, KNU in Major Saw Phu Si le amah cawngtu bodyguard pa an thi, tiah KNU in chimphuannak nawlngeitu Padoh Saw Kale Se nih BBC ah a chim.
KTLA cu pehtlaihnak kan tuah hna i zei ruangah dah kahdohnak a chuah ti cu an chim lo nain kan dohthlennak lamthluan ah hnahnawhnak pek lo dingin kan rak chimh lengmang cang ko hna tiin lehnak an tuah, tiah BBC nih a langhter.
Ralhrang nih Monywa ah PDF an si timi sualphawt in sualnak ngeilo mi 5 an thah. Monywa i Suan Yi Htet datsi dawr pawngah sualnak ngeilo mipi 5 tlaih in thah an tong, Ralhrang nih PDF an si tiah a si lo ning pi in thanhnak a tuah tiah theih a si.
Sagaing ramthen, Monywa khuachung ah SAC ralhrang nih Mipi 5 a tlaih hna hnu ah a thah mi cu PDF an si tiah SAC telegram ah lih le hrokhrawl in thawngthanhnak an tuah tiah Monywa khuachung ummi nih an chim.
Monywa khuachung July 21 chun 12:00 ah SAC ralkap le Phu Saw Hti rual cu Kutaw khuachung an lut i khuachung lam a um kal mipi an tlaih hna hnu ah pa 5 an thah mi cu PDF an si tiah kutser meithal zun 1 he hman an thlak mi cu an telegram ah lih in an tarlangh.
“Kan theih tawk ahcun, a thi mi chungin Khin Mon khuami 2 an i tel, khuachung lam pi an tlaih mi dihlak mi 8 hrawng an si. Mah an tlaihmi hna chungin mi5 an thah hna. An ruak hi Suan Yi Htet datsi dawr pawngah an hlawh” tiah a hmu tu khuami pakhat nih a chim.
“SAC telegram cheukhat ah cun SAC le PDF kahdohnak PDF 5 an thi tiah lih le hrokhrawl in an `ial, an tarlangh, natein mah khua pawngkam ah kahdohnak aum lo, Khuachung lam um kal mipi an tlaih mi chungin mi 5 an thah mi hna cu an ruak pawngah kutser meithal an chiah, hman thlak an tar tiah khuami nih Khet tit media sin ah a chim. Mipi 5 a thahtu cu pumpak in nihin tiang in theih a si rih lo tiah theih a si.
Kalaymyo No. 13 High School Luhhnawh An Ton Ruangah Sianginn An Khar. Sagaing ramthen, Kalaymyo khuachung Taungphila Sang No. 13 Basic Education High School (BEHS) cu July 20 ni ah hriamtlai bu nih an luh hnawh hna tiah Khuachung um sin in theih a si.
Hlriamtla mi hna cu No. 13 High School sianguk (Headmaster) tlaih ding in an luhhnawh hna nain sianguk a rak um lo caah saya/sayama te an phone an check (zoh) piak hna hnu ah hmailei sianginn on, kai ti lo ding in ralringnak an pek tiah sianghngakchia nu/pa hna nih an chim. July 20 ah luhhnawh an ton i nihin July 21 ah sianginn an khar hnu cun thawngpang a dai than ko tiah theih a si.
Kalaymyo peng 2023-2024 fimcawnnak kum ah Cozah sianginn (57), Private sianginn (18), Buddhist phungki sianginn (7) tiin an dihlak (82) nih sianginn an on i sianghngakchia 30,000 hrawng an si tiah theih a si. Kalaymyo peng ah June (1) thawk in SAC nih Basic High School (Mucu in Grade 1-12 tiang) sianginn a on ṭhan i a kai mi siangakchia 24,926 leng an um tiah peng fimcawnnak zung (Township Education Officer) sin in theih a si.
Kalaymyo education Office zung nih cun, Primary Siangngakchia (13,043), Middle Siangngakchia (4,299), High School Siangngakchia (1220) an si cang. June (1) sianginn on ni ah sianginn a kai mi an si. Tutan cacawn kum hi 2019-2020 Covid pulrai a si hnu in 2021 kum SAC nih hramhram in uknak lak a si hnu kum 3 chung Kalaymyo ah, SAC kuttang ah sianginn an on khawh mi a tambik kum le siahngakchia a kai mi an tambik kum a si.
“2020 Covid pulrai le 2021 ram buainak ruang ah kan fale hna sianginn an kai khawh lo nak hi kum 3 leng a rau cang i ngakchia hna an hmailei ca ruah ah lungretheih a si caah SAC kuttang ah kan duh lo bu in sianginn kan kaiter hna hi a si i mirum fa le hna cu Private sianginn ah an fale sianginn an kaiter khawh hna.
Tangka ngei lo mi nih kan fale cu cozah sianginn ah ka kaiter hna mi a si. A bik in Kalaymyo peng chungah SAC le mipi hriamtlai hna kahdohnak a um caah khuate tam deuh cu khua chuaktak a si i, a tamdeuh cu Kalamyo khuachung ah ralzaam in an um hna. Mah ralzaam fale khuachung ummi fale an si ruangah khuachung sianginn a kai mi an tam khunnak a si” tiah Private ah a fa le sianginn a kai ter kho lo mi khua mi pakhat nih a chim.
“2023 kum hi sianginn a kai mi an tam. A bik cu fale sianginn an kai ti lo nak hi kum 3 a si cang. SAC kuttang ah sianginn kaiter an duh hna lo, nain Kalaymyo peng chung ahcun NUG nih a dirh mi sianginn zong a um lo, Cozah sianginn ah le sianginn kai ter an duh tuk lo mi zong an um. Khuachung um private sianginn le Bahkhah (phungki sianginn) ah sianginn kai mi an um ve ko. Mah private sianginn pawl zong SAC kuttang um Township Education Office sin tangka pek in an mah TEO nawl chuah ning tein sianginn kai ter a si” min langhter duh lo private sianginn ngei tu sin in theih a si.
“Cozah (Ralkap) sianginn sianginn an awn ko, nain siangcachim an i tingzo lo. Cachimhnak lei a chanbau ngai. Cheukhat saya/mah CDM an tuah. Private sianginn ah cun saya thiammi an um. Sihmahsehlaw, sianginn apnak le cacawn man a fak ngai. Mi harsa chungkhar caah cun Private sianginn ka fa le sianginn kan kai ter kho hna lo” tiah Khuami pakhat nih a chim chap.
SAC ralkap uknak a lak hlan 2019 kum lio Kalaymyo peng chungah cozah sianginn dihlak 218 an um.
Cozah High School-13, High School (Affiliate-High school-12), Middle school-7 le Tanghra tiang cawnkhawnhmi dihlak (32) an si. Affiliate-Middle school) (78), Mulun sianginn timi tangsarih tiang cawn kho mi (27), Primary sianginn (41), Affiliate-Primary (15) an um. Buddhist Sianginn (Bahkah timi hi) cozah he a pehtaimi sianginn ah (14) an um. A dang Buddhist pawl nih dirhmi sianginn a lak in cacawn khawhmi (Pyin-Ngia-da Nah) sianginn (52) an um. Cozah sianginn ah cacawn hau tilo mi Private High sianginn (11) an um le a dang cozah sianginn siangin ah cacawn a hau mi Private sianginn (82) an rak um.