KNU Brigades 5 Hmunhma, October Thlacheu Chung Kahdohnak Ah SAC Ralkap 13 An Thi!
=========
Karen ram, KNU Brigade 5 hmunhma, October thlacheu chung kahdohnak ah SAC ralkap lei 13 an thi tiah KNU Mutraw News nih thawng a thanh. October 1 in October 15 tiang KNLA Brigade 5 le SAC ralkap pawl karlak ah kahdohnak voi 38 a chuak i cu chung ah SAC ralkap lei 13 an thi i 29 an i hliam. KNU Brigade 5 lei in ralkap 1 aa hliam ve tiah theih a si.
October 15 tiang ah SAC ralkap nih 120MM, 122 MM lung 10 bak te Hpapun khua No. 3 sang ah an kah, October 5 ah SAC ralkap nih Bawleday khua ah Cluster Bomb lung 2 a rak thlak nain mipi pawl hliam a tuar mi an um lo tiah theih a si.
Khin U Khuachung Ah SAC Ralkap Pawl PDF Nih An Kah Hna, 3 An Thi I Meithal Zuun 2 An Lak Khawh. Sagaing ramṭhen, Khin U khuachung ah SAC ralkap pawl cu PDF nih an kah hna i ralkap 3 an thi MA-1 zuun 2 an lak khawh tiah Khin U PDO nih an thanh.
October 17 zinglei ah Khin U PDO nih ralkap pawl an kah hna, meithal zuun 2 an lak khawh, Khin U khuachung Min-taih inn ah hmunhma a khuar mi SAC ralkap 3 cu Khin U-Ye U lam lei an rak chuah lio ah PDO pawl nih lam-orh in an rak kah hna hi a si i a hmun ah ralkap 2 an thi i aa hliam mi pawl an zaam i cu chung ah pakhat cu sizung ah a thi tiah theih a si. Khin U khuachung ah kahdohnak an tuah dih hnu in dothlennak phu pawl him tein an kir ṭhan kho, SAC ralkap nih hriam an thlah thlorh ruang ah mipi cheukhat an thi tiah theih a si.
Ayadaw Ah PDF Sakhaan Pakhat An Luhhnawh Hna I Company Commander Telh In 3 An Thah Hna. Sagaing ramṭhen, Ayadaw peng PDF sakhaan pakhat cu October 16 ah SAC ralkap pawl nih an luhhnawh hna caah kahdohnak a chuak i PDF chungtel 3 an thah hna tiah Ayadaw peng PDF phu sin in thawng theih a si.
Thah a tong mi hna hi Ayadaw peng le Monywa peng ranri ah hmunhma a khuar mi Monywa pengkomh B27, C04 in Company Commander telh in nu 1 le pakhat an si tiah theih a si. October 16 zinglei ah SAC ralkap 70 leng nih an rak luh hnawh hna caah kahdohnak a chuak i atu bantuk in PDF chungtel 3 an nunnak a liam hi a si. Sakhaan i minung umnak buk 2 zong an khangh i hriam pawl zong an kalpi tiah theih a si.
Sagaing, Magway, Mandalay le Shan Chaklei September Thla Chung Kahdohnak Ah Hriam Zuun 46 An Lak Khawh. Sagaing ramṭhen, Magway ramṭhen, Mandalay ramṭhen le Shan ram chaklei, September thla chung ah kahdohnak voi 323 a chuak tiah NUG Ministry of Defense nih a thanh.
Kahdohnak pawl chung ah SAC ralkap lei 179 an thi i 301 an i hliam. Mipi hriamtlai 42 an nunnak a liam ve i 29 an i hliam tiah theih a si. Kahdohnak voi 300 leng chung ah a naih tein kahdohnak hi voi 57, bomrap puahhnawh nak hi voi 55, dothlennak phu pawl nih Drone dohnak hi voi 55, dothlennak phu lei nih hmainor in kahdohnak hi voi 145, SAC ralkap nih vanlei in kahdohnak hi voi 6, SAC ralkap nih Drone in kahdohnak hi voi 5 an tuah tiah a langhter.
Cun SAC ralkap lei in siibawi Captain pakhat zong September thla hramthawk lei ah dothlennak phu pawl nih an rak tlaih khawh. Magway ramṭhen, Gangaw peng, Kyaw hmunhma kahdohnak ah SAC ralkap hriam zuun 15 zong an lak khawh.
Thayetchaung Kahdohnak Ah SAC Ralkap Lei 11 An Thi. Taninthary ramṭhen, Thayetchaung peng ah kahdohnak a chuak i SAC ralkap lei 11 an thi tiah Dawei pengkomh Battalion 2 nih an thanh. October 17 zinglei sml 7:13am ah Thayetchaung peng, Katuai khua in a rak chuak mi thazang 53 hrawng SAC ralkap pawl cu Yange khuate le Katuai khuate lam tonnak ah Dawei pengkomh PDF Battalion 2 (T5-Zone) nih bomrap an puah hnawh hna i minutes 30 hrawng kahdohnak a chuak tiah theih a si.
Kahdohnak chung ah SAC ralkap lei 11 an thi i tampi an i hliam. PDF pawl hliamtuarnak um lo tein an kir kho tiah Dawei pengkomh PDF Battalion 2 (T5-Zone) nih an langhter. Kahdohnak chung in a thi mi SAC ralkap ruak pawl le hliam a tuar mi pawl rak phor ding in a raa mi ralkap mawṭaw 1 cu lam-orh in an kah ṭhan hna tiah theih a si. Kahdohnak a chuah hnu in SAC ralkap pawl nih Yange khua mipi inn 3 tiang an khangh tiah theih a si.